سرايا - شهدت أروقة مجلس النواب حالة من الغضب من قبل النائب تيسير أبو عرابي العدوان بعد تصريحات الناطق الإعلامي باسم وزارة المياه عمر سلامة حول واقع التزويد المائي في عدد من مناطق المملكة، بعدما أكد سلامة أن الوضع المائي خلال العام الحالي يُعد من أفضل السنوات التي مرت على المملكة، الأمر الذي اثار غضب أبو عرابي ورده بأن حديث الوزارة لا يعكس واقع معاناة المواطنين، مؤكدًا وجود شكاوى مستمرة من انقطاع المياه وعدم انتظام وصولها.
وقال سلامة، في تصريح لوسائل الإعلام:"الوضع المي يا إخوان - الحمد لله - السنة من أفضل السنوات اللي مرت علينا، بعد الظروف المائية اللي إحنا بنعرفها جميعًا، والزيادة السكانية وتناقص كميات المياه".
وأضاف: "إن شاء الله إحنا عم بنسرّع خطواتنا بمشروع الناقل الوطني، اللي التزمت الحكومة فيه، وأكد دولة رئيس الوزراء إنه قبل نهاية هذا العام، إن شاء الله، سنباشر بتنفيذ هذا المشروع الاستراتيجي، اللي راح يمنح حلولًا مستدامة على المدى الطويل".
من جانبه، رد النائب تيسير أبو عرابي العدوان على حديث الناطق الإعلامي باسم وزارة المياه، قائلًا: "اليوم إذا وزارة المياه بتحكي بهذا الحكي، فإذن هم مش موجودين أو إنهم بيجاملوا بأنفسهم. للأسف، هو اللي بيحكي فيه مندوب وزارة المياه والناطق الإعلامي باسم وزارة المياه غير صحيح".
وأضاف أبو عرابي: "اليوم وزارة المياه... المواطن بيعاني معاناة ما حد يعلم فيها غير الله... والكل بيعلمها، كل واحد بيعلم إنه اليوم الناس شو بتستنى عند ساعة المي، إنه بدها تصل المي ولا ما تصل".
وتابع: "هذه المشكلة بصراحة، أنا بقول إنه المناطق... إحنا في مناطق بالأردن إنها مش واصلتها مي. هذه المناطق اللي اليوم أنت حاط عندي ساعة منظر، وتقول المي إن بدها تجي المي، ومش راح تصل المي؟ لا، أنا اللي بحكيه: أنت خذ الساعة وخليني بدون مي، ولحين ما تقدر تأمن لي مي كمواطن، أنا بقول لك رجعلي الساعة. أما حاط عندي ساعة بس بتعد على الهواء؟ وهذا اعتراف وزير المياه".
وقال أبو عرابي: "قسمًا بالله إنه كل يوم بيجيني فوق الـ20 شكوى، وبتواصل مع وزارة المياه ومع المدير التنفيذي للمياه، وهيه الآن بيسمعني، إنه بتنحل المشاكل؟ ما انحلت المشاكل بشكل نهائي".
وأضاف: "أنا اللي بحكيه إنه أنتم إذا بدكم إنه ناس بتروح باتجاه التانكات وبتأمنولهم تانكات إذا أنتم مش قادرين توصلولهم مياه يا وزارة المياه، أما المجاملات اللي بيطلع فيها مندوب وزارة المياه، هذه مجاملات كفينا منها. هذه مجاملات مش صحيحة، واللي حكاها عمر سلامة ومش صحيح الكلام اللي بيحكي فيه عمر سلامة".
وتابع النائب أبو عرابي، متحدثًا عن معاناة المواطنين: "والله المواطن بيعاني معاناة ما بيدري عنها غير رب العالمين، والله إنهم بيقعدوا عند ساعة المي إنه ينام وهو قاعد عند ساعة المي! يعني أنا بحكي إنه وصلت اليوم إنه الناس بدها تلم ساعات المي توديها على وزارة المياه".
وفي سؤال صحفي حول ما إذا كان جميع الأردنيين سواسية في الحصول على المياه، أجاب أبو عرابي: "لا لا، في تجاوزات بوزارة المياه واللي برتبوا الأدوار بميزوا... إذا هذا مسؤول اليوم حكى مع موظف بيجيه ضخ أكثر!".
وأضاف: "في بعض الناس من قاعدتي الانتخابية شهرين ما وصلتهم المي".
وحول عدم حضور وزير المياه للجلسة، قال أبو عرابي: "وزير المياه للأسف.. اذا عندنا بالقبة ما بيجي يحضر الجلسات، يا دوب إذا بدو يحضر الجلسات حتى مش قادر يطلع على الناس ويجاوبهم".
وتابع: "ليش إحنا كنواب لما بنروحله وبنطلب مقابلة، يمكن بدك 3 أشهر حتى تقابل وزير المياه! ما بعرف وزير المياه اليوم مين اللي وراه، وشو قصته وزير المياه؟".
وحول إمكانية تقديم مذكرة نيابية تطالب بإقالة وزير المياه، قال أبو عرابي: "بالنسبة لي أنا مستعد، وأنا راح أشوف زملائي للمطالبة بإقالته، وهذه ستسجل لمجلس النواب وأتمنى من زملائي النواب إن نتفق ونشيل وزير المياه، لأن في تقصير واضح من وزارة المياه".
الرجاء الانتظار ...
التعليقات