الدكتور محمد الهواوشة يكتب: قدم السبت عشان تلاقي الأحد

عنا بالأردن في شغلة صراحة لازم نحكي عنها

بعض الناس قبل ما يستلموا منصب بتلاقيهم قريبين من الناس وبردوا على التلفون وبردوا على الرسائل وبتفاعلوا مع الناس على مواقع التواصل وبتقدر تحكي معهم بكل بساطة

بس أول ما يستلم الواحد فيهم منصب فجأة بتتغير الأمور

بصير الوصول إله قصة والرد على رسالة بده واسطة والتلفون ما عليه رد وحتى تعليق أو تفاعل بسيط على مواقع التواصل بصير كأنه كثير عليه

وبتحس إنه أول ما قعد على الكرسي صار شايف حاله فوق الناس وكأنه المنصب رح يضل معه طول العمر

يا جماعة الخير المنصب ما بدوم

اليوم إنت وزير أو نائب أو أمين عام أو محافظ أو مسؤول كبير وبكرا بصير اسمك السابق

المكتب يروح والسيارة تروح واللقب يروح والناس اللي كانت واقفة على بابك بتروح

بس معاملتك للناس هي اللي بتضل

والغريب إنه بعد ما يتقاعد بعض المسؤولين بتتغير القصة تماما

اللي كان ما يرد على رسالة بصير يبعث رسائل

واللي كان ما عنده وقت يحكي مع الناس بصير عنده وقت

واللي كان الوصول إله صعب بصير هو يدور على الناس والمناسبات والعزائم وبده الكل يسأل عنه ويتواصل معه ويقدره

طيب وين كنت لما كنت بالمنصب !!!!

ليش ما كنت قريب من الناس وقت ما كان بإيدك تساعدهم وتسمعهم وتوقف معهم !!

وعشان هيك أجدادنا ما حكوا من فراغ

قدم السبت عشان تلاقي الأحد !

احترم الناس اليوم عشان يحترموك بكرا

رد عليهم اليوم عشان يردوا عليك بكرا

وقف معهم وإنت بالمنصب عشان يوقفوا معك لما يصير المنصب مجرد ذكرى

المسؤول المحترم مش اللي الناس تخاف تحكي معه

ولا اللي بده عشر واسطات عشان تقدر توصله

ولا اللي مفكر إنه عدم الرد على الناس هيبة

المسؤول الحقيقي هو اللي كل ما كبر منصبه زاد تواضعه وقربه من الناس

وأنا هون ما بحكي عن شخص معين ولا عن حكومة معينة

أنا بحكي عن ثقافة موجودة ولازم تتغير

المنصب بالأصل خدمة للناس مش حاجز بينك وبينهم

والكرسي ما برفع قيمة الإنسان إذا أخلاقه ما رفعته

وفي النهاية كل واحد قاعد على كرسي اليوم رح يقوم عنه بيوم من الأيام

وساعتها ما رح يضل معك لقبك ولا مكتبك ولا صلاحياتك

رح تضل إنت ومعاملتك وسيرتك بين الناس

وهون السؤال الحقيقي

لما يروح المنصب كم واحد رح يرد على تلفونك لأنه بحبك ويحترمك مش لأنه محتاج منك شي !!!

فيا كل مسؤول اليوم لا تستنى التقاعد عشان تتذكر الناس

احكي معهم اليوم

اسمعهم اليوم

رد عليهم اليوم

تواضع معهم اليوم

وقدم السبت عشان تلاقي الأحد

لأنه لو دامت لغيرك ما وصلت الك

بس الموقف الطيب والسيرة الطيبة بضلوا

 

 

 

 

 

• احمد محمد علي يكتب: (الغزل القاسي) .. نتن ياهو .. يُغلق عمل القنصلية البريطانية في القدس المحتلة ويطرد موظفيها
• محيلان يكتب: كأس الخليج .. وكأس بلاد الشام!
• البراج يكتب: تأملات ووقفات في خطاب جلالة الملك عبدالله الثاني ابن الحسين المعظم أمام الجمعية العامة للأمم المتحدة في نيويورك
• الدلايكة يكتب: احذر وانبه نفسي اولا وإياكم ثانيا ..