سرايا - سرايا - يا جماعه انا بنت بحب واحد الي 5 سنين

بالبداية كنا ابدا ما نفترق عن بعض و كان دايما يشتاق يحكي معي لو نضل نحكي 24 ساعة و كان دايما يحكيلي انه بحبني و يحكيلي كل اشي بسير معه و كل ما بده يعمل شي يشاورني و ياخد رايي و انا وقفت معه باكتر لحظات و امور مهمة بحياته ,,

بس من سنة و نص تقريبا هالبني ادم تغير كتير لساته بحبني بس مش متل اول يعني ازا انا ما سالت عنه هوه ما بسال ولا بهتم ابدا لمشاعري حتى لما يجرحني و ابكي بس مع هيك لسا بحكي انه بحبني ,, بس انا شايفه كل اشي متغير حتى طريقة حكيو معي و عندو صحابه اهم مني بكتييييييييير و شو ما يحكولو بعمل و بحكيلي عندي مشاكل ,, صراحة انا هلا ما بتزكر متى اخر مرة حكالي بحبك !!
حاسة حياتنا روتينية جداااا و صرنا زي كانا صحاب و اقل حتى ,, مع اني كتيييير بهتم فيو و 24 ساعه بتصل فيه و بخاف عليه كتيييير ,,

ما بعرف هلا هوه مل و زهق ولا ممكن تكون ظروفه ولا الاهتمام الزايد مني هوه اللي خلاه هيك ؟؟!!
بس انا عندي مشكله اني دايما بحكي ما رح احكي و بدي اقلل اهتمامي و اسير متله بس مش قادرة كل ما اقرر هيك ما بلاقي حالي الا رانه عليه او سائله عنه

معلش انصحوني كيف بقدر ابعد عنه شوي لحتى يحس او كيف ممكن اقدر ابطل ارن عليه ؟؟؟؟؟ او متلا عذر احكيله ياه عشان نبعد؟ و بدون تجريح لانه واللي خلق الكون هالاشي ما بخليني انام و تاركه دراستي و دايما قلقانه بهالبني ادم و نفسي اخلص لانه تخصصي ما بيسمح لي اضلني بالوضع !!