بقلم : يوسف ابو شعيب
لِمْلَبَّس في النّملية...

وستي فوق العلية...

وسيدي بمفتاحه النكليزي...

بِحزِق بالحنَفية...

حوش كبير ...

وقلبه أوسع ...

مَدّد حالك ...

وتربع...

ومالك قومة غير تسمع ...

باقي هالخرّافية....

سيدي بحكي عن الجيوش...

اللي باعتنا للوحوش ...

وبِخَرخش صُرة القروش...

وبوعد ستّي بِطَبليّة....

وستّي بتنسّل بالثوب ...

وبتسلق حَبّة عَكوب...

ما بتعرف كلمة يا دوب...

ولقمتها بتطعم ميّه ....

سيدي إتْرَكى على العكاز...

وستّي بتملا اللمظة كاز...

وبتحَزر سيدي الألغاز.

وسيدي هَرش الطاقية....

وفي ساعة خَيم هالليل...

وأقبل عليهم بالويل...

قليل ...

كثير ...

انهد الحيل ...

وسيدي سَن الشِبْرية....

وستّي وقفت حَد الباب...

بتستنى يعودوا الغياب....

يعودوا ...

بالذيب الكّذاب ...

مْلفْلف بالبطَانية...

لِمْلَبَّس في النّملية...

وستي فوق العلية...

وسيدي بمفتاحه النكليزي...

بِحزِق بالحنَفية...

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا