بقلم :

بلا مؤاخذة، هاتولي حبة وجع راس يا خالتي... مش قادرِه إليوم... مش قادرة إلدنيا حـــر كثير، و ضغطي نازل.

طلعوا شباب صغار، من عمرك يا خالتي، كلهم إخوة، من عمارة، مش عارفه ثلاثة أو أربعة، و هجمولك على صاحب سيارة الغـــاز لأنه يا خالتي وقّـــّف سيارته حوالي ربع ساعة و صوت مسجل السيارة العالي، إللي الله يِكِسْـــرُه، ما سكت من الصبح بدري، كل شوي بروح و بيرجع عالحارة.

أبوهم للشباب ختيار و تعبان، و عندهم إمتحانات، و أختهم، بلا مؤاخذة، ولدت بعملية و جايبة الحزينة ولد خداج و ما معهم مصاري... يعلم الله كيف دبّروا حالهم، و الله لسه ما باركتلها.

المشكلة يا خالتي رصيف الشارع ضيّق ، يعني بالعربي رفيع و مزروع زيتون كمان ... راح واحد من الشباب ينادي أخوه لكبير، دخل عِرْق الزيتون بعينه و صارت العيلة عندها هم جديد فوق هم إبن أختهم الخداج.

هدول يا خالتي تبعون السيارات إللي بيجمعوا حديد و بلاستيك و كراتين في منهم بيسرق كل شي حديد و غير حديد قدامهم.

سرقوا بسكليت جوجو (جمانة) بنت سهيلة، وإشارات ممنوع الوقوف لأنها معمولة من الحديد يا خالتي ... ببيعوه خردة يا خالتي، و الجيران صاروا بعدها زي إللي راكبُهْ جـــن، يا رب دخيلك.

الغريب يا خالتي السيارة إللي سرقت البسكليت مكتوب عليها: عين الحاسد تبلى بالعمى ...!

دايمه عفنجان القهوة.... و الله يستر يا خالتي

شوف يا خالتي، أنا بتعامل مع زلمة تاجر بوسط البلد بخاف ربّـــه، محترم و إبن حلال، بظاعته كويسة، و سعره طري.

من يوم ما صرت أرملة، ما حبّيت أكون عــالة   عحدا، طيب صحتي كويسة و ليش ما أشتغل ليش؟

كل جمعة يا خالتي بشتري بظاعة و ببيعها في الحارة، يعني ملابس للجميع كبار وصغار، الشغل يا خالتي شو ما كان مش عيب، بس رجلي شوية شــادّة علي من يوم ما وقعت عليها درفة الخزانة إللي ما ركّــبها النجار كويس، الله يستر يا خالتي.

ببيع بالدّين لبعظ ناس. في ناس أكلوا عليّ المصاري و أنا عارفة   معاهم مصاري، بخافوش ربهم يا خالتي مثل إخوتي إللي أكلوا عليّ ورثة أبوي عشان زلمتي من عيله ثانيه ! هاظا يا خالتي بحط إلناس بالنار.

طيب أنا أرملة و بدفــــش بنتي بشوية مصاري "فلوس"، يعني بساعدها كل ما يكون معي، عيلتها كبيرة يا خالتي، و إبني يا خالتي طلع مثل خواله، مش سائل عني. حرمته "زوجته" يا خالتي متحكمه فيه مثل حكم فرعون.

بدّي أحكيلك سر يا خالتي. بتعرف الحكيم أبو صلاح، الله يعطيك العمر و تصير مثله. أبو صلاح كل شهر بناولني ثلاثين دينار و بعالجني بدون مصاري، وطلب مني إذا بعرف ناس محتاجين عشان يساعدهم.

بتعرف حدا محتاج مثلي يا خالتي ؟، مهو إللي بدل عالخير مثل إللي بيعمله.

بدّيش أطوّل عليك ... هاظا يا خالتي بنت الجيران، بنت محترمة و مربية كويس، جابت بالتوجيهي 95 و درست إنجليزي بجامعة حكومية قوية و معدلها جيد لما تخرجت، بتكتب و بتحكي إنجليزي مثل البلبل، إشتغلت بمدارس خاصة بس بدهاش تكمّل معهم لأنهم متحكمين فيها يعني ظاغطينها بالحصص و راتبها كثير ظعيف، بدها تشتغل بالحكومة لأنه أظمن. و لحد هســــه ما طلع إسمها في ديوان الخدمة المدنية. مسجلة صارلها أكثر من أربع خمس سنين    يا خالتي !!!

جوزها حلف عليها يمين ما تشتغل بمدارس خاصة. طيب يا خالتي الناس بتدوّر إدوارة عمعلمة انجليزي متفوقة. بالك في حدا من المسؤولين ممكن يتصل معها عشان تتوظف و يستفيد منها الطلاب بدل ما هي قاعدة؟ shafiqtdweik@yahoo.com