بقلم : فيصل عويد

لا ادري كم كانت الساعه تلك الليله السعيده ، ولا ادري اصلا مين هو الغبي اللي كان حاط التلفزيون على القناة الرياضيه الاردنيه ؟

بدون يمين من يوم ما اخترعوا الستلايت واحنا بطلنا نتفرج عالتلفزيون الاردني،

احنا كنا سهرانين بمزرعة تمور لصديق عزيز ، في غور فيفا ، حيث ان الفقر المدقع هو الصديق الصدوق والرفيق الابدي لسكان هذه المنطقه
فقر كافر يعصف بهم، ويشتت اوقاتهم في الركض خلف رغيف خبز وبالكاد يمسكون به .


ما علينا ، المهم
وبنص القعده سادت لحظة صمت، انتبهت خلالها بدون قصد على التلفزيون ابو الميرميه، وإلا شو يا ساده يا كرام ؟ وإلا طلعت علينا وحده وقعدت تسولف عن تخفيف الوزن ، وتقول : (بنسحكم تفترو شوفان ، وتتغدوا افوكادو ، وهيك بتدعفو وببتل الكم بتن )

وهذا الكلام معناه بالاردني هو انها (بتنصحنا نفك الريق عالفطور بشوفان ، وندلغص عالغدا افوكادو بنصير سمبتيك وببطل النا كرش ) .

وما كادت ام الشوفان تنتهي من نصيحتها حتى اطلت علينا من خلف الجبل وحده ثانيه بدها تشرحلنا كيف نعمل( سلتة بالانانس) ، يعني (سلطة اناناس ) . ياللصدمه!!!

طب هو مين قال لسعادة حضرتك معاليك، انو الشعب الاردني تبع شوفان والا تبع افوكادو ؟؟

وك ثلثين الاردنيين ما شافوا الافوقرود تبعك هاظ الا على قناة ناشونال جيوكرافيك!!!

اذن لماذا لا تكون تلفزيون منطقي ويكون خطابك موجها لعامة الشعب؟

لماذا لا تنزل بمستوى مذيعينك ومذيعاتك وبرامجك الى مستوى المعيشه بالغور ومعظم مناطق المملكه اللي معظمهم مسخم وملطم ؟

ولماذا تعتقد يا تلفزيوننا الوطني ان كل الشعب بقدر يعمل سلطة اناناس؟

وك هو المسخم اللي قضى عمره بسمط عالغدا قلاية بندوره ووقت العشا بيسخن نفس القلايه ، حرام يكون الو برنامج يلامس مستوى معيشتو ، بعد نهار قضاه في معركة شرسه مع لقمة العيش ؟؟

يعني شو فيها لو جبتلنا وحده تعلمنا طريقة خبز الشراك مثلا ،
او وحده بتكبس خيار وبتعمل مخللات ،
او كيف نطبخ خبيزه ، والا ما بتعرفوا شو الخبيزه ؟؟؟؟.

ارحمونا من شان الله وبطلوا هبل وتقليد اعمى وخليكم مع المواطن مش عليه ، هو من وين بده يلاقيها والا من وين ؟؟؟

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا