سرايا - ، أنا بنت عمري ٣١ سنة مو متزوجة بشتغل معلمة ، حبيت شب أصغر مني بسنة لما كان عمري ٢٣ وكان أول حدا بدخل حياتي . عمري ما طلعت معه وكنت اشوفه بس بالمناسبات ومن بعيد ،،، بطريقة معينه اهلي عرفوا ،، طبعاً اعترضوا عشان أصغر مني وهيك بس أنا أصريت أظل ع تواصل معه ،، مرت الأيام وصرت اعرف عنه شغلات كتير ،، ما بصلي ،، ما بصوم ،، بطلع مع بنات ،، قررت أترك وأبعد واحفظ كرامتي ،، وعدني انو يلتزم ويتغير للأحسن ،، بلشت معه من الصفر علمته يصلي ويقرأ ويكتب خليته يحفظ سورة الفاتحة والسور القصيرة ساعدته بالوظيفة واشتغل وظيفه حكوميه واخد قرض وبنى بيت ووضعه صار أحسن الحمد لله لما اجا يتقدملي اهلي رفضوا عشان فارق العمر مع انو سنة مش هداك الفرق ،، المهم مرت الأيام واقتنعوا اهلي وحكيتله ييجي ،، اهله عندوا ورفضوا انو ليش احنا رفضناهم اول مره ،، وما وافقوا .. تعبت نفسياً تركت محافظتي ورحت لأبعد محافظه وكملت شغلي بعيد عن كل اشي ،، وسلمت اموري لربنا ورضيت انو ما في نصيب بس بيني وبين نفسي عاهدت حالي بعمري ما بحب اي انسان تاني ،، تقدملي شب بعد فتره كان وضعي مو فارقه معي اي اشي اهلي وافقوا وحكيتلهم موافقه عشان هداك الشب اللي بحبه يشوف حياته وما يظل رابط حاله كمان،، خطبت وطلع خطيبي انسان اخلاقه مش منيحه وسيء جداً ،، امه للشب الي بحبه طلع معها فجأه سرطان اللهم عافنا ،، كانت ما بتحبني لانو ابنها بحبني كتير ولانو رفضناهم ،، مره في مناسبه ( عرس من قرايبنا ) كانت امه معزومه وانا وقتها كنت خاطبه ولابسه ذبله اجت لعندي واخدتني ع جنب وقعدت تترجاني انو احكي مع ابنها وانها موافقه وبدها اياني ورح تيجي تطلبني مره تانيه وبدها تفرح فيه ،، انا حكيتلها اسفه انا مرتبطه ما بحكي لا معك ولا مع ابنك ، وربنا بشهد اني طول الشهرين اللي خطبتهم ما تواصلت مع الشب اللي بحبه لانو ربنا رح يعاقبني ،، بعد فتره انفصلت عن خطيبي ،ورجعنا نحكي انا واياه ( الشب اللي بحبه ) مع بعض ومره كانت الدنيا مسا حكالي اهله وافقوا ورح ييجوا عنا وحكالي لا تموتي من الفرحه لانو بدي اعيش معاكي يوم واحد وبعدين اموت فرحت كتير وحكيت الحمد لله ،تاني يوم الموعد المحدد ابوه حلف يمين طلاق ع امه وهي تعبانه بين الحياه والموت انو ما رح يرجع لعند ناس فشلوهم
امه تعبت بزياده ودخلت المشفى وهي بالمستشفى شافت بنت ممرضه وعجبتها تعرفت عليها وحكت لابنها ووصته انو يخطبها عشان ما بدها تتطلق بعد هالعمر قبل ما تموت وكانت بدها تختصر مشاكل كتير ،، ماتت امه ،، وقبل ما تكمل امه ال٤٠ راحوا خطبوها عشان كانت وصية وبدهم ينفذوها ،،، خطب حبيبي وكل واحد فينا راح بحاله ،، هاد الحكي بعد ضياع ٨ سنوات من عمري ،، بعد ضياع الف فرصة بحياتي لاني كنت مستحيل افكر بغيره بيوم ولا اطلع ع حدا غيره ،، قطعت علاقتي معه بصعوبه شديده وتعب جسدي ونفسي الحمد لله قدرت اتجاوز هالاشي وتقبلت الواقع المرير الصعب ،، قبل فتره رن علي رقم غريب وطلع هاد الشب بحكيلي انو بحبني وانو ارجعله وانو ما بده غيري ... بحيات الله انا ما بقدر اخرب حيات حدا عشان اكون سعيده وهاي وصية امه بس انا رفضت وحكيتله حرام عليك بنت الناس ( بس انا من جوا قلبي بحبه وعمري ما رح احب غيره ) عملت اله بلوك ع كل وسائل التواصل بس صار يرن من ارقام تانيه ،،، وكلنا عارفين انو الانسان ضعيف بهاي المواقف




 

• اريد حلا مع زوجي
• اريد حلا لابنة خال زوجي
• اريد حلا لمشكلتي مع عمي وزوجته

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا