بقلم : د. شفيق ربابعة

بحب الأردن الغالي = وعشقه دوما عبالي

وبقلبي حبه مزروعْ = وفيه تتحققْ آمالي

أعشقْ أرضه وترابه = وزيتونه والدوالي

وغاباته وربى دبين = واللي فوق التلال

نسماته بترد الروح = تشفي العِللْ طواّلي

بالتآخي عيشتنا = وشعبه الطيّب يحلالي

بحبُه جدّي أوصاني = واسمه دوما بالعالي

ربي يحميه ويرعاه = ويبقى وطنّا المثالي

ويديم الألفه بربوعه = والعيشه بالدلال

بحبْ جباله وسهوله = والهوا ينسّم شمالي

حبيته من غرب وشرق = وما بعد الربع الخالي

وآثاره ومحمياته = والغور الأخضر بلالي

والعقبه ثغره الباسم = والبترا فيها موّالي

اربد موطن أجدادي = وبرقش ملْكت خيالي

بَحِبْ الأردن يا إخوان = على قلبي غالي غالي

_

مع انّي والله بعاني = وما حدا داري بحالي

أغلب ناسه باشاوات = أو أصحاب المعالي

الله أعلم بالبصير = شُفْتْ كثير ومش سالي

دَيْن الأردن أضناني = وما بعرف شو جرى لي

لولا فساد الأحوال = ما ساءت أبدا حالي

مهما شمس اليوم تطول = يتبع سود الليالي

بحب الأردن ليل نهار = والظلمه أمست فالي

رح يبقى الأردن غالي = وحبه دوما عبالي

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا