بقلم : د. فاضل الزعبي
ابو فهمي ما انفك يسمع من هذا و ذاك، ألقريه اولا ، الانتماء للقريه، كل الولاء للقريه،
و منهم من يقول زي البهلول ابو دعبله ، يجب ان نبدأ باردننة ألقريه ، الله يقردنكوا على هيك حكي، هيك تخلف، برجعونا ميت سنه لوره ، قال شو زي سعدنة السعوديه اللي بدوها قبل سنين ، و شو يعني؟ و من وين سعدنه؟ من سعدان. !!! يعني و لا يكون اردنه من إروود (يعني قرود بالمدني).

ألقريه بلد كبير بقيادته ، اللي حطتلوه ثوابت منذ تاسيسه، القريه المتسامحه، القريه الكريمه اللاي جعلها الله من الهينين اللينين ، و اختصها الله بقضاء حاجات ابنائها و ابناء الناس من القرى اللي حواليها، حبب الخير في ألقريه و حبب ألقريه بالخير ، هذه طبيعة اهله و شيم سكانه، و روح قيادته، اللي ديدنها المحبه و الخير للجميع.

اخوانا اللي مش لاقيين شغل غير هالاسطوانه، هم اول ناس مشكوك بولائهم. بتلاقي اعلامي في منبر بيكتب عن كل اولاد الدنيا و اعمالهم و مواهبهم ، و لما يجي الموضوع لاولاد بلده، بيلغي المقال و بيقول : اقلعه يا زلمه احنا فاظيين لهالمطقعه، و السبب انو مش من قريته و لا من القرى اللي جنبها، قريته بعيده شوي ، و بعدين ما دهن، عارفيين شو يعني ما دهن ، يعني ما فتش ، لازم يفت، و بيحكولي عن الولاء و الانتماء. وحدو الله يا جماعه.

انا بحمد ربي انه هالاشكال مش كثار و مكشوفين و سعرهم واضح و معروف، و ميشان هيك الموضوع ما بيخوف ، على مبدأ اللي بتعرف ديته .... و كملو من عندكو.

صديق ابو يوسف، الحاج ابو فهمي بيقول انه قي صديق ليه، طول نهارو بيتشكون ، البلد مش لينا ، اليلد مش لاولادها ، و من هالحكي الفاظي، و حظرته بيعيد في اسطوانته المشروخه اياها، البلد اولا ، البلد فوق الجميع ، و يا حبيبي لما منتخب الفطبول يلعب مباراه ، بيلبس البهلول كولور المنتخب و بيحط طاقيه ألقريه، و بيلف على رقبته شماغ و على خصره العلم ، بيطلع كشكول و لا مهرج فاشل , بهلول ، و ما بيروح عالملعب يشجع ، بيتسلبط على الكوفي شوبات اللي تلفزيونها ببث المباره و بعمل هيصه ببلاش عندهم، مهمو عارفينوه ، و بيتصور لما يدخل جوول و هوه بيتنطنط و بيحطها عالفيسبوك بعد دقيقه ، و الملعب بعيد عشر دقايق عن الكوفي شوب. يا حبيبي على هالوطنيه الخمس نجوم.

بين كل كلمه و اختها بتلاقي البهلول بيحشر كلمات زي البلد ، الولاء ، الاخلاص ، الانتماء ، و كمان ألقريه النه ، مع انه صاحب الكوفي شوب اللي بيتسلبط عليه من اخوانا المهاجرين المحترمين من القرى اللي حوالينا و اللي بيحبو البلد و شيخها.

نفس هذا البهلول لما بيسمع انو ابن بلده اشتغلوه شغله كويسه ، يعني بناله شقه حلوه و لا فتحلوه سوبر ماركت مرتب ، و لا حتى غنى اغنيه لايقه، بتلاقي البهلول حمل حملته ، و طلع شقته كانها خشه ، و السوبر ماركت طلعت دكانه مترين في مترين و اغنيته زعيق و نشاز .

العم ابو يوسف زهق من شكاوي الحاج ابو فهمي عن صاحبو البهلول، و قلو : ميشان الله فكنا من هالسيره ، ميشان الله اقلع صاحبك البهلول و ابعده عنا.