زوجتي نسخة عن أمها

11-05-2014 08:59 AM

تعديل حجم الخط:

سرايا - سرايا - انا شاب عمري 29سنة.. راتبي 600 دينار .. وعندي بيت بيجنن كلفني 30 الف بيت ملك وعندي سيارة ... حبيت بنت وقبل الخطبة سألت عن عيلتهم .. حكوا لي العالم ابوها تارك امها من سنين لأنه ما قدر يتحملها ..

وإخوانها تحت سيطرة الأم وحتى انها خلتهم يطلقوا نسوانهم .. ثلاث شباب طلقوا ثلاث نسوان بدون ذنب .. حتى انه وحدة من النسوان حرمتها ام الشاب تزور اهلها 10 سنوات وبالآخر طلقتها بعد زواج 13سنة و3اطفال ضلوا مع ابنها ..

المهم لما سمعت بجبروت الام .. حكيت مع البنت وقلت لها ما بقدر ارتبط فيك ..

صارت تبكي وتترجى وتقول انا الك وما حد يتدخل .. واعطتني وعد انه تنسى اهلها ...

المهم خطبنا وبعد سنة تزوجت .. وصارت مشكلة بحفلتنا سببها الأم .. ويومها الام حلفت يمين الا تطلق بنتها ... اما اليوم او بعد سنين ..

المهم مشت الحياة ..ومن يوم الحفلة البنت تسمع من امها وتنفذ الحكي حرفيا .. والام ما تركتنا من تدخلاتها ... حسستني انه هي الزوج ..

وخلفت من زوجتي طفلة بتجنن .. وعمرها سنة ونص ..

المهم كنت اترجى بزوجتي ترجاية تبعد امها عن حياتنا الزوجية .. بدون فايدة وكنت اذكرها باللي

عملته أمها بالحفلة وانها تسعى بطلاقنا من اول يوم

ويشهد ربي كم حبيت زوجتي وهي عمرها الان 23 سنة وجامعية .. وأنا ما قطعتها من امها نهائيا كل اسبوع تنام عند اهلها يومين من 3 سنوات زواج ماغابت عن أمها ولا اسبوع ..

قبل شهرين صار نقاش بيننا عن تدخل امها بحياتنا .. وبعثتها على امها كالعادة لما طلعت على دوامي .. وبس رجعت بدي اروح انا وإياها على بيتنا .. طلعت الام وحكت لي " ممنوع توخذ بنتي .. يا بترحل وتستأجر جنبي او تطلق بنتي " ..

ترجيتها لا تخربي بيت بنتك مارضيت .. فتركتها وروحت

وبعد اسبوع الام جابت شرطي واخذت اغراض بنتها كلهم ورفعت قضية نفقة ..

رحنا على المحكمة والقضاه بهدلوا زوجتي على طلبها بالرحيل من بيت الملك لبيت إيجار ..

المهم نهاية القصة انا بدي اخطب قريبا واتركها عند امها تشبع فيها .. وشفت اكثر من عروس وانبسطوا اهلهم فيّ بس شرطهم اخلص من قصة البنت الاولى .. يعني اما ترجع وما اتزوج او اطلقها وساعتها بيوافقوا على الطلبة ..

معي حق باني اتركها عند أمها واتزوج غيرها بما انها مثل امها بالضبط .....

واسف على الاطالة

طباعة

المشاهدات: 109195


1 -	ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.	11-05-2014 08:59 AM سرايا
2 -	كلام عين العقل اتركها عند امها وتزوج وحده بنت عالم وناس خلي اختيارك هلا المره مضبوط وطلق الاولى خلي تشبع عند امها وشكرا الك	11-05-2014 09:07 AM بنت الشامية ـمعان التبليغ عن إساءة
3 -	معاك حق الأم هي إلي خربت وزوجتك سببها إنها بتحكي صغيرة وكبيرة لإمها	11-05-2014 09:31 AM أنا التبليغ عن إساءة
4 -	انا بنصحك ما تستعجل كونه اقدرت تعيش سنتين مع مرتك معناته في مجال ترجع لعقلها اعطيها فرصه وما تنسى انو عندك بنت زغيره ما تستعجل	11-05-2014 09:55 AM jem التبليغ عن إساءة
5 -	طلقها اليوم قبل بكرا.............خليك رجل قوي وصلب خلي امها تنفعها لازم اليوم اليوم اليوم تطلقها اكثر اشي بالبلد بنات الناس((في بنات ناس كثار)) سيبك من الهم ووجع القلب طلق وانسى الموضوع	11-05-2014 10:40 AM عمر555 التبليغ عن إساءة
6 -	عزيزي تجربتك من نفس تجربتي، وعندي ايضا ابن، لا تقنع نفسك وتضللها وتدمر سعادتك والاستمتاع بشبابك مع انسانة لا تستحقك، البنت لأمها والله لو كانت ملاك، ابحث عن الهناء مع بنت الأصل والها كبير في العيلة رجل يحترم وله كلمته، ابدأ باختيار الأم قبل البنت، ارجو ان تسمع لنصيحتي وكن صارما ولا تتخاذل، المكتوب مبين من عنوانه. نصيحة والله قصتي نفس قصتك وأخذت قراري بعد اربع سنوات من المرار.	11-05-2014 11:01 AM امير التبليغ عن إساءة
7 -	لا ما تستعجل واطلقلها ولا تستعجل تتزوج قصتك بدها وقت لا تنسى الحب اللي كان لزوجتك وانت من الاول بتعرف قديه امها قويه مع هيك اتحديت الكل واخدتها زي ما بدك هلأ بعد ما صار في ولاد اتزكرت انه امها قويه زي ما عشت معها ٣ سنين لا تضيعهم بعدين عالحالتين رح تضل تصرف عليها الله يكتبلك اللي في خير	11-05-2014 11:09 AM لمار التبليغ عن إساءة
8 -	بشتو قاعد تستنى ولك طلقها فورا وارميها على امها ... اصلا انت غلطان من اول يا ابن الحلال ليش تتزوج وحده امها مطلقة يعني التفكك الاسري بالوراثة وكلهم مشاكل .. شو الله جابرك توجع راسك ... طلقها حالا او ارفع قضية شقاق ونزاع عشان تدفع بس نص المتاخر ... وروح اتزوج غيرها	11-05-2014 11:24 AM البلقاوي التبليغ عن إساءة
9 -	صديقي عندما قرأت قصتك تفتحت جروحي على الرغم من انني اتخذت قرار الانفصال ولم انفذه كوني اعمل بالسعودية، ولكن بأذن الله تعالى قريبا جدا سأبعث بورقة طلاقها. صديقي ما قدمته لزوجتي ولعائلتها كان كرما لا يوصف وذو اخلاق رفيعة، تغربت وابتعدت ولكن للأسف زوجتي امعة ومن دون عقل اطلاقا فأمها مسيطرة حتى وبنتها بعيدة عنها. استنفذت جميع الوسائل وتوصلت لقراري متأخرا وتعلمت درسا من تجربتي " اللي ما بتعرف تحافظ على بيتها واسرتها وتتحمل جوزها في السراء والضراء، خسارة فيها تتسلم بيت وأسرة وتعيش بكنف زوج يحميها ويحافظ عليها، خليها الآن تعيش مطلقة وتنهشها ذئاب المجتمع، وخلي امها تنفعها.	11-05-2014 11:43 AM أمير التبليغ عن إساءة
10 -	الله يسامحك كل هل بتعرفه عنهم وصدقتها انها ما رح تصير زي امها كان لازم تفكر بعقلك مش بقلبك طلقها وتزوج بنت حلال تعرف قدسية الزواج وتد ير بالها على بيتها اللي هو جنتها لانه الاولى مسيطر عليها من قبل الام الله لايسامح هيك امهات	11-05-2014 12:03 PM ام علي التبليغ عن إساءة
11 -	البنت - زوجتك - خالفت الاتفاقية بينكما وسمحت لامها بالتدخل اعطها انذارا نهائيا اي تعود الى بيتكما ولا تسمع لامها ولا تسمح لامها بالتدخل فان وافقت فاعدها وان رات غير ذلك فاتركها وتزوج غيرها	11-05-2014 12:09 PM ورد الحمزات التبليغ عن إساءة
12 -	اخي خليك مع الجانب القوي وهو الله .والله مع الاصلاح ما استطعت.تصرفك بعتمد عل حبك لزوجتك وبنتك وحاجتك الهم ابعت لزوجتك رسالة ’’زوجتي العزيزة انا اقدر حبك لامك وبرك بها بس انت بتعرفي عدم قدرتي على استئجار بيت تاني لوجود بيت ملك عندي وانا ما زلت عالعشرة بيناتنا وفكري لاني بناء على اجابتك رح لتصرف’’اخي القانون والناس حواليكم بصفك ويمكن حتى البنت واخوانها كمان بصفك لا تتعجل بقرارك اهدوء دلالة حسن التصرف اذا هي متهورة لاتتهور كرمال بنتك اللي بتجنن ...	11-05-2014 12:41 PM لانا التبليغ عن إساءة
13 -	اخي الطلاق مش شيء سهل اله تبعات اسال نفسك انت قادر على تحملها المهر ونفقة البنت ويمكن سكن وتعليم البنت بكرة وانت راتبك 600 دينار !!!حاول تصلح وجيب اهل راي وحكمة من العيلتين ~ماتخلا الامايكون في~وحطوا الام تحت امر واقع وبتخلص من تدخل الام وبحزم منك كمان ولا شو!! اذا مامشيت الامور متل مابرضي ربنا هون بتفكر بالطلاق وتبدا بحياة جديدة وبدها وقت..الزواج اخي مكلف والطلاق كمان لاترهق حالك ..الله ييسر امرك	11-05-2014 12:54 PM لانا..تابع التبليغ عن إساءة
14 -	صديقي عم بقرأ التعليقات والأحداث تعيد نفسها. صديقي انا طلقت زوجتي طلقة رجعية انذارا لها ولم اسعى اطلاقا الى ارجاعها وهي من طلبت الرجوع مع الرجاء الشديد واخبرتني بأنني تعلمت درسا قاسيا والحياة علمتني وبعد مرور سنتين الأحداث عادت نفسها تماما وعايرتني بأنني ترجيتها كي تعود وممرنا بجميع الظروف السابقة ولم تحرك زوجتي ساكنا. استنتجت يا صديقي بأن العقول الخاوية مهما حاولت تثقيفها وتعليمها لن تجدي نفعا. صديقي انت اقدر على تقييم موقفك ولكن أرجو ان تأخذ بنصيحتي، قارن وجودها معك او بدون ، اذا جاءك الشعور بأن وجهها شؤم عليك وعلى مستقبلك فاذهب مباشرة الى المحكمة وانهي الأمر مع تمناتي ان تكون تملك مؤخرها كاملا حتى تنتهي نهائيا والله رح يعوضك والله غير يعوضك، اهم اشي تكون ما قصرت واللي عليك عملته وزيادة. أخوك أمير	11-05-2014 12:59 PM أمير التبليغ عن إساءة
15 -	يسعد رب .. فعلا انك زلمة ارميها وخليها تشوف نظرات المجتمع	11-05-2014 12:59 PM البلقاوي - الى امير التبليغ عن إساءة
16 -	ياجماعه طولو بالكو ع زلمه طلقها طلقها دبت فيكو حميه هسا مهو كل بنات مثل بعض لويش نضحك ع حالنا في متل بقلك ترتح بلمنحوس لايجيك انحس منه وانا حكيتلك بتعليق الاول ما تستعجل كل ناس بتخطي حاول تقعد مع مرتك وتحاول تفهمها .	11-05-2014 01:05 PM jem التبليغ عن إساءة
17 -	قوي قلبك واذا بدك مرتك وبنتك اطلبها على بيت الطاعة وانت لا تخلي امها تقرب عليكو وغير رقم التلفون وقنن زياراتها لاهلها هيك بسير للي بختار مرة مالها كبير تحسبله حساب وبعدين شوهاي جايبه شرطي يوخذ اغراضها وليش شوصار هاي آخرتها شرطة والله الام بدها ترباية وانت جيب شرطة وخذ مرتك غصب عن عين امها بس سؤال انت حكيتلنا كل شيء بامانة وا خبيت عنا اشي؟لصالح البنت؟	11-05-2014 01:15 PM مشكلجي التبليغ عن إساءة
18 -	نصيحه الطلاق مو سهل وبعدين عندك طفله ولو شو ما صار اصبر عليها واحكي معها يمكن امها بتحكي حكي البنت مش موافقه عليه ولاتخطب ابدا لانو اول حب بحياتك هو اغلى حب بكفي بنوتك ارجع ورجع المي لمجاريها	11-05-2014 02:13 PM متزوجه التبليغ عن إساءة
19 -	صديقي، انا كمان مرتي جابتلي شرطي عالبيت واخدت اغراضها بعد كل هالدلال والعز عليها وعلى اهلها. دفعت دم قلبي عليها وعيشتها في رغد ومستوى راقي جدا وبالآخر بتهجم امها علي وخواتها ومعركة في بيتي بس طلقتها الطلقة الأولى. اللي صوتها بعلى ومش سائلة عن فضايح هاي ما بتنضب ببيوت، فما بالك تجيب كمان شرطي، ياحبيبي صديقي مرتي عمرها تلاتين سنة ومتل الخاتم بأصبع امها فمابالك مرتك عمرها تلات وعشرين!!! صديقي انا معي تلات شهادات جامعية وامها بستهزي بلم شهادات قاعد، حسبي الله ونعم الوكيل بالمناسبة والد زوجتي متوفي وانا متأكد بأنه توفي جلطة من ام زوجتي وخواتها السبعة ونصهم مش متزوجين وزوجتي اصغرهم. حبيبي دور على زوجة تستطيع ان تربي رجال............ أخوك امير	11-05-2014 02:43 PM امير التبليغ عن إساءة
20 -	من بين سطور رسالتك تبين مدى حبك لزوجتك..والدليل من قبل زواجك بها مع علمك المسبق بتدخل امها في حياة اخوتها ومع ذلك قبلت بها زوجة وانت اعترفت بقولك احببتها قبل الخطبة...ولأجل المحبة التي بينكما ولأجل الطفلة التي تربطك بها...انصحك اخي بالتأني قليلا ومنح زوجتك فرصة حتى تراجع حساباتها...وصدقني مثل هذه الزوجة تكون مغلوبة على امرها وانا استغرب انها فتاة جامعية وعمرها تعدى 23 سنة ولا تستطيع ان تأخذ القرار الحاسم والرجوع إليك...ولكن هناك الكثير من الأمهات اللواتي كما وصفت يسعين لخراب بيوت بناتهن او ابنائهن..وصدقني مرت علي حالة قريبة من حالتك بزوجتك وتدخل والدتها في حياتها كان سببا في طلاقها...فنصيحتي لك:1.اتصل بزوجتك وحدثها بخطورة الموقف وانك تريدها هي ولا تريد امها ولا تريد اي تدخلات من امها...2.إن لم يكن مجال للإتصال فيما بينكما حاول ان تدخل حكما من اهلها..يكون صاحب حكمة وعقل...وليسعى للإصلاح بينكما..ويسعى للتأثير على الوالدة بالتخلي عن موقفها...3.اكثر من الإستغفار والدعاء فمعه الفرج...4.وسمعت مقولة من مستشار اسري يقول...اخي المطلق اختي طالبة الطلاق..قبل ان تفكروا بالطلاق إن كان لديكم اطفال وخاصة بنات فكروا مليا قبل اتخاذ اي قرار...اتدري لأن الفتاة ستعيش وينقصها شيء من حنان الأب او الأم...نهاية المطاف وبعد ان تستخدم جميع الوسائل لعودة زوجتك إليك إن لم ترضى وتقتنع تسعى لتطليقها...والخيار يكون لك في النهاية....الله اسأل ان يؤلف بينك وبين زوجتك ويردها إليك ردا جميلا...اللهم اجمع بينهما على خير...محب فلا تلوموني	11-05-2014 03:08 PM محب فلا تلوموني التبليغ عن إساءة
21 -	ذكرتني باب الحارة حماتك شكلها زي فريال وبعدين الواحد يتزوج عشان يرتاح مش كل يوم زعل ووالخ اذا حياتك زي ما تحكي بلاها الجيزة او ترجع على بيتك وزيارة لبيت امها ما في وسلامتك	11-05-2014 03:48 PM باب الحارة التبليغ عن إساءة
22 -	خليها عند ماما، بس حاول توصللها خبر انك عم تخطب، بلكي شعرت بالذنب هي وامها ورجعت عالبيت (زي ما صار بباب الحارة يعني)، وفي حال انها ما رجعت خلي كل شي بينك وبينها يمشي بالقانون حتى ما تخسر حقك، واستشير محامي. والله يجيب اللي فيه الخير.	11-05-2014 04:18 PM فداءحماد التبليغ عن إساءة
23 -	انتا رجال وطلقها وخليها ترد على امها الله لا يردها ولا يرد امها	11-05-2014 04:24 PM امير الياسمين التبليغ عن إساءة
