بقلم : الدكتور المحامي ربيع العمور
خطاب الملك اليوم كان غير، فيه نَفَس مختلف... فيه صدق، وفيه وجع، وفيه رسالة لكل أردني يحب البلد مش بالكلام، بالوجدان. لما قال الملك: "نعم، أقلق أحيانًا، لكن لا أخاف إلا من الله، ولا أخشى شيئًا ما دمتم خلفي"، حسّينا كلنا إنه بحكي بلساننا، بحكي وجع الوطن وتعب الناس، بس كمان بحكي ثقة وقوة من جوّا.
هاي الجملة لحالها كفيلة تذكّرنا إنه القائد مش بعيد عن هموم شعبه. القلق مش ضعف، القلق حب… واللي بخاف على وطنه بقلق عليه. واللي ما بخاف إلا من الله، بيضل راسه مرفوع حتى لو الدنيا من حوله بتغلي.
الملك اليوم حكى عن الأردن اللي انخلق في محيط أزمات، وهاي مش مجرد جملة، هاي حقيقة تاريخية. من يوم ما اتأسس البلد وإحنا بين نار وريح، لكن دايمًا منطلع من كل أزمة أقوى. مش لأننا أغنى أو أكثر عدد، بل لأننا أصدق وأشد تماسك.
وحكى كمان عن التحديث الاقتصادي والسياسي، عن رؤية مش بس على الورق، عن طريق طويل لازم نمشيه كلنا سوا — حكومة، نواب، وشعب. لأن الإصلاح مش شغلة فئة، الإصلاح مسؤولية بلد كامل.
اليوم وأنا بسمع الخطاب، حسّيت إن القلق اللي جوّاتنا مش خوف… القلق محبة. محبة لبلدك، إنك بدك تشوفه بأفضل حال، محبة لأولادك إنهم يعيشوا بكرامة، ومحبة لقائدك اللي بشوف فيك شريك مش تابع.
أنا قلق مثلك سيدي،
بس والله ما بخاف إلا من الله،
وبحب هالتراب اللي ربّانا وعاش فينا قبل ما نعيش فيه.
وبقلق من أجل بلدي، مو لأني ضعيف، لأني بحبها أكتر من نفسي.