بقلم : عبدالله عويضة
في كل ظرف بتمر فيه البلد، دايماً في صوتين.. صوت هادي واعي بحب الأردن وبدور على مصلحته وصوت ثاني مشغول بالتحليل الزايد ونشر الأخبار ومين بده يطلع ترند ومين بده يصير مشهور بدون دقة وسباق رالي مين يسبق ومين يحكي أكثر.

النصيحة الصادقة اليوم إنه نرفع مستوى الوعي ونخفف من الاستعراضات والشوووو، مش كل خبر لازم ينتشر ومش كل حكي لازم ينحكى، في أوقات بكون الصمت وترك الأمور لأهلها ولأصحاب الخبرة هو الصح لأنه في ناس مسؤولة وبتعرف شو بتعمل وكيف تدير الموقف.

الأردن بلد قائم على مؤسسات قوية، وقائده الملك عبدالله الثاني يحمل أمانة كبيرة ويعرف كيف يحمي البلد ويوجهه وجيشه العربي المصطفوي هو درع الوطن اللي ما بتتزعزع ثقته، وأجهزته الأمنية ساهرة ليل نهار حتى يضل هذا البلد آمن ومستقر وهذا كله ما بكمل إلا بشعب واعي ما بنجرف ورا الإشاعات ولا السوالف الفاضية.

اللي بصير على السوشال ميديا من سباقات وتحليلات واستعراضات واشاعات وآراء بدون معلومات دقيقة، هذا ما بخدم البلد ولا بضيف إشي، بالعكس ممكن يخلق بلبلة ويعطي صورة غلط والأردن أكبر من هيك بكثير.

خلونا نكون على قدر المسؤولية ونحكي الكلمة الطيبة وننشر الاشي اللي فيه فائدة ونترك التحليل ونتأكد من صحة المعلومة ونتابع الاخبار من الجهات الرسمية المختصة في هذه الامور ونكون سند لبعض مش عبء على بعض.

اللهم احفظ الأردن واحفظ قائد الأردن ووفقه لما فيه خير الوطن، واحفظ جيشنا العربي المصطفوي وأجهزتنا الأمنية بعينك التي لا تنام وادم على بلدنا نعمة الأمن والاستقرار واجعل هذا الوطن عزيزاً قوياً بأهله وقيادته.