بقلم : هاشم الخالدي

قبل ايام راسلني على الايميل شخص قال انه يعمل موظفا في فندق شهير وعريق في عمان وانه يشعر بالقلق والضياع بعد ان بدأ الفندق الشهير استعداداته للاغلاق حيث قام معظم مدراء ورؤساء الاقسام بعمل تسويات مع ادارة الفندق والانتقال لفنادق اخرى فيما ستترك ادارة الفندق المباع ما يقارب ال (350) موظفا في مهب الريح وفي مهب غول " العاطلين عن العمل " 

يقول الموظف في رسالته :

السلام عليكم استاذ هاشم


انا موظف في فندق ( ...... ) وصارلي ١٣ سنه. رقم منحوس.
وفي غيري صارله ١٠ و١٥ و١٧ سنه. وفيه كمان ٢٠ و٢٢ سنه موظفين. عدا عن الموظفين اللي صارلهم دون ال١٠ سنوات بين ٣ و ٥ و ٧ سنوات خدمه.

الموضوع يا سيدي انه الشركه المالكه للفندق باعت الفندق لاحد مكاتب الهندسه العملاقه الي اشترطت انه تستلم الفندق زي ما هو. بدون موظفين. لعمل تجديدات كامله تستمر ل ( سنتين ).

مدير حسابات الفندق والشركه المالكه للفندق هو السيد ( .....). ( البغ بوس ). عمل اتفاقيات داخليه بين الفندق وبين كبار مدراء الاقسام عشان يقدمو استقالاتهم. وبالفعل قدمو استقالاتهم وراحو على فنادق ثانيه. او مصالح اخرى. وما ضل حدا. لا بالمبيعات ولا الصيانه ولا المحاسبه.

وللعلم اقل واحد فيهم بوخذ راتب فوق ال٢٠٠٠ دينار. وممكن توصل ل ٣٠٠٠ الاف دينار. عشان رح يسكر الفندق من جهه وعشان ما يغلبو الفندق بالمخالصه معهم. هذا من جهه

( اذا بدك اسمائهم بعطيك اياهم زي مدير المبيعات الي راح استغل في فتدق ثاني . وهو اهمهم لانه اقرب شخص للمدير . او مدير المحاسبه ثاني الاقربين )

من جهه اخرى الفندق ما بوخذ حجوزات بعد شهر ١٢. يعني لو طلبت قسم الsails وجربت تعمل حجز لاصدقاء الك مثلاً بشهر ١. رح يرفضو. او تجرب تحجز موعد عرس رح يرفضو اذا كان بعد نهاية السنه. وهذا دليل اخر على انه رح يسكر.

المشكله استاذي انه في قرابة ال ٣٥٠ موظف في الفندق. يعني لو قلنا انه نصهم معيلين مثلي. رح يصفو بالشارع. وما بدي احكيلك عن الوضع بشكل عام بالبلد. ولا عن اخر مقال كتبته حضرتك بخصوص التوجيهي. اعتبر انه الك ابن بالفندق وصارله ١٣ سنه بالفندق ورح يصفي برا لانه مش من افراد العصابه الكبيره الي ماكله تعب الموظفين. واللي قلصت نسبة الاجازات بالفندق. وبدل الاضافي الي مستحيل توخذه. ووووو
الكل بهدد انه رح يوقف محامين. واقصد بالكل الي الهم فترة خدمه طويله. والكل محتار وين بده يروح. والله اشي بخنق.


بامكانك التأكد من صحة كلامي اذا اتصلت وحاولت تحجز لعرس بشهر واحد السنه الجديده. او اسال عن حجز بالسنه الجديده. رح يجاوبوك بالنفي

ارجوك تعمل شيء ولو نشر القضيه. انا متابع يومي لصفحتكم. واعرف انه هناك قضايا كثيره حلت بعد نشر موقعكم لها.

انا من قبل ما يثبت الخبر وانا كنت افكر انه الحكومه مستحيل تسمح باغلاق فندق في منطقه حساسه ومميزه . ولا رح توافق ع تشريد ٣٥٠ موظف لانه رح يكون امر مرفوض بالنسبه الها. بس الظاهر ما حد سائل عن حدا

وشكراً

هذه هي نص الرساله التي وصلتني واتركها امام الجهات ذات العلاقه للتحقق منها ومنع تشريد ٣٥٠ موظفا يعيلون ٣٥٠ عائله اردنيه.
هي مصيبه بكل معنى الكلمه فهل تستجيب الحكومه ام انها ستبقى منشغله فقط بمص دماء الشعب والبحث عن اي وسيله لزيادة الاسعار .
انا هنا اقرع الجرس .. فمن يسمع
الكاتب : مؤسس موقع سرايا
Hashem7002@yahoo.com

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا