مغترب متعذب ..

26-05-2014 08:36 AM

تعديل حجم الخط:

سرايا - سرايا - السلام عليكم،،
انا احبيت احكي مشكلتي لاني الصراحه راح اموت من القهر الي جواي.
انا خطبت واحده بطريقة تقليدية قبل 8 شهور، ولاني مو مقيم في الاردن، عمتي اللي شافتها و لما نزلوا اهلي على الصيف شافوا البنت وعجبتهم و انا عجبتني.
و صرت احكي معها على التلفون لاني ما كنت قادر انزل اشوفها بسبب ظروف شغلي، بس نزلت في الشتاء اشوفها و كتبت كتابي عليها..
و بعد اسبوعين سافرت، وبعد شهر من سفري صارت المشاكل تطلع بينا مع اني و الله مقدر ظروف البعد اللي بينا و انه الفتره اللي قعدناها مع بعض ماكانت فتره طويله.
وانا واحد ماعندي تجارب مع البنات، "يعني هي اول واحدة بحكي معها بحياتي"، لان ما كنت مقتنع بفكرة اني اصاحب، لان هادي اعراض وانا بخاف على عرضي، وانا الحمد لله انسان هادي مو عصبي بس هي كانت تخليني ازعل و اعصب منها لانها كانت تحسسني اني انا آخر اهتماماتها..
يعني كانت تقعد تحكي مع صاحبتها بالساعة و الساعتين و انا لما احكي معها تكون تعبانه او تقول بدي انام او من هاد الحكي.. ولما صاحباتها يروحوا عندها كانت تطنشني و حتى ما ترد علي لما احكي معها..
و لهاد السبب اضطريت اني ارفع صوتي عليها، مع اني عارف انو هاد غلط لان مو من الرجوله انك ترفع صوتك على امراة مهما كانت المشكلة، والرجل بيعرف كيف يحل المشكلة بعقل، بس هاي كتير زادتها معي و هاد الي خلاني ارفع صوتي عليها..
و رغم انها هي الغلطانه انا اعتذرت منها لاني جد حبيتها، وصلت اني بعشقها، بس هي بعدها تغيرت كتير معي و المشكله كبرت لما سافرت هي مع اهلها و كان تلفونها مسكر و كنت احاول اتصل مع امها ومع اختها و هم يحكولها انو خطيبك بدو يحكي معك وهي مو مهتمة ابدا، و لما سألتها ليش تلفونك مسكر كانت تقول لي : "انا نازلة اشم هوا مو نازلة احكي في التلفون"
وكبرت المشكله اللي بينا، وحاولت احل الموضوع مع اهلها بس و لا واحد كان يرد على التلفون، وامها اخر فترة صارت تسكر التلفون بوجهي لما ارن عليها، والله اني سمعت من البنت حكي ما في بني ادم بيتحمله .. وانا ما بدي احكي عن الاشياء الي سوتها معي لاني ما بحكي عن امراة لسه على ذمتي لان هاد عرضي.
و الله اني حاولت احل الموضوع مع اختها او مع امها حتى عمتي راحت تشوف ليش هيك البنت بتسوي و هي مو راضيه تحكي او ماكان في فايدة، فانا بعتلها مسج اني بدي اؤجل العرس علشان نعرف نوصل لحل المشكلة اللي بينا، بس هي كان ردها انو : "انزل علشان نتمم الطلاق"!!
وانا متردد لاني لسا بحبها او مو قادر اني احل الموضوع لاني ما قدرت انزل على الاردن، و انا من بعد اللي صار صرت ادور على واحدة تانية و الحمد حصلت بنت الحلال بس موقادر انسى الاولى وعلشان هيك تركتها لان خفت اني اظلمها معي، وهاد بيموتني من جوا
والله اني صرت اروح الشغل يوم الجمعه و السبت علشان انساها بس مو قادر. وأنا عارف اني لازم افكر بعقلي بس انا انسان حساس و عاطفي كتير وانا مو خجلان اني هيك، وانا مقتنع تماماً ان هاي البنت لاتصلح الي كزوجه بس و الله قلبي مو راضي يقتنع بهاد الحكي او بدي انساها باي طريقه كانت بس مو عارف كيف.

