حرية سقفها السماء

وكالة سرايا الإخبارية

إبحــث في ســــرايا
الخميس ,25 أبريل, 2019 م
طباعة
  • المشاهدات: 22035

اريد حلا مع زوجي

اريد حلا مع زوجي

اريد حلا مع زوجي

06-02-2019 08:59 AM

تعديل حجم الخط:

سرايا -

قبل هيك حكيتلكم عن جوزي انه بيساعد اخو وبعطي مصاري وبحرمني انا واولاده
وردكم كان اني اصبر وانه الي ما اله خير في اهله ما اله خير في ناس
طيب هلا انا سكتت وما عملت اي مشاكل
مرت اخو توظفت ووضعهم صار ممتاز
وهلا بلش يساعد بنت بنت خالتو ويبعث مصاري
مع العلم في كثير شغلات ناقصه البيت وتجوزته لاني بحبه وما همني المصاري
يعني اصبر معه وقت التقشف ولما ربنا يرزقه يروح يصرف على غيري
دلوني رجاءا شو اساوي اطلق وارجع عند اهلي ولا ارجع اصبر "


لتحميل تطبيق "شرق" : اضغط هنا






طباعة
  • المشاهدات: 22035
 
1 -
ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.
06-02-2019 08:59 AM

سرايا

2 -
من واجب الزوج ان يعيل اهل بيته اولا

و من احب الصدقات الي الله ان يقوم الزوج بمصروف البيت على اهل بيته

الله يعينك البيت اولا و اذا زاد معه مصاري يساعد غيره
اما يحرب اهل بيته ما بجوز
06-02-2019 09:50 AM

مهتم

التبليغ عن إساءة
3 -
شوفي انا بتهيألي إنه وضعكم المادي كويس كتير .

و لما صار يعطي لأخوه إنت صرتي تحسي بالنقص لإنك انت البخيلة والله العليم .

و لما شفتيه يعطي لبنت بنت خالته صرتي تتذكري حاجياتك الكمالية و صار الشيطان يلعب بعقلك و تحكي انا اولى منها .

حلوة المساعدة أختي حلوة .

بس المهم إنه ما يكون بخيل عمرته و اولاده و يبدي الآخرين عليهم .
06-02-2019 11:28 AM

بائعة الورد

التبليغ عن إساءة
4 -
انتي ما بتعرفي سبب مساعدته لقرابته يلي بتحكي عنها ..بلكي وضعها المادي مش منيح وبحاجة المساعده...انا برأيي احكي معه وشوفي حل بدون ما تفكري بالطلاق.
06-02-2019 02:17 PM

امونه

التبليغ عن إساءة
5 -
إسمع أعطيك نصيحتي يا صاحب المشكلة يلي بتحكي إنك بتبحث عن جامعية و انت توجيهي . و بتقول إنهن كل الجامعيات رفضنك لإنك توجيهي .و نصيحتي لكل شب مش جامعي و ببحث عن جامعية !!! بحكيلك من الآخر لا تغلب حالك و لا عبالك لإنهن ما رح يرضن فيك و هن مكافحات بحياتهن العلمية و دارسات أربع سنين جامعة و انت لأ ! من الآخر بحكيلكياها و هذا الواقع بالذات بالأيام هاي . و بالنهاية الجامعية و يلي مش جامعية واحد والله العظيم . بالرغم من إنها بنتي دارسة بكالوريوس تاريخ و دايمآ بتقول أنا لو أعنس ما برضى إلا بواحد دارس ماجستير ، و هي يلي حبت تدرس و عندها طموح مش أنا يلي اجبرتها عالتعليم . بس الشهادة ما عمرها كانت مقياس و والله وقت ما تصير مشاكل بينك و بين زوجتك صدقني إنها ما رح تتذكر إنها جامعية و تبطل مشاكل ! او إنك تفكر إنها لإنها جامعية يعني إنك تربط حسن تصرفها أو كيفية تعاملها مع المشاكل لإنها درست جامعة !!!! مهو الإنترنت و مواقع التواصل الاجتماعي خلت الأميين يلي ما بعرفوا يقرأوا و يكتبوا يعرفوا كلشي عن الحياة الاجتماعية من كثر ما إنهم بتواصلوا مع الناس ، مش شرط يكونوا درسوا جامعة. بالعكس لو بدنا نوخذك على قد عقلك رح نحكي إنها بما إنها جامعية فمعناها إنت رح تتغلب معها كونها رح تكون قد حالها و ما رح تسكتلك أو تتغاضى عنك لإنها بتكون واعية و عارفة حقوقها و أكتر من واجباتها !هيك انت برأيك الجامعية صح ؟ شو دخل المعرفة بالحياة الاجتماعية بالشهادة العلمية ؟؟!!! والله كل واحد فيكم انت و زوجتك بحياتكم مع بعض ؛ وقت المشاكل بتلاقي كل واحد فيكم بعصب و بشد على حاله من جهة و ببين على حقيقته كيف هو بتعامل مع المشاكل بغض النظر لوين وصلت دراسته حتى و لو دكتوراه ، و بالعكس ممكن بهاي الساعة شهادتها تضرك لو هي كانت معها شهادة و معهاش عقل و تشوف حالها عليك بدون سبب ! بس لإنها جامعية يتهيألها إنها بتعرف بالحياة أكتر منك بالرغم من إنك انت يمكن تكون أوعى و أعرف منها و انت توجيهي صح ولا لأ ؟ أنا متأكد إنك هسا بينك و بين نفسك رح ترحم حالك و تحكي بحالك آه فعلآ الدارس و يلي مش دارس واحد و إنه ممكن يلي مش دارس يكون أوعى من واحد دارس!! بس هالشي رح يدل على إنك أناني ؛ لإنه الدراسة و عدمها بتنطبق على البنات كمان مش بس على الشباب ، يعني كمان لازم تعرف إنها برضو ممكن وحدة مش دارسة بتفهم أكتر من دارسة .

أنا بعرف واحد بشتغل بالأمن و ناجح توجيهي و عنده بيت و سيارة و ما بدخن و بصلي و ملتزم و ما شالله عليه شكله وسيم يعني مش ناقصه شي نوعآ ما ، إلا إنه مش دارس جامعة.

