اكثر ما يميز مجلس النواب القادم انه رح ينهي احلام الكثيرين بالوزرنة , يعني خلص ( نفقنا )
اما اللي سبق وصار وزير اكيد رح يفقد الكثير منها : تنتهي مشاوير ( السعي ) بين الوزارة والدوّار الرابع تخلص التأشيرة الخاصة بالعمرة من والى اوروبا , وما في سايق يمسح السيارة والباب قبل ما يركب معاليه , ما في موظف استعلامات يفتح المصعد بيد والثانية يضرب تحية لمعاليه , وما فيه وزارة توقف على رجل واحدة لما يهل هلاله وتتنفس الصعداء لما ( يهوينا ) وما فيه حلاّق ينعّم لمعاليه كل يوم والثاني , والمرة الجايه رح ينتف لمعاليه نتف وعلى الخشن بدون كالونيا كمان , وما فيه حدا يروح يشتري لمعاليه الخضار والفواكه .
واعتقد ان اكثر شي يوجع معاليه انه بكل حياته اللي رح تجي , ما رح يفرح بدعوة ( يشرّفنا حضورك ) وعندها فقط رح يعرف انه ما يشرّف حدا , يعني عمان الحبيبة اكيد سوف تعاني جراء ( تنفيس ) اصحاب الكروش من ورم المسؤولية الخبيث .
وبقدرة ربنا وحده اكيد سيذهب للبنك بعد فترة من اجل التعرف على موظف البنك المسؤول عن القروض , على اعتبار ان المصاري اللي لهطها من حساب الكرسي خلصت , وهيك صار مواطن اردني بامتياز , ( متقاعد, دخل مرهون , قلة هيبة ,اضافة لحالة النكد الاردنية المعروفة ) وبعد فترة ستجد معاليه قد اتقن فن التنقي من البسطات او من جوانب الطرق , وستجده ( حكيم بالمفاصلة ) , تماما كحكمته ايام الوزارة في التوقيع على كتب عقوبات الموظفين , او بالتنقاية الخاصة بمنح مسامير الصحن والحاشية الامتيازات اللي مش حقهم .
ولأن الايام لا تدوم على حال , فمن الممكن انه يكشّف عن ذراعه ويدوّر مصلحة يوكل منها هو وعياله , كمطعم بأسم ( فلافل معاليه ) او بناشر ( دولته ) او عرباية ( الوزارة للخضار ) عند دخلة مجمع الشمال .
وبدل من لقب معاليه , الكل رح ينادي عليه اما ابو فلان او فلان ( حاف ) , لأن الناس بالشوارع ما في بينهم القاب ويحترموا بعضهم للشخص وليس للقب .
ولما تسأله عن حاله يقول الحمد لله ( رضا ) وايام الوزارة عمره ما عرف ( الله ) الا لما تقلع الطيارة .
الغريب فينا كلنا انّا ما نعرف الله الا عندما تزول النعمة , اما ايام العز والفخفخة ,اكيد كانت شطارة ومش من الله .
طيروا خلوا غيركوا يهدي .
فيصل البقور
شارك المقال:
الرجاء الانتظار ...
التعليقات