24 -	نصيحة لالك احكي معها وفهمها شو غلطها لانها بكرة راح تندم واسال مجرب فهمها	11-05-2014 04:34 PM samah التبليغ عن إساءة
25 -	اتركها وارتاح بكرة بتعملل باولادك مثل ما امها عملت باولادها وبتخرب بيتهتم وبتربي بناتها زيها وما حدا بوخذهم بظلو بوجعك نصيحتي لا تتورط وانت وصلت لسبب الطلاق المقنع اذا كلام امها بهمها اكثر من كلامك وهي اعطتك وعد واخلفت فيه ..... طلقهااااااا	11-05-2014 07:01 PM دنيااا التبليغ عن إساءة
26 -	شوف انا مريت بنفس حالتك تماما زي ما بتحكي انت و صدقني الطلاق هو الحل فية مثل بلجيكي بقول ( ,if you wanna marry marry the mother)بالعربي يعني اذا بدك تتزوج لازم تشوف كيف الام و كيف منهج الام و علي اساسة بتتزوج البنت انا زواجي الاول استمر ستة شهور و بعدها طلقت زوجتي و كانت حامل بالشهر الثالث طلقت زوجتي جكارة في امها لانها اعتقدت اني يوم من الايام راح امشي علي كيفها طبعا لما طلقت ارجعت شوية في تاريخ ام طليقتي وجدت انها حرقت حالها في الزمانات لانة زوجها كان يمنعها تطلع عند خواتها و كمان وجدت انها امراة كاذبة بتتبلي علي الناس و كمان كانت تسب علي زوجها و لا تزال يعني ...... خلال فترة الستة الشهور فترة زواجي اعطيت طليقتي و امها فرص كثير بس لاسف ل ناس زي هيك ما لازم تعطيهم فرصة من اول مشكلة لازم طلقت نصحيتي لك طلق و لا تتطلع وراء لانة انا عانيت نفس مشكلتك و الصلح في هيك مشاكل ما لة فايدة دور علي بنت حلال تكون الام صالحة و تكون مرباية من بنت اهلها و يكون ابو زوجتك زلمة يكون لة كلمة في البيت ما يكون عبد مامور زي حماي و الله يسير لك بنت الحلال	11-05-2014 07:32 PM ادريس التبليغ عن إساءة
27 -	من حكيك بيت وثلاثين الف وراتب 600 شكلك شايف حالك ومش اشي كبير الي تحكي فيه المهم ع نيتك الله اعطاك وحده عيطت مشان توخدك ماخديتك مصلحه والموضوع من اولو مشاكل ليش تبداه	11-05-2014 09:45 PM واحد التبليغ عن إساءة
28 -	عزيزي صاحب المشكلة قرات كل الردود والاغلب حكى انك تطلق وهاد الشي منطقي عشان تبعد عن هاي الكآبة اللي انت فيها رغم انك عليك حق من الاول بالارتباط كونك كنت عارف واستمريت لمجرد انها ترجتك . بمعنى اخر اخدتك العاطفة عن العقل .وهيك انت تعايشت معها وشفت كل شي بعينك صحيح انها حبك الاول وانكم كنتو بعلاقة حب وارتبطتو ولكن اتوقع انو بطل هالحب الو مكان عندكم بعد كل هالمشاكل . الخيار الك انت اولا واخيرا وانت اللي بتقدر تقرر لانها حياتك وهاي نفسيتك وانت عارف كيف ممكن انك تحلها .وعلى فكرة كلام بعض الزملاء واضح انو عن تجربة كمان وحكولك الصافي من منطلق عقلي مو عاطفي. خلاصة الحكي اول شي انك تصلي استخارة . وبعد هيك ازا قررت الانفصال روح عمحامي واعرف شو اللي الك وشو اللي عليك بكون اريح لراسك وهاد الشي طبعا عشان تعرف تكمل حياتك بعيد عنها . وبعرف انو موضوع بنتك ماثر عليك بس صدقيني حتى لو ضليتك مع مرتك بنتك ما راح تعيش طفولتها وبس تكبر راح تربيها مرتك مو انت وراح تتطبع على طباعها بكل الحالات . بس المنطق بيحكي انك تبعد عنها لانو بكرا حتكون الكلمة كلمة مرتك -او حماتك- مو كلمتك وبكل شي .	11-05-2014 10:53 PM عاشق التبليغ عن إساءة
29 -	برضو كلام رقم 19 اعطاك الحل الشرعي لانو الطلاق بييجي باخر النزاع وعشان انت تكون عملت اللي عليك كمان حاول بالامور هاي وخليه يكون في طرف من اهلك وطرف من اهلها وشوف شو اللي بصير قبل ما تقدم على خظوة الطلاق وربنا يختارك الاحسن	11-05-2014 10:59 PM عاشق التبليغ عن إساءة
