كلي أمل بغد مشرق

07-01-2014 09:31 AM

تعديل حجم الخط:

سرايا - سرايا - السلام عليكم متابعي موقع سرايا المحترم
انا شاب ابلغ من العمر 28 سنة واعاني من مشكلة اثرت ع نفسيتي وغيرت نظرتي للحياة والناس بشكل كبير

من فترة سنة بدئت ابحث عن بنت حلال اجد معها الاستقرار النفسي والعاطفي والروحي واكنت اتطلع ان اكون عائلة ويكون لي بيت محترم اجد فيه الاستقرار مع انسانه احبها وتحبني,,

بعد عدة زيارات وبعد ما شفت بنات كثير استقر قراري على بنت شفت فيها الادب والاخلاق والخجل من اول جلسة جلسنا فيها تمت الخطبة وحسيت بالحب والاحترام بينا

الى ان جاءت الصاعقه اللي صدمتني من الحياة كلها اكتشفت بان خطيبتي بتخوني مع شخص سبق وانه تقدم لها وما صار نصيب لسبب اجهلو رغم بحثي عنه
مش بس هيك اكتشفت انو صاير بينهم اشياء كثير من احضان ولحظات حميمية واتاكدت من هالشي 100% لحتى ما اظلمها

جلست مع نفسي كثير لحتى اتخذ القرار السليم وبكل هدوء ذهبت الى المحكمه ودفعت لها حقوقها وطلقتها ..فوق الخسارة النفسية الاليمه كمان خسارة ماديه

مرت الايام وهالتجربة طورت تفكيري كثير وعلمتني وخلتني اكثر قوة واكثر فهم للحياة
الحمد لله قدرت بعدها انسى وتحسن مستواي المادي

مشكلتي الحقيقية باني هلأ اهلي مصرين يزوجوني والحوا علي اكثر من مره لكن انا رافض الان مش لاني فقدت الثقة بكل البنات مثل ردة فعل اي شاب صارت معو هالقصة .. انا عارف انو مش كل اصابعي وحدة .. والحياة ما بتخلى من بنات الحلال الصادقات الوفيات المخلصات

لكن لاني عفت الزواج كلو وبطلت افكر فيه مع اني لسه عندي حلمي الجميل باني اعيش مع انسانه بحبها وتحبني واكون اب ومسؤول

الله ينتقم من اللي كان السبب باحساسي المتضارب هاد
انصحوني يا ناس كيف اخلص من هالشعور هاد .. وسؤالي للشباب لو كنت بمكاني شو ممكن تعمل؟؟

