سرايا - سرايا - انا متزوجة من سنتين عمري 24 سنة و عندي ولد من تاني شهر الولادة صارت خلافات بيني و بين زوجي لاسباب كتيرة اولها تدخلات اهلو فيني و اللي وصلت لحد انهم ياخدو الاكل و الشرب من بيتي و ما يخلولنا شي و دايما رافضينني و ازا رحت عندهم اتقرب منهم بدهم ياني اشتغل كل شغل البيت و في الاخر كلمة منيحة ما بسمع واخر شي صارت الخلافات تدخل ع بيتنا و انتو عارفين انو النفاس بحاجة لراحة و مع هيك ما رحموني و لا ريحوني صارو يستغلو ضعفي و ييجو يعملولي مشاكل و انا لا حول لي ولا قوة كل اللي بقدر اعملو ابكي و بس و بعمري ما شكيت لاهلي كلمة و زوجي ما كان يرضى يحكي انو الحق معي خايف انو يعطيني عين ع اهلو مع العلم انا شخصيتي قوية و قدرت افرض استقلاليتي عنهم لانهم ببداية زواجي بدهم يقتحمو خصوصية بيتي و بدهم يفوتو ع بيتي من غير علمي و لكن انا حطيت حدود بالطريقة الصحيحة و المحترمة .

لكن بفترة ضعفي استغلو الوضع و حرضو زوجي علي و صار زوجي انسان تاني خارج عن السيطرة مع انو بحبني و بحترمني و بعمرو ما غلط فيني و انا كمان بحبو و تحملت ظروفو الصعبة وصلت بيننا لدرجة انو بطل يرضى يجيب حفاضات و حليب لابنه و رفض يعطيني قسط الجامعة للفصل القادم و رفض يعطيني مصروف نهائيا و يترك البيت بلا اكل و لا مي حتى و صار يحتقر اهلي و يسمعني كلام مش شحلو و يتركني ابكي و يحط اللوم و الحق عليي و يرفض يتقرب مني و يكره احكيلو و لو كلمة حلوة و يتركني و يروح مع اصحابو اخر شي رحت لبيت اهلي بعد شهرين من المعاملة السيئة و لما رحت لبيت اهلي حكيتلهم عن الوضع و صارو اهلو يسعو لطلاقي و لكن هو متمسك فيني و صرلنا ع هالحال سنة بالتمام و انا وياه تصالحنا و تراضينا ع اساس انو يجيبلي بيت بعيد عن اهله و ما يرجع يقصر في بيته بس هو طلب مني انه ما استقبل اهلي في بيتي بعد عودتي و حسيت هالشي اهانة الي و فوق هاد لا طلعة و لا نزلة الا ع الجامعة يعني بدو يعزلني عن العالم انا خايفة انه بده يعزلني عن العالم لانه بده يضل يسمع لكلام اهله و يتغير معي و يرجع يعيشني القهر و المعاناه و بده يخليني بعيده عن اهلي لحتى ما اروح عندهم في حال قصر معي و غلط فيي.
ساعدوني بنات يا ترا شو الصح ؟ مع العلم اهلي مشددين على عدم الرجوع و بيحولي انفدي بولد واحد و اطلقي احسن ما يصيرو بكره اربعة و خمسة .