"أيام معدودة كانت تفصله عن حفل تخرجها فاستقبله نعشها" .. تفاصيل حزينة بجريمة مقتل نور برغل!

سرايا - كان ضايل أسبوعين بس، ووالد نور رح ينزل من الإمارات للأردن، عشان يعيش اللحظة اللي استناها كل أب سنين، ويشوف بنته لابسة ثوب التخرج.

نور محمد عامر برغل، كانت طالبة هندسة جينات في كلية الطب، وبتتدرب بالمستشفى وبتحضر حالها لفرحتها الكبيرة بين أهلها وأحبابها.

بس أبوها ما كان بعرف إنه بدل ما ينزل عشان يحضر تخرج بنته، رح يحجز أول طيارة حتى يودعها.

بهذاك اليوم اجا موعد رجعة نور من تدريبها، لكنها ما رجعت عالبيت.

أمها ظلت تطلع عالساعة وتحاول تقنع حالها إنها يمكن تأخرت بالطريق، بس مر أكثر من ساعة ونص ونور ما إلها أثر.

رنت عليها مرة ومرتين وعشرات المرات، وما حدا رد.

الخوف دخل قلبها، فاتصلت بوالد نور بالإمارات وحكت له:

"البنت صار لها وقت طويل، وبرن عليها وما حدا برد!"

الأب حاول يتواصل معها بكل الطرق، وبعدها اتصل بزوج بنته أحمد المناصير، وطلب منه يتحرك فورا ويدور عليها.

حوالي الساعة تسعة بالليل، وبعد عدة اتصالات، رد رجل شرطة من تلفون نور، وسأل أحمد مين هو وشو بقرب لها،
وبعدها بعث له الموقع وطلب منه ييجي لحاله.

وصل أحمد للمكان، وكانت نور داخل سيارة الإسعاف.

وبحسب شهادته، كانت تعرضت لضربة وحدة بمنطقة القلب، وأكد إنه الحكي اللي انتشر عن ضربات متعددة أو إصابة برقبتها مش صحيح.

الأم كانت بالسيارة مع بناتها، لكنها رفضت تنزل، وحكت: "أنا قلبي حاسس في إشي بنور، والله حاسة فيها إشي!"

نزل أحمد لحاله، وبعد ما تأكد من هويتها، اتصل بوالدها وحكى له أصعب جملة ممكن يسمعها أب: "عظم الله أجركم يا عمي، نور توفت"

الأب حجز أول طيارة ونزل من الإمارات، ولما ودع بنته حكا لها: "الله يرضى عليك يابا، أنا والله راضي عنك، ما في كلمة كنت أحكي لك إياها إلا تطيعيني وتردي علي، الله يرحمك برحمته!"

والدتها طالبت بالقصاص، وقالت: "حرمني بنتي، بنتي مغدورة ومتعلمة ومتدربة، وأنا محروق قلبي عليها!"

والد نور كمان أكد إنه كل الإشاعات عن وجود خطبة أو طلب زواج بينها وبين المتهم مش صحيحة، وقال: "اللي بده يطلب بنت، بطلبها من أبوها، وأنا أبوها!
وإذا كان يتعرض لها وأنا ما بعرف، فالقانون هو اللي بكشف الحقيقة!"

والد نور، اللي ربى أربع بنات وتعب عليهم، ما كان بطالب بحق بنته لحالها، كان بده اللي صار معها ما يتكرر مع أي بنت ثانية.

بقول: "أنا الله بيعلم كيف ربيتها وكيف تعبت عليها، عندي أربع بنات وبطالب بالقصاص للي فعل هذا الأمر،
حتى ما يعمل هيك ببنات ناس ثانيين، وحتى ما تنحرم عيلة ثانية من بنتها مثل ما انحرمنا من نور!"

وبوجه كلامه للشخص المتهم وبيقول: "حسبي الله ونعم الوكيل فيك وفي كل واحد كان السبب،
الله ينتقم منك، أنا بدي حق بنتي!"

وبحسب التفاصيل اللي نشرها الصحفي غازي مرايات، المتهم حكى بإفادته الأولية إنه ارتكب الجريمة لأنه كان متوهم إنه نور بتمارس بحقه السحر والشعوذة.

والصحفي ذكر كمان إنه عليه 33 قيد جرمي، وأربع طلبات إلقاء قبض بقضايا تعاطي، وإنه خلال تفتيش بيته، انضبطت مواد تعاطي، من بينها الكرستل، بالإضافة لعملات مزيفة، بحسب الرواية اللي نشرها.

وهاي التفاصيل بتفتح باب مهم عن تأثير التعاطي، خصوصا الكرستل، اللي ممكن يضرب عقل المتعاطي، ويخليه يعيش أوهام وشكوك، ويتصرف بطريقة خطيرة من دون ما يكون مدرك لحقيقة اللي بصير حواليه.

ومديرية الأمن العام كانت أطلقت حملة أمنية وتوعوية للتحذير من مادة الكرستل، بسبب خطورتها وتأثيرها المباشر على العقل والسلوك.

لكن من نوضح إنه لحد الآن ما صدر بيان رسمي يؤكد أو ينفي كل هاي التفاصيل، والتحقيق بالقضية لسه مستمر، والكلمة الأخيرة للقضاء.

نور كانت بتحضر لفرحة تخرجها، وأبوها كان عم يعد الأيام لحتى يرجع ويحتفل فيها، بس الفرح تحول لعزاء.

القضية اليوم بيد القانون، ونحن كلنا ثقة بالقضاء.

الله يرحم نور محمد عامر برغل، ويصبر قلب أمها وأبوها وأخواتها وكل اللي عرفوها وحبوها.