30 -	طول بالك بركي امها ماتت ، شو ذنب الطفلة	13-05-2014 01:39 PM انسى وشجع النمسى التبليغ عن إساءة
31 -	الاخ الكريم انا صار مع قريبي نفس الشيئ تماما العائله تحت سيطرة الام( اولادها طلقوا زوجات وزوجات ولهم خبرات طويله بالطلاق والنزاع والشقاق خبره امتدت عقود من الزمن وتزوج قريبي ابنتها عن حب وبعد زواج لم يتعدى الشهرين اختلقت الام كل انواع المشاكل وان الزوجه لا تعصي لامها امرا فحص الطلاق وربحت الام اموال الزوج التي جمعها من تعبه وعرقه وكل ما اجلس معه الان يقول اللهم خذ حقي منهم بالدنيا والاخره واشفي غليلي من النصب والاحتيال الذي وقعت فيه لاناس غاب عنهم الدين والضمير وتاجروا ببنتهم وباعوا الزوج واهله مع ان الوزج والزوجه هم من افضل الناس وسمعتهم بالعلالي بالاخلاق والتعامل وان والده ووالدته يقولوم ان الفلوس التي استولى اهل الزوجه عليها ظلما يقولون ( يقونها في منام اولادهم) فهل نتعظ بني البشر ونراعي ديننا الحنيف	13-05-2014 03:11 PM رقيب التبليغ عن إساءة
32 -	طلقها وتزوج غيرها لأن الذي لاتقدر زوجها وتحترمه وتطيعه بصراحة لافائدة منها وسوف تبقى طول حياتك تعيس معها وهي الذي جنت على نفسها بعدم الرجوع معك الى بيتك	15-05-2014 12:34 PM المهندس التبليغ عن إساءة
33 -	معك حق طلقها ع شان امها تنبسط	18-05-2014 01:34 PM الشوابكه التبليغ عن إساءة
34 -	أذا مارجعت لحالها لا ترجعها و بنفس الوقت دور على بنت حلال تسمع كلمتك . حماتك بتغار من بنتها و مشان هيك ما راح تريحك طول عمرك ،،، حتى لورجعت زوجتك أتجوزعليها و عيش مع بنت تقدس الحياة الزوجية و تحترم بيتها و بتخاف على اولادها .	18-05-2014 03:55 PM علي زيادات التبليغ عن إساءة
35 -	اخوي صاحب المشكلة مشكلتك حلها بسيط كثير لا تتسرع باي اشي ممكن تندم علي بس بدي اعطيك الصح عن خبرة اول اشي يا خوي مرتك وعدتك واخلفت بوعدها ثانيا يا غالي خلي البنت عند اهلها لا ترجعها للبيت ولا تترجا اي حد عشانها البنت لو بتخاف وتحسبلك حساب كان ما صار هيك بس الحق عليك من اول وهسا راح احكيلك كيف ترجع الامور للاحسن اول اشي لا تزعل عليها الي جابها يجيب غيرها ونت زلمة ما بعيبك اشي العيب عليها هي واهلها مثل ما يقول المثل المرة خيرها لجوزها وشرها لاهلها يا خوي اسمع كويس هسى هي عند اهلها ابعثلها مسج بالتلفون واكتبلها في انو معك مهلة فترة اسبوع واذا ما رجعتي لبيتك انا راح اتجوز وطلاق لا تحلمي في بالمرة راح اخليكي طول عمرك مربوطة ما تعرفي تتصرفي بالمرة انت اذا طلقت راح تدفع يعني على الجهتين دافع دافع لذلك احفظ كرامتك وخليها معلقة ونت عيش حياتك وتجوز وشوف اذا ما رجعت عندك خدامة لا تطلقها واتجوز بعد المهلة الي تعطيها اياها وانت متجوز من الثانية بتمشيها على كيفك الاولى لانو مو مطلقة والباقي عندك	19-05-2014 08:28 AM بــنــي صخــــر التبليغ عن إساءة
36 -	انت طرف في المشكلة ... وعفوا ما سمعنا الطرف التاني زي ما بتفكر حالك صح هي وامها بتفكر حالها صح ... في نقطة "مهمة" عفوا برضو بنتك المسكينة اذا طلقت امها بتصير بالمجتمع اللي ما برحم عفوا "بنت لمطلقة" وبنعاد نفس مسلسل سنوات الضياع ///	19-05-2014 08:38 AM اوعى التبليغ عن إساءة
37 -	اوعى تفرط بمرتك لانك بتحبها وانت حكيت اصبر عليها لاتظلمها ابدا خليك جمبها	01-09-2015 12:12 AM هنادي التبليغ عن إساءة