طباعة

المشاهدات: 36222


1 -	ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.	07-01-2014 09:31 AM سرايا
2 -	ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.	07-01-2014 09:34 AM سرايا التبليغ عن إساءة
3 -	انا زوجي مر بنفس المشكلة وكانت معاناته كبيرة الا انه لم يقدم على خطوة الزواج الا باقتناع تام منه. صحيح انه فقد الثقة بجميع البنات وكان شكاك لدرجة كبيرة الا اني استطعت ان اغير فكرته منذ ارتباطنا بفترة الخطوبة لا انكر اني عانيت معه كثيرا وذقت الامرين الا انه الان تغير تماما. لذلك انت فكر جيد بالزواج لكي لا تندم على شي واحسن اختيار الفتاة التي ستكون جزء منك ومن روحك وتاكد مهما قلت انك انهيت هالمرحلة من حياتك الا انها ستكون موجوده ولن ينهيها الا زوجة المستقبل وبالطبع هاذ الشئ يعتمد عليها بالدرجة الاولى	07-01-2014 09:49 AM ؟؟؟؟؟؟؟؟؟ التبليغ عن إساءة
4 -	اول شي....خير ما عملت....يعني انا مش مصدق خاطبة وبتخونك...وبدك تتأكد من تصرفك..اكيد انت عملت عين العقل.... بس اجمل حياة في العمر هي فترة العزوبية...حاول تتأخر قدر الإمكان..وفي نهاية هو شر لا بد منو....حتى لو كانت زوجتك ملاك...حتشوف العزوبية ما في منها..سواء لشب او للبنت..اهم شي حاول تسأل عن البنت الي بدك تخطبها وأكتر شي في الجامعة هي الي بتجبللك اخبار البنت..بس البنات كلهم لما يشوفوا شخص محرز بمثلو عليه وبعملو حالهم ملأئكة و هي وأهلها وبعدين ببدو يكشفو عن حالهم....ليش ما تكون البنت صريحة مع الشب وتكون طبيعية هي وأهلها...لأنو في التهاية لازم كلشي ينكشف..	07-01-2014 09:52 AM مغترب في قطر التبليغ عن إساءة
5 -	عادي جدا انسى وانت عم تحكي الامل بغد مشرق وما في متل الصراحه بين الطرفين بس كتير مستغربه بتخونك وانتم خاطبين ؟ طب ليش حطبتك من البدايه ازا بدها واحد تاني نصيحتي لا تغرك المضاهر ابدا مو كل بنت او حتى شب حط عنيه بالارض وحكى بالدين والاخلاق بمتلكهم نصيبك لسى ما احى بتمنالك اختيار افضل في المره القادمه	07-01-2014 10:26 AM مجنونه بس بفهم التبليغ عن إساءة
6 -	يا صديقي هاي مشكله صارت المضحك المبكي ,, البنت بتخون مع انه حبيبها احسن من اللي بتخون معه ومش بس البنات في من كله ,,, انا رح احكي لك وخذ مني الخبر الاكيد ,,, لا تختار بنت بالطريقه التقليديه امك بتعرف امها لانه اذا بدك تعرف بنت اسال عنها شباب الحاره مش النسوان ,,, وعالعموم وبالرغم من نسبة فيهن الخير مخليات عنا امل الا انه الاغلبيه هسه الهم عالدواوين ,, منهن بتعتبره تسلايه ومنهن بتعتبره تصبيره اشي احسن من ولا اشي وفي بنات خاينات بطبيعتهن وهاي لا تقربها ورح تبين معك زي الخطيبه الاولانيه ,,, ابحث انت عن بنت الحلال وراقب وادرسها بعدين ارتبط انا لاغي الفكره كلها من كثر ما بشوف	07-01-2014 11:10 AM القبطاااااان التبليغ عن إساءة
7 -	ما في حدا ما عنده قصه حب	07-01-2014 12:05 PM بنت الزبيدي التبليغ عن إساءة
8 -	كيف تكون الخيانة وبها الالم الشديد .. ولكن لماذا لم تتروى و عندها نقول لا يأس مع حب الحياة .. فقد علمتنا قصص الحب الشيئ الاكيد .. الم تقرأ تحت ظلال الزيزفون .. الم تقرأ .. احببتك اكثر من اللازم .. فكن شجاعا يا رعى الله سواد عيناك	07-01-2014 12:35 PM عاشق بنصف فؤاد التبليغ عن إساءة
9 -	كيف تكون الخيانة وبها الالم الشديد .. ولكن لماذا لم تتروى و عندها نقول لا يأس مع حب الحياة .. فقد علمتنا قصص الحب الشيئ الاكيد .. الم تقرأ تحت ظلال الزيزفون .. الم تقرأ .. احببتك اكثر من اللازم .. فكن شجاعا يا رعى الله سواد عيناك	07-01-2014 12:35 PM عاشق بنصف فؤاد التبليغ عن إساءة
10 -	انا لو مكانك بادور على مهلي واسال كويس قبل لا اقرر اخطب لا تستعجل ابدا وتقع بنفس الخطأ	07-01-2014 12:44 PM مهند التبليغ عن إساءة
11 -	بدك هالايام تفتج مندل عشان تعرف البنت نضيفه ولا لا زمن بخوف من سابع المستحيلات تلاقي بنت ما عندهاش قصه بس قصه اخف من قصه ولا تحكي لا صغيره ولا كبيره اذا بنات بالاعدادي بحبن وبتمعشقن خليها مستوره	07-01-2014 01:46 PM عزابي التبليغ عن إساءة
12 -	نيال من جرب طعم الحب ونيالها الي عاشت قصة حب بجد ونيالها الي طلعت وراحت وحبت المهم عاشت عاشت بجد مشاعر بضل محفوره ما بتنسى مو مشاعر عورق مشاعر بخيال وبوهم بس خطيبتك خاينه لو قبل ما تخطبك عادي بس وهي خاطبيتك بتستاهلش تقهر جالك عليها	07-01-2014 02:11 PM هبله التبليغ عن إساءة
13 -	تجربتك قاسيه مافي شك ...بس لاحظ انك حكيت من اول لقاء تم النصيب ....مفروض بس تشوف بنت مناسبه تعطي نفسك فترة لحتى تسئل عنها منيح ....هاد مصير طول العمر ...يعني خطيبتك مافي مبرر لتصرفها بس واضح انها بتحب العاهه خطيبها الاول ...كمان انت بس تختار بنت بتحبك راح تخلصلك انت وماراح تخونك لاو كل الدنيا طلبت منها ...الحب هو ان تخلص له ولها حتى لو توفرت كل طرق الخيانه ....بس ماحدا يفهم غلط ..بقصد الحب الشريف البريئ .....نادر بس موجود ..بدك ماتتسرع بس لسبب انك ناوي تأسس عائله ...خد وئتك ...	07-01-2014 05:44 PM nadeeeeen التبليغ عن إساءة
14 -	الله لا يعطيها العافيه انت بتصرف وبتفوت عليها حامل محمل وهي بتحب بس السؤال القوي ؟كيف كشفتها لان في منهن صعب تكشفها وممكن لو سالت تسال بمكان شغلها مثلا بتلاقيها ممكن تكون محترمه جوات الشغل وبراته المخفي اعظم بالحاره برضو ممكن تكون محترمه جوى حارتها وبحارات ثانيه معجبه هههههههههه عشان هيك انا غسلت ايدي من كل جنس حوا كله كله انسى يا صاحبي انسى	07-01-2014 07:23 PM ...... التبليغ عن إساءة
15 -	نسيت احكيلك كلمتين انت شلون بتروح بتدفعلها مستحقاتها انا لو مطرحك برفع عليها قضية تضليل الراي العام هههههههههه	07-01-2014 07:30 PM ...... التبليغ عن إساءة
16 -	خلص يا سرايا انا وانتي يا سرايا اصحاب واذا اسمي مش عاجبكو هي غيرتو لابن ناس اتفقنا ههههههههههه	07-01-2014 07:46 PM ابن ناس التبليغ عن إساءة
17 -	بشكر الجميع ع ردودهم الطيبة انا يا اخوان اكبر غلط بحياتي اني بيأمن للشخص بسرعه وهاد خلل كبير بشخصيتي قدرت الحمد لله اعالجو وللاخت نادين بحكيلك انو ما بعرف كيف هيك صار كتب الكتاب بسرعه ومثل الحلم جلست معها مرتين وشفتها مثل الملاك براءة وخجل سئلت عنها وما سمعت عليها شي اتريها طلعت اكبر ممثله هي مش من البنات اللي تبين سمعتهن من الحارة والناس اللي حواليها هي من البنات اللي بيتخذن الدين غطاء تحمي فيه حالها ما بخفي عليكم اني انا بمرحلة من المراحل وصلت لافكار حرام وكفر لما وجدتو منها باظهار التدين الشديد كنوع من انواع المظاهر من قهري وصدمتي الشديده بانو كل هذا التدين وتسوي هيك !! حتى خف التزامي بالدين كثير لكن انقذت حالي اخيرا وشلت هالافكار السوداويه من بالي!!! وللاخ القبطان وعزابي والله انكو صادقين بكل كلمة وانا ما اتعلمت الا بعد ما انقرصت الان وبعد ما ادركت غلطي لا يمكن ارتبط بوحده الا اذا كنت بعرفها مسبقا وبعرف عنها كل كبيره وزغيره	07-01-2014 11:19 PM صاحب المشكلة التبليغ عن إساءة
18 -	تاثرت بمشكلتك كثير عارف ليش لاني مريت بنفس تجربة المراره الي تذوقتها انت انا وصلت لمرحله بثقش بجنس مخلوق عالارض ولا بنت ولا شب انا بطلت اثق بحالي قابلت في الحياه ناس ممثلين بستحقو جائزة الاوسكار باظهار الحب والاخلاص والوفاء لشريكتهم وبالاخر طعنه احكي طعنااااااااااااااااات تلو الاخرى ومع نساء للاسف من حثالة النساء وانا املك من الجمال والعفه ما لم تملكه نص نساء الارض بلا غرور ولا مكابره لكن تلك الحقيقه وعندي من الالتزام الديني والحمد لله ولكن بلحظه من اللحظات صدمت بالخيانه وصدمت بصديقات وصدمت بمحجبات ومنقبات وصدمت بمن كانن يتسترن بالدين وقصتي يطول شرحها ولكن ما زالت الحياه مستمره وما زال الامل بغد مشرق وما زال هناك وفاء وصدق وحب صادق تقبل مروري وكلماتي اخي واسفه للاطاله	08-01-2014 12:58 AM مصدومه الى صاحب المشكله التبليغ عن إساءة
19 -	والله يا اختي الظاهر انا واياكي بنشترك بالغلط نفسو انو كنا نعطي ثقتنا بسرعه لكن في ناس .... وما بيستاهلو هاي ضريبة طيبة القلب والظن الحسن بالناس وما رح اشك بكلامك بانو في محجبات ومنقبات مش مخليات شي والله بعد التجربة اتاكدت بانو المظاهر ما الها اي علاقة قبل كنت رافض رفض كبير ارتبط بوحده مش محجبه هلا ما عندي اي مشكلة بطلت اطلع ع مظهر البنت اهم شي الجوهر والحياة اكبر مدرسه شكرا الك اختي انتي متذوقة من نفس الكاس وانا مقدر شو حاسه وانا بحكيلك ياها اذا بدك توثقي بحد عدي للمليون وديري بالك والله الدنيا بطل الها امان	08-01-2014 03:32 PM صاحب المشكلة الى مصدومه التبليغ عن إساءة
20 -	فسخ الخطوبه لا يعني تحطم حياه... بل يعني تجنب زواج فاشل انظر للحياه ب منتهى الامل ول للدنيا ما أأأأأأروعك	09-01-2014 03:24 PM دكتور مغــــترب التبليغ عن إساءة
21 -	الله يكون بعونك وتلاقي بنت الحلال الي تصونك . انا دايما بحكي ادم مظلوم لاني بنت جامعية والجامعه من اسمها جامعه اشكال والوان و نفسيات .وشفت كتير و عفت حوا والساعه الي صرت فيها من حوا تعقدت لاني شفت العجاب الي متزوجه وبتخون والي خاطبه وبتخون و هلم جرا. نصيحتي الك ارتبط بوحده اسأل عنها بلحاره بلجامعه بلمدرسه وين ما اجيت. وخدها قاعده انتا بدك توخد وحده تربي ولادك مش تربي شباب .وبلتوفيق خيو	10-01-2014 08:23 AM ندى التبليغ عن إساءة
22 -	ردي على مشكلتك...يبدو من كلامك انك انسان مثقف وواعي ومتفهم الأمور وعلى خلق....لذلك لا تدع الموقف يؤثر بك ولا تحسبوه شرا لكم بل هو خيرا لكم...والله يعلم وانتم لا تعلمون...فلا تفكر فيما مضى فقد ذهب وانقضى...فكثير من المواقف نتعرض لها قد تؤلمنا في الظاهر ولكن الله له فيها الحكم التي نحن نجهلها...فتوكل على الله واحسن ظنك به وابحث عن الفتاة التي ترغب ان تكون زوجة صالحة ربة بيت متميزة...تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك....انصحك اخي بقراءة كتاب تحفة العروس...ففيه من المواعظ ما تبعد عنك هواجس الشيطان وترددك من الزواج....تزوج اخي لأن الزواج سنة الأنبياء تزوج لأن الزواج نصف الدين تزوج لان بالزواج استقرار نفسي وعاطفي وروحي...تزوج لانك تحتاج لولد صالح يدعو لك بعد موتك....فإذا مت انقطع عملك إلا من ثلاث من بينها ولد صالح يدعو لك...اخي الزواج جميل ورائع خاصة إن تزوجت الفتاة التي انت تختارها لدينها ولحسبها ولجمالها....فلا تيئأس ولا تقنط من رحمة الله والله يقول انا عند حسن ظن عبدي بي فاليظن بي ما يشاء وفي رواية ان كان خيرا فيخيرا وإن كان شرا فشرا....الله اسأل ان يفرج همك وينفس كربك ويرزقك فتاة صالحة تقية ابية ولود ودود تسرك إذا نظرت إليها تطيعك إذا امرتها وتحفظ مالك وعرضك إذا غبت عنها...محب فلا تلوموني	10-01-2014 10:27 AM محب فلا تلوموني التبليغ عن إساءة