بقلم : فيصل عويد

سمعت العم غافل اليوم على اذاعه ( امن اف ام ) يصرخ بعالي الصوت ويقول . وين الرقابه عالمحلات . وين الرقابه على بياعين الغاااز ؟

فقلت في قلبي .يا ريت تسكت يا عم غافل احسنلك. الرقابه سلامتك والهسهس لقد ذهبت مع الريح واذا انت جاي تشكيلي من الرقابه عالغاز هسع بابكيلك من الرقابه عالسير .

يزم سحاب فيها مئه الف مواطن وما فيها ولا شرطي سير واحد من الدله للدله . وفيها اخطر الطرق والشوارع بالاردن وما فيها ولا جسر مشاه . فيها ازمه اكثر من دوار الداخليه وما فيها ولا خط مشاه واحد ولا حتى خط بقلم فلو ماستر يرد العين عنها .. جاي تقولي غاز .
يزم هل تعلم انو خلال 30 يوم توفي في سحاب وحدها اكثر من 16 انسان دون ان يتحرك كوشوك الحكومه المسمى جزافا مشاعر وانسانيه .

يزم اسأل عن الرقابه على العماله الوافده بالبلد . وك بطل في اردنيين بسوق العمل صار بدنا (اردنه) لانو اولاد البلد صفوا عالقهاوي . يابن الحلال بطلت تقدر تحكي اردني بالاردن لانو محداش فاهم عليك . صار لازم تتعلم شامي ومصري و(اردو ) عشان تحكي مع الهنود والبنغال . واللي (بجلطك) اكثر انو كلهم فلت . لا بعملوا تصاريح ولا بدفعوا ضريبه والبلد مش مستفيده منهم اشي .
ما بتشوف مطعم ولا مخبز ولا كازيه ولا دكان الا وعامل وافد بيحكم وبيؤمر فيها . ما في كساره ولا منشار حجر ولا معمل طوب الا لعامل وافد ما في كهربجي ولا دهين اردني ولما تيجي تحكي بقولك الحق عالمواطن اللي مش قابل يشتغل . لا يا سيدي الحق عالحكومه والرقابه بالبلد لو بدهم الصح كان اوجدوا طبقه عامله اردنيه خاوة . بس حط بالخرج ما حدا سائل

احكيلهم عن الرقابه على ساعات الكهربا والسرقات مثلا . بدل ما يرفعوا سعر الكهربا ليش ما كافحوا السرقات يا غافل بيك . ياللي مساويلي حالك فهمان
احكيلهم عن الرقابه على محلات بيع الدخان والمشروبات للاطفال وعن محلات البلاي ستيشن والبلياردو . صرت تحكي مع الولد كلمتين يشطبك موس بوحهك تبا لك يا غافل فعلا انك غافل ومش عارف انو الحكومه طلقت الرقابه بالبلد وصارت مثل حارة( كل من بايدو الو ). وك اصلا حكومتنا صارت كلها على بعض (تلولحي يا داليه ) وجاي تقولي غاز . عم غافل .. ادحل غاد عن وجهي . قلبت مواجعي و خليتني اعصب على هالصبح

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا