سرايا - لما إنها البنت تغسل أواعي أخوها و تنظف تحته معناها هو لازم يعطيها راتب ؛ لإنها بكل بساطة مش مجبورة فيه متل ما هو مش مجبور بالإنفاق عليها ! بل حتى اختلفوا علماء الدين بموضوع خدمة الزوجة لزوجها ! من طبخ و غسيل و جلي .

فما بالكم لما إنها هالمسكينة تخدم أخوها يلي ربنا خالق إله إيدين و أكبر من إيديها بالعادة و بيقدر يخدم نفسه بنفسه ، و بيقدر يشتغل الشغل يلي هي بتشتغله و زيادة . بس الأم هي يلي بتعود إبنها عالإتكالية و الأنانية !! يلي احتمال كبير لما إنه يتزوج ما رح يفضى لأخته ، خاصة لو إنها احتاجته كذا مرة ، ما رح يحس و يحكي والله أختي تعبت كتييير بزماناتها منشاني و نظفتلي و رتبتلي أغراضي !

البنت إنسانة و بتتعب لما ترتب أغراضها حتى ، فما بالكم لما ترتب أغراضها و أغراض غيرها و هي بالأصل مش مجبورة فيهم ، و هذا عن طيب نفس منها مش بالإجبار أو الإكراه طبعآ ، و الصحيح إنه ما حدا بطلعله يجبر البنت على إنها تشتغل ورا أخوها !! لا حدا يكابر و يحكي هذا واجبها أو تضحكوا عليها و تحكوا عادي بتتسلى بشغل البيت و بتتنشط !! لإنه لو كان شغل البيت جد مسلي و منشط معناها خلوا الشباب تتسلى كمان !!!

حتى و لو كانت بيئتك كلها بتدوس عالأنثى مش بالضرورة إنك تدوسها مثل بيئتك . و حتى ولو كانت البنت هي يلي دايمآ بالبيت بس مش يعني ذلك إنها تشتغل ورا أخوها ؛ لإنها الخدامة يلي هي خدامة بنهاية الشهر بتاخذ أجرتها عالية على قد مهو شغل البيت مرهق ! فما بالك بأختك يلي هي أختك مش خدامة لازم يكون واجبك كبير تجاهها كونها بتنظف وراك أول بأول و هي مش مجبورة نهائي .

إسأل نفسك كم إنك تعبت بحياتك لأجلها و كم هي تعبت بحياتها لأجلك ، و شوف النتيجة. و طبعآ أنا ما بلوم إلا الأمهات يلي بيقدرن يخلن أطفالهن سواء بنات أو اولاد يشتغلوا بشغل البيت ومع ذلك بعتبرن شغل البيت حكر على البنت أما الولد بكون ملتهي بألعابه ! بالرغم من إنها الأم قادرة على تشكيل طفلها و طفلتها و تحسيسهم بالمسؤولية من الصغر . بس في أمهات بعملن جاراتهن و معارفهن هم القدوة حتى لو كانوا غلط ! مع إنه هذا هو الغلط بعينه إتباع الأعراف الخاطئة و الظالمة .


و الأكبر من ذلك ممكن الشب الاتكالي وقت الزواج يبحث عن موظفةتساعده بالإنفاق و يعتبره واجبها تساعده ! و يعطي لنفسه مبررات بغلاء المعيشة بالرغم من إنه احتمال يكون مدخن و بتمصرف ! أما هو بترك زوجته الموظفة المسكينةتشتغل شغل البيت لحالها بدون مايكون عنده ضمير أو مروءة ليساعدها متل ما هي ساعدته بواجبه الرئيسي يلي هو الإنفاق ؟! إنتوا مش أفضل من سيد الخلق قدوتنا الحقيقية رسولنا الأعظم محمد علية الصلاة والسلام .

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا