«يا ريتني حاولت» .. طالبة تدرس الصيدلة بعد تعذّر قبولها بالطب: أعيد التوجيهي أم أتقبل الواقع؟

منذ 24 دقيقة
المشاهدات : 11202
«يا ريتني حاولت» ..  طالبة تدرس الصيدلة بعد تعذّر قبولها بالطب: أعيد التوجيهي أم أتقبل الواقع؟
سرايا - أنا مواليد 2007، وقدّمت مع دفعة 2008 لأني بدي تخصص معين ، وكان بإمكاني أدخل صيدلة أو حتى هندسة، بحكم معدلي، لكن أنا ما كان ببالي إلا الطب. مش لأن الطب بالنسبة إلي لقب أو كلمة «دكتورة» أو لأنه تخصص واو، بالعكس، أنا بشوف إنه الطب والصيدلة والهندسة وكل تخصص بالدنيا إله قيمته ومكانته، وما في تخصص أقل من الثاني. لكن الطب تحديدًا كان حلم طفولتي، التخصص اللي كنت أتمنى أدرسه من قلبي.

اجتهدت وقدّمت مع دفعة 2008، وجبت معدل فوق الـ95، لكن للأسف ما كان إلي نصيب بالقبول في الطب، وطلع لي تخصص الصيدلة في جامعة العلوم والتكنولوجيا.

واليوم أنا بدرس صيدلة، لكن الحقيقة إني لسا مش قادرة أتقبل فكرة إني ما دخلت التخصص اللي حلمت فيه طول عمري. وكل ما أشوف كلية الطب بقعد أبكي بحرقة، كأنه في سكاكين بتقطع بقلبي. مش قادرة أوصف قديش هالموضوع موجعني، وقديش صعب عليّ أشوف حلمي قدامي كل يوم وأنا مش قادرة أكون جزء منه.

وهون أنا فعلًا محتارة، إني أعيد وأقدّم الفصل الجاي توجيهي و اترك فصل جامعه .هل بتنصحوني أعيد المحاولة، وأعطي حالي فرصة أحقق حلمي وأدخل طب أو طب أسنان، يمكن يكون أقرب للتخصص اللي طول عمري بتمناه؟ ولا أعتبر إنه اللي صار صار، وأكمل بالصيدلة، وأعطي تخصصي الحالي فرصة، رغم إني لحد الآن مش حابّته؟

أنا مشكلتي مش إني شايفة الصيدلة تخصص أقل، أبدًا، مشكلتي إني دخلت تخصص غير اللي كنت بحلم فيه، ولسا مش قادرة أتجاوز هالشي.

بدي نصيحتكم من القلب، خصوصًا من الناس اللي مرّوا بتجربة مشابهة: هل الواحد لازم يحاول مرة أخيرة عشان ما يضل طول عمره يسأل «يا ريتني حاولت»؟ ولا أحيانًا لازم نتقبل الطريق اللي ما اخترناه ونتعلم نحبه؟
شارك المقال:

التعليقات

لن ينشر أي تعليق يتضمن اسماء اية شخصية او يتناول اثارة للنعرات الطائفية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار وكالة أنباء سرايا الإخبارية - حرية سقفها السماء علما ان التعليقات تعبر عن راي اصحابها فقط.
رمز التحقق :
أكتب الرمز :

الأكثر قراءة

آخر الأخبار

أخبار فنية

أخبار رياضية

منوعات من العالم