سرايا - سرايا - انا بنت عالم وناس ومن عيلة منيحة وعم بدرس بالجامعة .. تعرفت على شخص وحبينا بعض 3 سنين وهو اكبر مني بس دارس توجيهي فقط..

فتح معي موضوع الخطبة من اول ما تعرفنا على بعض وكان صادق كتير معي.. بس اهلي ما قبلوا حتى اكمل دراستي ولانه اقل مني تعليما

بس هو قرر يستناني حتى اتخرج لأنه بيحبني ..وقال لي ما رح يرتبط بحدا غيري لو شو ما صار ..
وسافر سنة حتى يحسن مستواه المادي .. ولما رجع أثث بيته وكانه لي .. الالوان العفش وكل شي انا بحبه

حاولت كتير ابعد عنه ..لاني خفت انه ما يجمعنا النصيب... وقلت له إذا بدك تخطب وتشوف حياتك خصوصا انه كل اخوانه خطبوا وهم اصغر منه .. لكنه اصر انه ما رح يرتبط بغيري .. حتى لو انا ارتبطت .. رح يستناني

اخر مرة حكى معي اكد لي انه بيحبني بس اهله عم يضغطوا عليه بقصة الزواج .. لانه الوحيد اللي ما تجوز لسه وكبر بالعمر ..وآخر جملة حكى لي إياها انه لو صار وخطب مش رح يخبرني عشان ما يجرحني ..

بعد يومين.. رنيت عليه ما بيرد ومغلق تلفونه .. وضليت ارن لمدة 4 ايام والخط مغلق .. خفت يكون صاير معه شي
حكيت مع صاحبه عالفيس وسالته عنه

قال لي : مين انتي ؟؟ هو خطب .. أنا تفاجأت كتير بس حكيت له : مبروك .. بس هو مبسوط ؟؟
رد علي : كان مش مبسوط .. وقال لي ابوه ضغط عليه يتزوج وهدده يغضب عليه إذا ما خطب..
معقول الشاب ينغصب ؟؟؟؟ انا مش قادرة اصدق
انا ما صدقت وقلت له : بس ليش ما حكالي وليش يغلق تلفونه؟؟
قال لي : طلع رقم جديد وما بقدر اعطيكي اياه
قلت له : بدي احكي معه باي طريقة وبدي افهم منه ليش هيك عمل في؟؟ حب 3 سنين راح عالفاضي ..
انا مش عم بنام ومش عم باكل بسببه ..ولا حتى عارفة اعمل شي ولا ادرس حتى
مش مصدقة انه خطب .. مش قادرة استوعب الفكرة
بدي احكي معه عن طريق صاحبه وبدي افهم ليش هيك عمل معي ؟؟؟ ليش كان يضحك علي ويقول لي بيحبني وما رح يرتبط بحد غيري

حاسة حياتي فاضية بدونه .. كان كل اشي بالنسبة الي
شو اعمل بحالي .. شو لازم احكي له وكيف اواجهه ؟؟ ساعدوني