بقلم :

 كلمة بيقولوها ببرنامج تلفزيوني بنشوفه على احدى الفضائيات للطلاب الي مرشحين للخروج من الاكاديمية ، طبعا الطالب الي بطلع نومينيز مشكله كبيره بالنسبه اله او بالاصح كارثه وكأنه رح يفقد اشي عزيز عليه ، والغريب بالموضوع التفاعل اللامعقول مع هذا البرنامج بنشوف فلان ببكي على الطالب الفلاني والشباب عندنا بيقضوا نص وقتهم مجحرين بالتلفزيون علشان يشوفوا شو بيعملوا الطلاب بالاكاديميه وشلون بيتصرفوا يمكن علشان يقتدوا فيهم وكأنهم بيراقبوا شخصية دينيه او سياسيه او اجتماعيه معروفه ، ولما يشوفوا مسلسل عن سيرة حياة شخصية تاريخيه او دينيه ما بعجبهم وبصيروا يتأفأفو . حتى الاطفال صاروا مغرمين بهذا البرنامج وصاروا يحرموا اهلهم حتى من نشرة الاخبار ويجبروا اهلهم على شراء صور للي بيسموهم ابطال الاكاديميه ، والمفاجأه حتى العجايز صارن يتابعن البرنامج في عجوز بتقولي يا ميمتي صرت انام معهم واقعد معهم الله لا يوفقهم حاطين حطاطهم على هالولد مش داري شو بدهم منه . انا ما بحارب حدا بمقالي ولا بحرض على حدا وبعرف انو في النا ممثل بالاكاديميه وبتمناله التوفيق وقلبي مع اي واحد بيمثل بلدنا الغالي . بس انا شخصيا غير مهتم بمتابعة هيك برامج مش السبب انو انا انسان مثالي او اشي ثاني السبب بكل بساطه انو انا ما بهمني اشوف الطالب الفلاني بتغزل بالطالبه الي معه او بلعبلها بشعراتها او مين هو الي صوته احلى ، واخوانا بالعراق وبفلسطين قاعدين بنذبحوا ، وبعض الشعب الاردني مش لاقي حق ربطة خبز . الواحد مننا بشوف مواقف بتخليه يتأمل بالوضع الي حوله ، قبل فترة كنت راجع من دولة عربية مجاورة وانا بالطريق لقيت ختيار واقف على جنب الطريق بستنى حدا يركبه ولو انه ما لوح بايده من عزة نفسه فوقفت وكان بايده كرسي حديد بس هو بالفعل شبه كرسي وما كان شايله علشان يقعد عليه كان جايبه علشان يضيفه لرزق اولاده الموجود بالشوال الي كان على كتفه طبعا الشوال كان مليان علب عصير فاضيه ، فلما وقفت خجل الزلمه لانه الكرسي الي معه وسخ فقلي انا اصلا هذا الكرسي ما بدي اياه قلتله عمي كيف ما بدك اياه وانت متغلب وشايله معك حطه ورا واركب ، حط الكرسي والشوال بالسياره من ورا وركب جنبي وكان خجلان شوي فسلمت عليه وسألته شلونك عمي فكان يرد بخجل وكاني مقدمله اشي كثير لاني وقفت وركبته معي وانا بيني وبين حالي مبسوط جدا اني انا الي ركبته مش حدا غيري وكنت بتمنى انو يفهم هذا الاشي ويشيل الخجل ، للحظه من اللحظات نسيت انو في حدا جنبي وشردت بتفكيري بعيد ونسيت كل اشي ، نسيت ان العالم كله بتعرض لموجة ارتفاع بالاسعار وصرت اسأل نفسي ياخي الناس الي بيرفعوا الاسعار بيعرفوا انو في ناس مثل هالختيار الي راكب معي ولا بس بيعرفوا ابناء الاحياء الراقيه بعمان بحكم مناصبهم يعني بيروح بس على عبدون والرابيه والشميساني بيشوف الناس الي هناك وبيشوف السيارات الي بيركبوها وبيشوف الحيوانات الي بيربوها وبتكون احيانا راكبه مع الناس بالسيارات واحيانا بتكون مطلعه روسها من شبابيك السيارات ، وبيشوف طريقة حياتهم المترفه وتعاملهم مع المال والي فيها نوع من التبذير والاسراف الي الفقراء اولى فيه ، كنت اطرح على نفسي هيك اسأله لانه هذا الواقع يوم بنسمع عن عيد ميلاد لبس او كلب كلف المبلغ الفلاني طيب هل من المعقول انو يكون في بشر مش لاقيين حق خبز وناس بتعمل اعياد ميلاد للبساس ، انا مؤمن وكلنا مؤمنين ان كل واحد الو نصيب بالدنيا رح يوكله وانو الفقراء ربنا ارحم فيهم من البشر ولا انا جاي اقاسم الاغنياء برزقهم بالعكس الله يرزقهم ويرزق كل امة محمد عليه السلام ولا انا بحسدهم ولا كنت بيوم من الايام من الناس الي بيحبوا يتفلسفوا او ينظروا على غيرهم بس مشاعرنا كمسلمين وكأردنين بتخلينا نحكي هيك ، وفجأة تذكرت الزلمه الي راكب معي وخفت انو يفكر اني ما بدي احكي معه او اني ركبته وخلص فطليت عليه وقلتله الله يعطيك العافيه عمي وكنت خجلان من خجله فقام يسولف معي ويضحك ويسألني من وين انا وكنت اجاوبه ، فسألته انتا من زمان كنت واقف على جنب الطريق قبل ما اوقفلك ؟؟ انا سألت السؤال بعدين هو استلم الحديث كامل وجاوبني وقال انا يا عمي تعودت ما بهمني قديش بوقف الامر عادي انا بطلع من البيت الساعه سبعه الصبح وبوقف حتى الاقي سيارة تجيبني للمنطقه الي اخذتني منها بكون شوالي معي وبصير ادور واجمع العلب وانا مقسم المنطقه لاقسام يعني المنطقه الي بدور فيها اليوم ما بدور فيها بكره وبضل امشي واحاول اعبي الشوال لغياب الشمس بعدين بوقف على جنب الشارع حتى يوقفلي حدا ويركبني علشان اروح على بيتي انا يا عمي لا تفكر ما دورت على شغل انا دورت بس لاني كبير بالسن ما لقيت شغل فاخترت هذا الشغل لانه عندي عيله ولازم اطعمها خبز وعندي بنات خايف اذا حدا اجا يخطبهن يقولوا ابوهن شحاد فما لقيت غير هالشغله والله يا عمي حتى كهربا ما عندنا بالبيت لانه ما معي ادفع مصاريف الكهربا احنا بنولع بالبيت شمع علشان نشوف . لما كمل الختيار المكافح قصته كانت دموعي رح تنزل بس كنت كاتمها لحد ما انزله ما بدي يضعف بسببي او يحس انو وضعه محزن وبالفعل وصلنا للمكان الي بده اياه ونزل ومش غريب انو كان رغم فقره شهم ونشمي وصار يجير علي جيرة الله انو انزل اتعشا عنده بس اعتذرت لاني لازم اواصل سفري وودعته ورحت ، هون كنت افكر انو في ناس بدها الكهربا علشان تتفرج على الاكاديميه وتشوف النومينيز وناس بدها الكهربا علشان اولادها ما يخافو من العتمه او يقدروا يدرسوا ، وصرت اقارن انو الختيار من الساعه سبعه الصبح بطلع بالصيف وبالشتا على منطقه صحراويه وبضل للمغرب علشان يوفر لقمة خبز وبعض الناس بتقضي نفس الوقت قدام التلفزيون ، هاي حكمة رب العالمين ولا اعتراض عليها بس ليش ما يكون النا دور كمجتمع مدني كأخوان بمساعدة بعض وسد احتياجات الفقراء ليش ما يكون دور صندوق الزكاة اكبر من هيك لانو الزكاه حق للفقراء باموال الغنياء ، بس وما نيل المطالب بالتمني وعلى رأي المثل ان كثرة همومك غنيلها او دق على المجوز اريح . وانا ببشركم انو اذا ضلينا هيك ما نحس بجارنا الجيعان واخونا الفقير والطفل المريض والمسكين رح نكون كلنا نومنيز على رأي الجيل الجديد ( جيل الواكس والخصر الساحل ) ومش رح نلاقي حدا يصوتلنا .