سامحوني اني طولت عليكم بس والله اني ميت من جوا و لما اكتب هون بحس حالي بين اهلي و بعيد عن الغربه و الهم اللي انا فيه.

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا

طباعة

المشاهدات: 57488


1 -	ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.	26-05-2014 08:36 AM سرايا
2 -	شو بدك نساعدك؟؟؟ انت انسان ضعيف جدا وما عندك شخصيّة!!! يا رجل وحدة كانت عم تتسلّى فيك وشكلها عرفت غيرك وما دام الطلاق سهل عليها وعلى اهلها اذن هادي عيلة متل قاع الكيلة!!! بعدين يا رجل انت غلطان،،، طبيعة عملك وظروفك ما بتسمح تكون جنب خطيبتك او زوجتك ليش تربط البنت معك؟؟؟؟ والتلفون حبيبي ما بحل مشكلة،،، الاهم انه البنت التانية اللي بعثها ربنا إلك كتعويض عن البنت الاولى رحت حضرتك ظلمتها لإنك واحد ما فكرت بعقلك ،،، شو ذنبها المسكينة التانية تخطبها وتعلّقها فيك وبعدين تتركها؟؟؟ يعني انت عملت مثل خطيبتك الاولى بالبنت التانية!!! حرام عليك،،، ارجع لبنت الحلال التانية وانسى الاولى لإنها ما بتستاهل منك اي لحظة تفكير!!! يا اخوان كرمال الله!!! ما ظل عنا مشاكل الا مشاكل الحبّيبة والعشّاق؟؟؟؟ بعني بلدنا خلصت فيها المشاكل الا هالمشاكل؟؟؟	26-05-2014 09:04 AM Black Zoro التبليغ عن إساءة
3 -	عزيزي الكريم انت رجل ولابد لك من كبرياء وعزة نفس، تتحدث عن فتاة لا ترغبك ولا تريد الارتباط بك وانت تتحدث عن عواطف ومشاعر لحظية نابعة من غريزة الرجل ولكن عدم الإلمام بموضوع الغريزة يجعلك تفهم بأن هذا هو الحب والحنان!! عزيزي الحب له معاني نقية وصافية ولا اريد ان اخوض في هذا الموضوع لأنه سوف يطول، ولكن استطيع ان اقول لك احفظ ماء الوجه وابحث عن امرأة اخرى تنظر اليك بنظرة الاحترام والتقدير قبل المشاعر وانه من الفشل الاستمرار في مثل هذه العلاقة بسبب النظرة الوضيعة التي تنظر بها اليك تلك الفتاة، الأمر لا يحتاج الى عزيمة واصرار، كل ما في الأمر ان تضع نصب عينيك من لا يجعل لنفسه قيمة فلن تكون له قيمة في اعين الآخرين. وكن على يقين تام انه لو تم مثل هذا الزواج فأنك ستكون دائما صغيرا في نظر زوجتك وتصرفاتها معك دائما ستكون متعالية، فهل ترضى الذل على نفسك!!! وشكرا	26-05-2014 09:09 AM امير التبليغ عن إساءة
4 -	ويا ريتك مقهور على اشي بستاهل بناء على كلامك مش هاي الزوجه الي ممكن يرتبط بها اي شب وانت تركتها وهذا الذي يجب ان يحصل وبحمل حالك هم الدنيا ليش لو ما تركتها كنا حكلينالك اتركها من اول الطريق ولا من اخره يجب انه يكون هناك علاقات انسانيه بين الناس مش هجوم احنا في حرب شو القصه يا زلمه انسى الموضوع من اصله وانتو لما وافقتو عليها اخذتو الظاهر مش الجوهر وبدكو جمال المظهر مش العقل والتدبير شو انسوي الكو تلقوا وعدكو لانكو ما بتختارو الجوهر اتمنى لك التوفيق	26-05-2014 09:12 AM الى المعذب المقهور التبليغ عن إساءة
5 -	يا اخوي انا ما كملت كل قصتك بس فهمتها حلها كثير سهل ... اول اشي هاي البنت ما بتحترمك ولا اهلها بحترموك لو على الاقل اهلها بحترموك كان عرفو كيف يتصرفو مع بنتهم و حلو المشكله ... انا بنصحك بما انه لسى مش متجوزين طلقها و اخلص لانه هاي قبل الجيزه مش محترميتك و مش عامله الك اعتبار هي و اهلها كيف بعد الجيزه والله غير تعذبك ... ثاني اشي بخصوص تعاملك مع البنات بشكل عام و هاي اعتبرها نصيحه للمستقبل ... الحكي الفاضي الي بتشوفه بالافلام انه لاترفع صوتك على المره هاذ كله حطه على جنب ما بدي احكيلك انساه ... المره لازم دائما تحسب حساب كلمتك قبل كل اشي مش غلط تكون حنون و رومنسي و ادللها بس بحدود و خليك صارم بكلامك عشان ما تركبك من الاخر	26-05-2014 09:12 AM Amr التبليغ عن إساءة
6 -	السلام عليكم و رحمة الله و بركاتة اعلم يا اخي ان كنت من اهل العفة والصلاح بان الله اراد لك الخير , فالزانية لا ينكحها الا زان او مشرك. ادعوا ربي دبر لي فانا لا احسن التدبير سر تعلقك بها يا اخي هو سبب نفسي بحت, لانها تقوم بتطنيشك و انت غير مطمئن لها وكثر تفكير بالموضوع جعلك تشعر هذا لشعور. هي تتصرف هكذا يمكن صاحبها الي كانت تعرفة رجعلها ووعدها بالزواج, هاي اكبر احتمال بالنسبة الك من وجهة نظري لا تنزل و تغلب حالك اعمل وكالة لحد من السفارة و خلية ينهيلك الموضوع احسنلك وربنا يرزقك على قدر نيتك	26-05-2014 09:29 AM فاعل خير التبليغ عن إساءة
7 -	انت لا تستطيع نسيان جمالها اللي اخذ عقلك ولكن تصرفها يدل على انها لم ترتح لك ولن ترتاح معك والطلاق هو الحل والزواج من اخرى وبسرعة لعلك تنسى الحلوة الاولى	26-05-2014 09:34 AM ورد الحمزات التبليغ عن إساءة
8 -	كون رجل ليش حاس اسلوبك اقرب للبنات - وحده كابيتك ومابدها اياك - وانت يااخي الكريم - لاتقنى زباله في البيت - هاي مابتفيد ولاممكن تكون ام صالحه او زوجه صالحه اخلع من رجلك انت على البر - وبلكعس - لازم تفرح انه الله كشفها - بعدين شد حالك شوي وخليك اقوي من هيك انت رجل !!!	26-05-2014 09:47 AM !!! التبليغ عن إساءة
9 -	انت متأكد انك أردني ؟لا تجارب مع البنات هادي مو عصبي لا تكون هاي مسابقة أرسل كلمة حلم او dreem ههههههه	26-05-2014 10:03 AM هبله التبليغ عن إساءة
10 -	انت عزيزي شكلك من كلامك ابن عالم وناس و اخلاقك محترمة.. وبحكم انه ما عندك تجربة ترجمت مشاعرك تجاه البنت انها حب.. بس هيه مش حب و حتى لو حب هاي البنت ما بتستاهلك و في كتير بنات محترمات و مربيات و متواضعات ممكن يقدرو زوج متلك و يعطوه حقه و يغدقوا عليه الحب و الاهتمام .. اتركها و انشالله ربنا بعوضك احسن منها	26-05-2014 10:08 AM مها التبليغ عن إساءة
11 -	اخي الكريم تحكم بعقلك لا بعاطفتك وكل ما تتذكرها ارجع اذكر رب العالمين وهذا الشيطان يوسوس الك حتى لا تستمر حياتك مع زوجة صالحة من بعدها ما دام حسب ما تقول انك لقيت بنت الحلال الله يفرجها عليك ويبعد عنك الهم والحزن	26-05-2014 10:20 AM حبي لربي التبليغ عن إساءة
12 -	انت رجل مستحيل تكون هيك يا اما انك اهبل	26-05-2014 10:28 AM عادي التبليغ عن إساءة
13 -	شو احكي انا عن الغرام اااااخ منه	26-05-2014 10:38 AM انت لهفة آلبي التبليغ عن إساءة
14 -	كتير من الشباب هيك بتعلق في حبيبته الاولى لا تخاف بتنساها وانزل على الاردن وطلقها ما زال هيه ببدها الطلاق وخليها ترجع شبكتك لانه هيه اللي طالبه الطلاق شكلها فاتحه جمعيه وبنت مشفره	26-05-2014 11:06 AM بياع الورد التبليغ عن إساءة
15 -	اخي الكريم من كلامك عرفت انك انسان محترم وخلوق وخطيبتك استغلت هاي النقطه واعتبرتها ضعف فيك اخي الحب ألا ما ينتسى مع انسانه ما بتقدر الحب والاحترام ونصيحتي ابحث عن وحده تحترمك هي واهلها وبعد فتره رح تحس انه الي كنت عايش فيه وهم اخي اهم شي الاحترام الاحترام ومنه يتولد الحب انساها ولا تسأل لانه رح تتغلب معها وربنا قادر يعوضك افضل منها	26-05-2014 11:43 AM فاطمه التبليغ عن إساءة
16 -	لا تصلح زوجة وانت معذب اهلك وحالك فيها هي لاتستهل حد يفكرفيها	26-05-2014 12:22 PM ادم التبليغ عن إساءة
17 -	اتوقع ان البنت تاجرت بغيرك او تاجرت بمالك فقط يعني انها تاجرة فقط وليست زوجه واذا البنت لم تهنم بخطيبها يعني رايحه تهمله على الاخر بعد الزواج فانا ارجح فكرة الانفصال منذ البدايه احسن للجميع ورايح الله يبعثلك من هي تتاجر بك كرجل وليس مالك	26-05-2014 12:35 PM رقيب التبليغ عن إساءة
18 -	اخي فترة الخطبة هي فترة تعارف بينكم حتى تتعرفوا على اطباع بعض وتشوفوا اذا رح تكملوا مع بعض او لاء والواضح من ر سالتك ما في بوادر تفاهم او مودة متبادلة بينك وبينها وهذا عكس الطبيعي ...وانت والاهل ما قصرتوا لحل الوضع اللي حصل ..اخي انت بغربة وبالغربة بدك مين يعينك على تحملها مش يكون عبء اضافي عليك. الحل اولا حتى تنسى هذه المشاعر اللي بقلبك لخطيبتك علك ان تستبدلها بحب اقوى وهو حب الله بالصلاة والاستغفار واخلاص النية له وتذكر قول النبي عليه السلام ’’يا ابن آدم تفرغ لعبادتي املا قلبك رضى واملا يديك رزقا ...’’ بعدين انشغل عن خطيبتك ولاتحكي معها حتى تهدا انت شوي واخيرا بالاجازة بتنزل مع الاهل وبتنهي الموضوع بناء على رغبة بنتهم حفظا للحقوق وكذلك حفظا لهيبتك كمان الله ييسر امرك	26-05-2014 01:28 PM لانا التبليغ عن إساءة
19 -	معلللللللللم ميين حكالك انه لما كنت ترن عليها كانت مشغوله مع صاحبتها .؟!! ههههههههه شكلها عرفت غيرك واللي صار صار هيك اغلب بنات هالايام ارميها وخذ غيرها .. البنات اكثر من الهم على القلب	26-05-2014 01:39 PM محمد حمد التبليغ عن إساءة
20 -	الظاهر والله اعلم انها شايفه شوفه غيرك ونصيحه ازا بتتصرف معك من هسه هيك هاي ما الها امااااان بالمره اختصر وانهي معها	26-05-2014 01:48 PM ساهر الليل التبليغ عن إساءة
21 -	ان الاوان لتأخذ قرارك وتكون قد قرارك انت عارف شو لازم تعمل ثق بالله وتوكل على الله	26-05-2014 02:04 PM الله يفرج عنك التبليغ عن إساءة
22 -	بدي احكي معك بكل صراحه البنت لو حبتك عشر حبك الها وتعلقك فيها اللي مستغربة صراحه مصدرة لأن كل تصرفاتها ما بتدعوك لحبها او التعلق فيها يا اخي اتركها وربنا بعوضك خير بس بعد ما تستخير وكتير كمان انت باين انك ابن حلال وربنا رح يعوضك خير دعواتي الك وكل الاخوان والاخوات بالتوفيق	26-05-2014 02:04 PM بنت الاصول التبليغ عن إساءة
23 -	ياريت في منك كتير انسان حساس ورومانسي ولطيف هالاحساس ما عم بتلاقيه هالايام ولا ما بتعرف بنات من فبل والله الي متلك قليل يتلاقو بس هي ما الها بالطيب نصيب ورح تنساها لانها ما الها ذكرى حلوه بمكانك الشغله شغله وقت الله يوفقك ويهنيك	26-05-2014 02:06 PM وحده التبليغ عن إساءة
24 -	الزواج يلزمه رغبة من الطرفين حتى يكتمل وشكلها البنت ما حبتك او ما عجبتها فصارت تتصرف بطريقة عشان تنفرك منها وتطلع من الموضوع باقل الخسائر يعني انت تزهق وتطلقها وبهيك بتوخذ نص المهر ساعتها شو العمل يا بطل ,,,,؟اسال الافتاء احسن الله يعوض عليك باحسن منها	26-05-2014 03:15 PM مجرد راي التبليغ عن إساءة
25 -	على راي المثل خد اللي بتحبك ما توخد اللي بتحبها ويا رجل انا مستغرب كيف شخص بقبل انه عضو في جسمه يهينه ما تحكي قلبي وحبيتها وبعدين لنتى بعيد شو عرفك انها بتحكي مع صاحباتها يا رجل مشاااااااااااان الله افهم كلامي وكلام الناس اللي بتساعدك	26-05-2014 03:15 PM sa7 التبليغ عن إساءة
26 -	لا هي ولا اهلها محترمين وجودك والبنت ما تحبك ولسانها بدو قص الله واكبر والله. مثلك ما مر علي بالأخلاق هاي اي لو الزمن بعث واحد متلك الي وشرط حبني متلك لأكون له جاريه والله بس بتنعطى اللحمه للي ما إلها أسنان اااااخ يا دنيا بدك الصافي اخي العزيز بعيدا عن الفرضيات الجدليات والمزاجيات بدي احكيلك كلمه ما حد نصحك فيها لهسا (((((طلقها))))))	26-05-2014 03:30 PM عاشقه بصدق لحبيبي بس التبليغ عن إساءة
27 -	والله يا ابني الله بحبك -هاي لو تاخدها غير تصير طرطور --سامحني بهاي الكلمه--لانه من هلا في الخطبه بتركض وراها وهي ولا معبرتك--كيف بدك اياها تسمع كلمتك بكره في بيتك--اشكر الله الى خلصت واكيد ناس كتير بتمنو تاخد بنتهم --لانك يبدو من كلامك انك ابن ناس وعالم --لا تخاف الطيبون للطيبات وهاي مش الك لانك انت طيب	26-05-2014 03:43 PM ام غيوره التبليغ عن إساءة
28 -	شوف ياصاحبي البنت بتحب من الاخر وبتعرف غيرك ... الله بحبك انك خلصت منها هاد واحد .... 2. اكبر غلط عملتو بحياتك انو مالك تجارب ولا كان عرفتها قبل ماتخطبها انها بتحب بتصير تشوف بعيونها شو ماضيها كلو	26-05-2014 07:21 PM واحد خبره التبليغ عن إساءة
29 -	محب شو بتقربلك لانو الصحيح نفس طريقة الطرح والجمع اقصد طريقة الرد أسلوبك كما هو نرجسية حالمه غير واقعية مجرد صف كلام بدون إعطاء شيء واقعي لهون بكفي بديش اكثر معك كلام لانو مش راح يعجبك. ودمتم	26-05-2014 10:23 PM الى. أمير التبليغ عن إساءة
30 -	بارك الله فيك ... كلامك كلام منطقي...جوزيت خيرا	26-05-2014 11:31 PM فاعل خير / أمير التبليغ عن إساءة
31 -	صديقي.. انت بتفكر حالك بتحبها وبتعشقها لانعدام تجاربك مع النساء، ولو تعرفت على غيرها برضه رح تفكر حالك بتحبها، لو نويت تنساها رح تنساها خلال ربع ساعة، توكل على الله وسيبك منها، بكرة بدك زوجة في بيتك قد حالها تحمل مسؤولية البيت واتطلع ولادك فالحين بحياتهم، سيبك من الكلام العاطفي الي رح ينزت ورا ضهرك بس تتزوج. وعلى فكرة انا بحكي معك عن تجربة مش بنظر يعني.	26-05-2014 11:58 PM بتقدر تعملها التبليغ عن إساءة
32 -	شو مال بعض المعلقين عليكي لازم تغيري اسمك وانا راح اكتشفه يعني لعبه غميضه هههه	27-05-2014 12:10 AM محنوووووون لهبله التبليغ عن إساءة
33 -	اتفقنا تبادل مواقع حول اي ببطل اكل شوكلاته أزا ما ألك عشر اسماء متلي ههههههههههه مهو مرات بغير رايييييي بالدقيقة عشر مرات بس في رأي الي لحالي ما بغيره اكتشفه والك تي شيرت عليه صورة رونالدو لآني يشجع برشلونه هههههههههه نايتي	27-05-2014 01:01 AM هبله لمجنووووون التبليغ عن إساءة
34 -	بتذكرني بحالي قبل 15 سنة ... عمو حبيبي قبل ما تتزوج لازم تتعرف كلى اكم علاقة حتى تعرف النسوان كيف بتفكر ... وبعدين اتوب وتتزوج لانه اي موضوع بالحياة بدون خبرات سابقة راح تواجه مشاكل	27-05-2014 06:55 AM البلقاوي التبليغ عن إساءة
35 -	اخي شو ماااالك عامل حالك شرطي على المعلقين محب وامير وهبلة على الاقل هم بشاركو بايجابية وبروح حلوة ترى الله شايفك وعارفك صحيح انه تعليقاتك تدل على انك مريض نفسيا ...على الفحييييييص فارقنا	27-05-2014 07:13 AM الى التعليق رقم 28 التبليغ عن إساءة
36 -	تعليق حلو لااااااااااااااااايك	27-05-2014 07:16 AM الى امير التبليغ عن إساءة
37 -	والله نصيحتك غريبة يا أخي.. شو يعني اعمل لك كم علاقة وبعدين توب؟؟ هو حد ضامن عمره يلحق يتوب ؟؟ مش يمكن يعجبه الوضع وما يتوب ويدخل النار وتكون إنت السبب ؟؟ أرجوكم ..لا يكب الناس على وجوههم في النار إلا حصائد ألسنتهم.. فكروااااااا قبل أن تنطقوا	27-05-2014 08:50 AM أنثى مفكرة إلى بلقاوي التبليغ عن إساءة
38 -	احترنا معاكو .... الشب لازمو اكم درس خصوصي حتى يعرف يتصرف مع البنات .. الشب غشيم .. بعدين انا لا اقصد العلاقات الجنسية .. بل اقصد التعارف والاخذ والعطا والدخول في حورات مختلفة حتى يعرف طبيعة تفكير النساء ليتمكن فيما بعد من التعامل مع من يردي الزواج بها بكل منطق ... لانه الشب بحكي انه ما عندو خبرات سابقة ... يعني الشب ضعيف اجتماعيا .. الخبرة مطلوبة بالحياة	27-05-2014 09:13 AM البلقاوي - الى انثى التبليغ عن إساءة
