البحر الميت .. رح يموتنا معاه ..

12-12-2013 11:33 AM

تعديل حجم الخط:

بقلم : د. فاضل الزعبي

و لك يا ابو عناد باعوها كمان مره.... وقعوا مع ابو داود و ابو العبد ميشان يربطو البحرين...
ابو عناد قالوه اسمع مني و جاوبني اذا بتقدر...
لما ابو داود احتل ارضنا.. شو عملنا غير الحكي و هيوه بعدو قاعد فيها... صح..
لما اخذ الميه كلهـــا... كلها من اعالي روافد نهر الاردن و حرم مزارعنا منها و بدا ينشف البحر الميت و بحيرة الحوله كمان.. شو عملنا غير الحكي و ظل يشرب الميه كلها...
لما كان ابو داود يبيع و يصدر بوتاس من البحر الميت... شو عملنا غير الحكي اللي ما فاد...
و هسه زعلانين على اتفاقية الربط....بحجة انو هذا اعتراف...
لعاد اتفاقية اوسلو شووو... و وادي عربه شوووو...يعتي هاي اللي جابت التايهه....
هسه كمية الميه اللي راح نوخذها للشرب قليله... فهمنا..
و كمية الميه المالحه اللي رح ترتمي في البحر الميت قليله.. فهمنا..
و انتو عارفين انو كمان اربعين سنه رح ينشف و يصير جوره مالحه و يصير نعبر مشي لعند اولاد عمنا...
طيب فهمني يا فصيح يا ابو باري ... لو كانت الميه اكثر ما عندك مانع و ما بتكون اعتراف بابو داود ؟؟؟ علينا يا مندلينا ..ما احنا قشرناك بايدينا !!!
يا اخي القروش اللي بدهم يعطونا اياها قليله هسه و بتكفي اربع مواسير.. لقدام شوي دبر مصاري و مدلك كمان عشر مواسير جنبها..
و بعدين صرتو كلكو خبراء و اختصاصين... اللي بيقولك مواسير 180 كيلو الميه رح تعفن و تتعبا بكتيريا..
و اللي بيقولك هذا تطبيع سياسي و اقثصادي... مهي الخظره تبعت ابو داود مغرقه السوق.. وحدوا الله عاد...يا مدبر حمير العرب..دبر حمارك...
لأ لأ...في واحد قالك هاي خطه ميشان تغرق الاغوار... على اساس الميه رح تيجي عاليمين و ما بتروح عالشمال.. هسه الميه قليله و لا رح تغرق الغور.. اي شو جاب الزرقا للبلقا !!!
اسمعني عاد ...حملوه شوال فصع .. قال حطو الثاني..
خلي هالميه تيجي ... و حياتك اذا ما عملوها ما رح ايشي يتغير.. لا ترجع الارض.. و لا يلغو وادي عربه و اوسلو ولا يبطل ابو داود يوكل من البوتاس..
و اللي بدو يرجع ارضه ما رح تمنعو ماسوره و لا اربع مواسير.. مش هيك...
ارحمو البحر الميت بلكي يعيش... و اذا ما عاش على الاقل يشربو الناس ميه...
مش سلام الاصبع لا بيضر و لا بينفع...