سرايا - سرايا - هالرسالة يمكن تسبب بانه ارجع لعقلي ولطبيعتي وممكن تكون فضفضة وممكن الاقي مساعدة من بعضكم وتجريح من بعض اخر ، بس هاد رح يكون اعترافي ولاول مرة رح بعترف ..!
انا صبية ٢٢ سنة بدرس بالجامعة ،بتقدرو تحكو انسانة واعية عالدنيا، الي متزوجة سنة من انسان كنت اعرفه وساعدني وحبني كتير وبسبب انه ساعدني انا ما قدرت ارفضه هو كتير طيب وكتير منيح معي من كل النواحي وما بيقصر ابدا ، علما الا ما يصير شوية مناوشات واعتقد متل هيك صفات اي انسانة بتتمنى هيك واحد ، بنفس الفترة اللي كنت خاطبة فيها(سنة ) رجعلي صديق قديم ، كنت اعرفه وبهالفترة ضلينا نحكي ويوم عن يوم اتعلقنا ببعض وحبينا بعض ولليوم لسا منحكي ،هالبني ادم عشت معه ايام سعيدة وحبني لدرجة كبيرة بحيث انه قررت اتطلق ونتزوج وهو بيستنى بطلاقي ، ولهلأ انا بحكي معه ومش ماخده قرار بالنسبة للطلاق لانه مش عارفة اصلا انه اذا بقدر ابعد عن زوجي ومش متخيلة برضه حياتي بدونه ، بنفس الوقت انا بعيش تأنيب ضمير قوي جدا ، وعارفة حالي خاينة وبعرف شو الشعور انه انا بعمل شي غلط انا من جوا بقتل بحالي وبتألم بكل لحظة! ومش لاقية مين اللي ينصحني ! بعرف طولت عليكم وبعرف رح تحكو كتير وتلوموني .. بس اعتقد بحاجة لنصيحة اكتر ! بتخيل انه الله معطيني الوقت عشان افكر وعشان ابعد وبيعطيني هالفرصة عشان اتصلح وبرضه انا مش قادرة بحاول وبحاول وبرجع بكمل حكي ! وخايفة اموت وانا خاينة وغلطانة اولا بحقي وبحق زوجي وبحق ديني اللي ما بيقبل اللي بعمله ..!
طبعا ما رح اكتب اكتر من هيك واوضح ، بس مضمونها مفهوم ! بتمنى انه الاقي النصيحة اكتر من التجريح ، بس ازا كان في تجريح رح استقبله بصدر رحب لانه عارفة بستاهل هيك وممكن انه يساعدني اكون للاحسن ..