39 -	اخي الكريم:ـــ لعلي ابدأ معك مما انتهيت به..(وانا مقتنع تماماً ان هاي البنت لاتصلح الي كزوجه بس و الله قلبي مو راضي يقتنع...) حتى يكون زواجك ناجح ومستمر لا بد ان يقتنع عقلك وقلبك بالفتاة...وانت تقول انها لا تصلح لك كزوجة...وانت مقتنع تماما بأنها لا تصلح لك كزوجة وما قلت ذلك إلا بناءا على كثير من المواقف التي حدثت بينكما وحددت عليها رأيك..ولكن تعجبك بعض الصفات فيها والتي جعلت قلبك يتعلق بها...وحتى تقنع قلبك انها لا تصلح لك لا بد لك ان تعطي نفسك فرصة اخيرة للعلاقة بينكما وعليه انصحك بما يلي:ـــ1.لتعلم اخي اكريم انك لست الوحيد في هذه المشكلة فهي تواجه كثير من الشباب المغترب فهو يخطب لأسبوع ثم يسافر وتبدأ المشاكل...سواء من طرفك او من طرفها...لذلك اعلم ان الكثير من المشاكل لا يتم معالجتها عن طريق الهاتف لانها قد تفهم بطرق مختلفة ولأن حركات الجسم والعيون لها تأثير كبير في حل 80% من المشاكل..(وانا اقول هذا الكلام لكثير من المواقف حصلت مع اصداقاء لي وكان حلها ليس الهاتف)لذلك ولتحديد علاقتك بخطيبتك تنزل اجازة وتكون طويلة نوعا ما وتجلس معها وتتصافى معها من جميع المشاكل والمواضيع العالقة..ان استجابت لك فهو ما تريد وإن اصرت على الطلاق تتعرف منها على الاسباب...لأنه قد يكون هناك اسباب ليس لك اي دخل فيها وما تقوم به ما هو إلا حركات منها للتخلص من هذه الخطوبة التي قد تكون برئيها انها استعجلت فيها لأسباب ترجع إليها...2.كما قلت لك تتعرف على اسباب تمسكها بالطلاق ولعل من بين الأسباب ما يجعلك تقنع قلبك انها لا تصلح ان تكون زوجة لك...3.اكثر من الإستغفار والدعاء واستعين بمشكلتك بالصبر والصلاة...4.بقي ان تبحث عن الوسائل التي تساعدك على نسيان من احببت والتي من بينها ان تتذكر سيئاتها ومساوئها وتابع ردودي على بعض مشاكل نسيان الحبيب..5.إن قررت الفراق (فسرحوهن باحسان) وابحث عن الزوجة التي تسرك إذا نظرت إليها تطيعك إذا امرتها تحفظ مالك وعرضك إذا غبت عنها..وتكتم سرك....واستعن بالله ولا تعجز...واعلم ان الخير كل الخير فيما كتبه الله لك....الله اسال ان ييسر امرك ويفرج همك ويكتب لك الخير حيثما كان ويرضك به...محب فلا تلوموني	27-05-2014 12:13 PM محب فلا تلوموني التبليغ عن إساءة
40 -	طلقها واضربها بـ.... ما تكون رخيص يحوي هاي البنت لعوب الي كانت تحكي معهم بالساعات شباب سيبك ما تقنع حالك بغير هيك ادعس على قلبك وبيع الي ببيعك طلقها بالعشره وشفلك وحده مستوره ندير بالها عليك نصيحه اخ لاخوه	28-05-2014 04:07 PM نصيجه اخ لاخوه التبليغ عن إساءة
41 -	السلام عليكم. حبيت اتشكر كل الي علق على الموضوع،بس عندي كمن شغله بدي افهمها، هل اذا اني حبيت وحنيت واهتميت بالشخص الي بدي اقضي باقي عمري معو، بكون اهبل و ضعيف الشخصيه، واذا حبيتها بكون كمان اهبل، انا الحمد الله هيك وان شاء الله راح اكون معها او مع غيرها، لان هيك انا تربيت، وشخصيتي هيك او ماراح اغيرها مشان حدا، و نفس ما حكا بعض الاخوان، ان البنت طلعت على حقيقتها قبل ما نتزوج لان بعدها راح يصر صعب اني اطلقها. او ولله اني الاشي الوحيد الي مزعلني انو راح البنت تكون مطلقه بس، انا عارف انو ربنا راح يكتبلي الي احسن منها، و ان شاء الله ربنا يكتبلها الي احسن مني. وشكرا كتير لكل واحد علق على الموضوع لان ولله بحس حالي بين اهلي هون	28-05-2014 05:51 PM غريب متعذب التبليغ عن إساءة