بس انتحر انتحر و هو ببحث عن جامعية لو شو ما كان تخصصها بس المهم جامعية و صار فايت تقريبآ على اكتر من ١٠٠ بيت جامعية و طالب من كل الناس يبحثوله عن جامعية و الرد كان دايمآ ليش انت ما درست جامعة و بدك جامعية ؟ و يحكي نفس كلامك يا صاحب الموضوع ، كان يحكي : أنا بدياها جامعية لحتى تقدر تدرس اولادها !!!!!! و طبعآ هي و أهلها يتمسخروا و يقولوا : حلوة هاي إنه يكون رب الدار و عمودها مش متعلم ! أما زوجته و اولاده يكونوا متعلمين !!!؟؟؟!!! و عنجد مش من المنطق نحكي إنها الجامعية بتقدر تدرس اولادها و يلي مش جامعية ما بتقدر تدرس اولادها !!!!! عفوآ شو هالغباء ؟!؟؟! حسستني إنها الجامعية بتكون درست كل التخصصات و كل المواد العلمية بهالأربع سنين جامعة !!!! و حسستني إنه الزلمة ما إله علاقة بتعليم اولاده و كل العبئ بتعليم الاولاد على الزوجة المسكينة لحالها !!! و حسستني إنه ما في شي إسمه دروس خصوصي أو حتى مدارس!!! أي والله لو زوجتك أمية ما بتعرف تقرا و تكتب بالمرة عادي روح ودي إبنك على وحده تدرسه كل المواد من الجلدة للجلدة و بتدفع عليه ٢٠ دينار و هي مدرسيته الفصل كامل ، متل كل هالناس بتعمل و خلصت فكت ! حتى والله بعرف معلمات بعطن دروس خصوصي للأطفال و هن راسبات بالتوجيهي والله العظيم بس بكونن توجيهي علمي مش أدبي أو شي تاني يلي عنجد بكونن شاطرات طول عمرهن بأيام المدرسة و فعليآ هي هاي المرحلة من عمر الشخص يلي بتحدد إنه بقدر يتابع أولاده بدراستهم أو ما بقدر ، يلي بكون طول عمره شاطر بأيام مدرسته ، مش يلي بدرس أربع سنين جامعة تامنه يقدر يدرس اولاده! أصلآ بالعكس يلي دارسين جامعة بتكون كل معرفتهم بمادة وحدة و ناسيين باقي المواد يلي تعلموها بأيام المدرسة لما إنهم صاروا جامعة ، لهيك البنت يلي توجيهي بتقدر تدرس اولادك أكتر من بنت جامعية ، و انت عارف هالشي لا تضحك علينا بس احكي إنك طمعان براتبها مستقبلآ لهيك بدكياها جامعية ! بس انت حسستني إنهم الأساتذة و المعلمات ما إلهم دور بتعليم الطلاب بالمرة حسستني إنهم بظلوا قاعدين على مكاتبهم و ما بتعبوا و هم بحشوا المعلومات بدماغ الطالب !! أنا أستاذ مدرسة و عارف شغلي و عارف الطلاب ، ليش لعاد انوجدت المدارس ؟! ما دام إنك بتقول بدي جامعية لحتى تعلم اولادها ؟كمان كل الأساتذة معي بحكوا على العسكري يلي مش فالح بدراسته لما يحط كل جهوده بالبحث عن جامعية بدل ما يكون حط كل جهوده على دراسته ، عادي شو فيها لو إنك تزوجتها توجيهي راسب ؟ الموضوع أبسط مما بتتخيل بس انت معقد الأمور و باذل جهد و انت بتبحث عن جامعية . والله حسستنا إنهم الطلاب مقطعين حالهم عالتعليم !! أصلآ المفروض تخلي إبنك المستقبلي يعتمد على نفسه بالدراسة ما يعتمد على حدا لازم تحسسه بالمسؤولية من الصغر ، لحتى عفوآ ما يطلع متلك ! مع احترامي و بدون زعل بس كلامي صحيح و واقعي والله . أنا دارس جامعة و زوجتي دارسة جامعة و أمها ما بتعرف تكتب ولا تقرأ إلا كلمة خديجة يلي هي إسمها ! و أمي درست للصف الرابع و قعدت ، شو رأيك ؟ و شو ردة فعلك عهالكلام ؟ و مع ذلك هينا درسنا أنا إنجليزي و زوجتي علم نفس ؛ لإنا احنا كان عنا طموح ندرس مش لإنه كنا بدنا حدا يوجهنا أو يدرسنا أو نتكل على أمهاتنا بتعليمنا .. هينا صرنا و تعلمنا بالرغم من إنهم أبائنا كان تعليمهم أكبر من امهاتنا ، تامنك تعمل التعليم حكر عالمراة وحدها و تعفي حالك من التعليم . عفوآ أي عقل هذا يلي عليك تامنك تقول بدي دارسة لحتى تعلم اولادي ؟؟؟ !!!!

بلله هسا انت عرفت ليش الجامعيات شافن حالهن على موظف الأمن يلي واصل للتوجيهي بس ؟! يلي قبل شويي أنا كتبت عنه بالسطور السابقة ؟؟! بل حتى في ناس ما رضيوا يستقبلوه ببيتهم لما إنه تقدم لبنتهم الجامعية ، أو عادي بكل بساطة تعاملوا معه بدون احترام و لا حسبوله حساب و حتى نظرتهم لإله مسخرة والله العظيم ، كونه جايي على بنتهم و هو مش متعلم و هو بدوياها متعلمة عينك عينك . يلي المفروض العكس تكون دراسته أعلى من دراسة زوجته .

صارت سيرته على كل لسان على قد ما ذل حاله و تنازل للبنات الجامعيات هو و أهله حتى أمه شويي و بدها تبوس العروس الجامعية على جبينها لحتى توافق على إبنها العنيد و شو بتسوالهم هالمذلة بلله و البهدلة ؟ يلي حضرته بتعب أمه و خواته بجوازته و بتدلل على و لاشي والله حتى أهله بكشوا منه و من طلباته التعجيزية ، بغلب أهله و خواته ليش ؟ طبعآ و آخر شي بعد عناء طويل لقى بنت جامعية ناصحة ناصحة بكل مناطق جسمها بشكل بشع حاشاك ، و هو من هبله وافق عليها لإنها جامعية و هو استعجل بالزواج انبسط إنها جامعية قبلت فيه و هو من بساطته و تفكيره المحدود صار يتباها بين اصحابه إنها مرته جامعية و كإنها الدراسة أربع سنين جامعة بتعمل من العاها سليم هههههه يسعدلي أفكارك و نظرتك عمو ، مع إنه لو عنده رجولة كان بدل ما يتباهى بزوجته إنه المفروض يستحي بحاله لإنه مش دارس و زوجته دارسة ، يلي المفروض كمان تكون دراسته أعلى من دراسة زوجته هيك المنطق و الأصل ، و لو دراسته أعلى من زوجته هو المفروض ما يتعالى عليها لإنه الأصل بالمرأة مكانها ببيتها و ييجيها كلشي جاهز بس الظاهر إنه البعض بده يقلب الموازين و يبدل الأدوار . المهم بعد اسبوعين تم الزواج و بأفخم الصالات و آخر شي من كثر ما صاحباتها لزوجته الجامعية نظرن إلها نظرة شفقة و إنها لولا ما فيها عيب كان ما وافقت عواحد مش دارس و اهلها ظلوا يعايروها متل صاحباتها ، هي ولعت معها و ارتفع ضغطها و والله إنها صادقة و معها حق لإنها وافقت على واحد أناني برحم نفسه و بعفي حاله من التعليم و بالنهاية ببحث عن وحدة متعلمة جاهزة و مش مستعد يتزوجها أثناء مهي بتدرس بالجامعة لحتى ما يدفع أقساطها عن أبوها و آخر شي حضراتهم الشباب بتضايقوا من آباء البنات الجامعيات لما يطلبوا مهر عالي لبنتهم الجامعية مع إنها بتستحق !!!

و بالحقيقة هذا الشرطي يلي تزوج هالجامعية لما كان يصير خلافات زوجية بينها و بينه هي تلقائيآ وقت المشاكل بتصير تتذكر إنها وافقت عليه و هو مش متعلم يعني كيف إله عين إنه يرفع صوته عليها او يعمل معها مشاكل ؟ صارت تكرهه لإنها تنازلت لإله و وافقت عليه ، يعني فوق مهي كانت مترددة توافق عليه او لأ ، و فوق هيك بتمشكل معها ؟ أصلآ المفروض يستحي عحاله و يقدر هالشي إنها قبلت فيه وحدة جامعية ، المشكلة إنها هيك هي نظرة كل الناس ، و كرهت حياتها معه بهالأسبوعين تامنها آخر شي طلبت الطلاق لإنها بدها واحد جامعي و قالت مستعدة أفضل العنوسة او الطلاق و اعيش عند اهلي معززة مكرمة و لا أعيش عند واحد جاهل بالحياة و مش متعلم ،و نكدي و ما برضى يحط حاله مكاني ، و أصرت على الطلاق و تطلقوا . يعني بما إنها البنت من البداية كانت مترددة بالزواج منه فما لازم ضغطوا عليها بالإقناع من الزواج ؛ لإنها رح توافق بدون رضا نفسي عليه . والله الوحدة تعنس ولا تتزوج واحد مش رضيانة نفسيآ عليه .

و هو خسر كثير مخاسر يعني من بعد ما إنه عمل حفلة فخمة و معازيم و دنيا و عالم و تعب و هو ببحث عنها تامنه آخر شي بعد اسبوعين صار إسمه مطلق و صار مسخرة لمعارفه لإنه حب يتعالى عن طريق زوجته مع إنه المفروض العكس يعني إنها الزوجة هي يلي لازم تتعالى عن طريق زوجها و هو يلي لازم دراسته تكون أعلى ، و صار الشاطر يلي بده يعطيه نصايح لهالمسكين ، و زاد الطين بلة يعني ما في أي وحدة عزابية حتى توافق عليه بحجة إنه صار إسمه مطلق حتى يلي مش دارسات !! تامنه لما إنه تطلق راح أخذ وحدة مطلقة و دارسة للاول ثانوي .

بس سبحان الواحد الاحد ، مبسوط معها كثييييير و صار عندهم بنت و ولد و حياتهم كلها رومنسية مثل العشاق والله العظيم ، و الكل بحسدهم عهالهنا و الحب يلي بيناتهم و دايمآ مبسوطين ما شالله عليهم . و لغاية الآن هو بقول أنا وين كاين عقلي تامني ما بحثت عنك انت وين كاينة متخبية ؟

بالرغم من إنها مطلقة و معها بنت كمان و هو مطلق و ما عنده اولاد و زوجته الجديدة راسبة بالاول ثانوي بس سبحان الله ربنا مغير الاحوال .

هذا قصته هالشب صارت سيرة على كل لسان بالمفرق كلها .

يلي كان مفكر إنها حياته رح تكون مستقيمة مع الجامعية العزابية و ما كان متوقع إنها حياته تكون كلها سعادة و هنا مع وحدة مطلقة عندها بنت و راسبة بالأول ثانوي . و فعلآ طلع الموضوع على حسب أصل البنت و طبعها و تربيتها و طريقة تفكيرها و وعيها بالحياة الاجتماعية و مرحها و شكلها ... و الشغلة مش على شهادتها . و والله إنها شهادة الأنثى عمرها ما كانت مقياس للحظ الجميل و ياما تطلقوا متل هالشب لإنهم كان شرطهم تكون جامعية ونسيوا الأشياء الرئيسية يلي لازم العروس تتمتع فيها . بالرغم من إني أنا بحترم البنت الجامعية والله العظيم ، و يكفي إنها كافحت بحياتها باربع سنين و تعبت و هلكت و سهرت الليالي عالامتحانات و الروحة بالشتوية عالجامعة و بالصيف الحار و تقلب المناخات .. يعني كلنا بنعرف تعب الجامعة كم هو كبير ..و يعطيهن العافية يا رب . فوالله لما الواحد ييجي يفكر فيها إنها لما الجامعية ترفض واحد مش جامعي إنه والله هذا حقها إنها تحكي ليش يعني أنا اتعب اربع سنين جامعة لحتى يتناولني عالجاهز المستريح واحد مش مكمل دراسته ؟؟!؟! و أولياء الأمور كمان معهم حق يقولوا إنه مهر الجامعية غالي . بكفي إنه دفع عليها مصروف كتير أيام الجامعة فهذا حقها والله العظيم حقها .

فلا تغلب حالك يا صاحب المشكلة و تبحث عن شروط تافهة ما بتدل على صلاح الزوجة من عدمها بالمرة . و هاي الشروط يلي بعض الشباب الجهال بحطوها بالعروس ما بتدل ابدآ على السعادة الزوجية مستقبلآ .

لا تحكي اصحابي أخذوا متعلمات و انت بدك تعمل مثلهم لإنهم حتى اصحابك كل واحد مستقل عن الثاني يعني لو بدنا نظل نقارن زوجاتنا بفلانة و علنتانة او زوجات اصحابنا والله عمرنا ما بنعيش ؛ لإنك لو أخذتها جامعية يمكن تشوف زوجة صاحبك أحلا من زوجتك و ترجع تقارن و لو اخذتها حلوة يمكن تشوف إنه أخوك تزوج وحدة مرحة و زوجتك نكدية ، فما لازم إنا نقارن زوجاتنا بزوجات أصحابنا ؛ لإنا هيك بتكون عيوننا فارغة و عنجد ما عمرنا بنعيش .

كل واحد يتزوج على شاكلته و الواحد ما بعرف عن مشاكل الناس و شو هي السعادة الحقة و يمكن تكون زوجة صاحبك نكدية أو عندها علل مش مبينة قدامك و انت شايف الظاهر . يعني إرضى بنصيبك لإنه انت ما بتعرف وين هي سعادتك . و مين هي الزوجة يلي رح ينبسط معها . يعني لو إنك قلت بدي وحدة طبعها يتناسب مع طبعي او وحدة حلوة و فرفوشة او وحدة ملتزمة عادي والله الناس بتسعى معك و بتحس فيك و بتعرف رجاحة عقلك أما تقول بدي جامعية و انا توجيهي منت بتصير مسخرة للجميع والله و حتى ولو إنك أخذت جامعية هي اكيد رح تكون حاكميتك بالبيت و شايفة حالها عليك و ذاليتك و ممكن تكون ثقافتها و وعيها مش بزيادة بس إنها إسمها دارسة لهيك صابها الغرور هيك كتير بتصير والله ، او إنه بكون عندها نقص ، و الناس فاهمة لبعضها و عارفة إنها البيوت أسرار بس كمان بشكل عام عارفة بعض الأسرار ، و إنها الجامعية لما توافق على واحد مش جامعي إنه بكون عندها نقص يلي خلاها ترضى بهالنصيب مع واحد أناني مش متعلم و ببحث عن شهادتها يعني ممكن تكون مش حلوة بالمرة أو تكون أخلاقها مش حلوة او تكون عانس وصلت للخمسة وتلاتين من عمرها أو إنها تكون أمها قوية كتير و الناس بتبعد عنها أو أبوها هامل أو اخوها أزعر و خريج حبوس ... هاي بعض الظروف يلي بتخلي البنت تتنازل و ترضى بواحد مش جامعي . حتى إنت بنظر الناس إنك هيك بتكون طماع بفلوسها بالمستقبل لما إنها تتوظف ، حتى ولو إنها زوجتك الجامعية ما فيها عيوب .

موضوعك يا صاحب المشكلة شدني و استفزني بذات الوقت ، و بصراحة خلاني أكتب و إيدي بدها تنكسر بس معلش المهم تعرف الواقع يلي انت عايش فيه . و دلالة على ذلك بتغلب حالك و بتفوت على أكثر من عشر بيوت بنات جامعيات و هن بكل بساطة بشوفن حالهن عليك بالرغم من إنك ممكن تكون ثقافتك بالحياة أعلى من بعضهن يلي ما بستحقن ينقال عنهن فهمانات . بس هيك الواقع و هيك هي نظرة المجتمع للشب يلي مش جامعي و انت شايف و كلنا شايفين . أنا مش مع أو ضد دراسة الجامعة من عدمها سواء للبنت أو للشب ، بس أنا مثل كل الناس ما برضى عحالي أرمي بنتي الجامعية لواحد اناني مش دارس و ببحث عن دارسة لحتى إنها تعوض النقص يلي عنده و هو بحس فيه ، و كل واحد تلقائيآ رح يحكي للشب الأناني يلي بقارن زواجه بزواج اصحابه إنهم اخذوا جامعيات : بنتي شو ذنبها لحتى تحس بالنقص و كل صاحباتها تزوجن دارسين

؟! مهو هيك الواحد لازم يحسبها مش بس لصالح الشب ، بالرغم من إنا حكينا المقارنات مش كويسة بس لو بدنا نوخذهم على عقلهم رح نحكي متلهم .

وبالنهاية بحكيلك يا صاحب الموضوع :

بعينك ألله يا عمو ..

و ان شالله تلاقي بنت الحلال يلي تسعدك و تنفعك و تعينك على طاعة ربنا سواء جامعية أو مش جامعية يا رب .

بعتذر عالإطالة



06-02-2019 06:12 PM

ردآ على مشكلة سابقة

التبليغ عن إساءة
6 -
انا اايد بائعة الورد القصة انك صار عندك غيرة انو بيصرف عناس غيرك
وما في رجل بالدنيا بيعطي الغير وبخلي اهل بيتو محتاجين . ولو هو مو شايف انهم بحاجة كان ما اعطاهم
وصلة الارحام ما في بعدها وشكلك بدك تقطعيها
06-02-2019 08:37 PM

عاشق

التبليغ عن إساءة
7 -
تعليق ٤ كتييييييييييييير كتيييييييييير كتيييييير حلو و بجنن و تسلم إيدين يلي كتبه . والله صادق بكل كلمة حكاها . و هذا الشي يلي نفسي أنا احكيه من زمان لكل واحد مش جامعي و ببحث عن جامعية و بتحجج إنها عشان تدرس اولاده .
07-02-2019 07:18 AM

إلى تعليق ٤ الرائع

التبليغ عن إساءة
8 -
فعلآ و أنا كمان مع تعليق ٤

بالرغم من إنه الكلام كتير بس قرأته كامل أنا و زوجتي و صرنا نضحك والله العظيم إنه عنجد منطقي بكل كلمة ذكرها صاحب تعليق ٤ .
08-02-2019 07:08 AM

أبو أيهم

التبليغ عن إساءة
الاسم : *
البريد الالكتروني :
التعليق : *
رمز التحقق : تحديث الرمز
أكتب الرمز :

الأكثر مشاهدة خلال اليوم

إقرأ أيـضـاَ

أخبار فنية

رياضـة

منوعات من العالم