بقلم : د. فاضل الزعبي
بدكو تغيرو المختار .. ليش ما نغير مجلس القريه أول ...
يا أبو فهي بدنا غيرهالوجوه لمجلس ألقريـــه حتي يحترمهم ألمختـــار و شلتة...
ما انته شايف شلة ألمختـــار... اللي بيقول أهـــل ألقريـــه مسقعين و وجهم بارد ... و اللي بيقول أهـــل ألقريـــه ناقصهم ادب.. وحتى لما اتشاطروا و حاولو سحب السجاده من تحت المختار .. ما قدروا ... يمكن أهـــل ألقريـــه باردين فعلا..
بس هموه باردين اللي جأبو للمجلس واحد بياع بزر و فستق ... واحد جليس بودي و سمكره ... و نطـــاط و كشيش و أبو خشبه –يعني طوبرجي- و دليل سياحي و فوطبولجي و كمل من عندك ...
وقف عندك يا أبو عنـــاد.. كلها فهمتها الا النطـــاط .. هاي فهمني اياها...
النطـــاط رسب بالتوجيهي و ما لقى شغل هاجر و نط على بره…
اشتغل حمال... اي ايشي. و لا يرجع بلبوط....

المهم حوش و اشترى كونتينر و نط و روح وباعه و بدت تزبط معه .. كونتينر ورا كونتينر و الأشيه معدن..
نط من كونتينر على عماره و العماره صارت قريه سكنيه و مشيت اموره... وراها نط و صار صاحب شركة انتاج فني و مسلسلات...صار معه قروش كثيره فنط عالسياسه. و دخل و نط مجلس ألقريـــه...

نص المجلس ما بيعرف يحكي ... عشان هيك كان شباب ألقريـــه السياسين المهترئين و المتقاعدين يكتبولوهم الخطبه.. لما يكون مطلوب منهم خطبه في افتتاح المجلس و لا مناقشة موضوع مهم...

و الطوبرجي اللي بدو يدافع عن حقوق اولاد الاردنيات اللي ابوهم مش اردني لقى حاله بدوس على حقوق ناس ثانيين و هو مش داري ... مهي المصيبه انو الاخ مش عارف انو هتك عرض ناس ثانيين .. طبعا مهو التلقين ماشي و حقوق الانسان مش متعلم عليها و لا مشربه بدمه.. ماخذها موضه .. اخ و الله ما انا عارف مين البندوق في هالايام ...
اما اللي نازل يشتغل وكيل للمشعوذين و قاعد بيجر في الكبير و الصغير حتى يطمن على حاله انه ظايل مع المختار و لا رح يحلقله ...
يا زلمه المختار احتفالا بيوم المرأه العالمي .. رفع رسوم عقود الزواج .....
ولا في واحد ناسي انو هو بيمثل بلد كامله و داعس فيها بيقايض الحكومه على باطل و الادهى انو المختار خضعلوه و قايضوه على حتة تصويت بامر بمس كرامه و سياده القريه كلها ....

و الله ماني زعلان من ألمختـــار لانوه هيك مجلس بدو هيك مختار... بس يا حرام مش حاب احكيها انو كمان هيك قريه بتجيب هيك واحد لازم تسكت و تصفق للمختار و خلص عاد.. من جهه بتنجحو ألنطـــاط و من جهه ثانيه بدكو تسحبو البساط من تحت المختار و ما قدرتو ..... مش عاجبكوا ألمختـــار.. بس عاد.. اي المختار دق و غرز رايته و مسح كل سيئاته من ورا هالمجلس المقهور ...
طول ما عندكو نطـــاط و كشيش ما راح يصير براسكو خير.....