بقلم : فيصل عويد
مش عارف من وين ابلش
مش عارف شو احكيلكم .
والله القصه كبيره

تدحدلت الاخلاق من فوق الجبل وسقطت في وادي سحيق

سقطت اوراق التوت اللي كانت تستر كذبنا ونفاقنا وانكشفت عوراتنا اللي كنا خايفين انها تنكشف . ويالله ما ابشعنا بدون ورق توت او خرق وشماشير تستر علينا .
واللي قاعد يصير مش هين ولا سهل الناس بدها توكل بعض وبدل ما نكون مكملين لبعض صرنا نعيش باشي اسمو (صراع البقاء )


يا جماعة الخير يا مواطنيين تدحدلت شوية الاخلاق اللي كانت ساتره علينا وصار الكذب عادي والنفاق بالكيلو بنفطر رياء . بنتغدى نميمه وبنتعشى حسد

ذابت القيم الحميده في مزيج غير متجانس من البشر

يزم صرت تبكي لما تشوف واحد صادق . الك خاطر تعبطو من الفرح

صرت تبكي لما واحد يعطيك اولويه بالسير الك خاطر تحطلو شكر بالجريده .

صرت تستغرب من واحد واقف عالطابور وبستنى دوره بنظام وصرنا نقول عنو (لد هالهبيله)
او نتمسخر على واحد واقف على اشارة ضوئيه ما عليها شرطي او كاميرا ونقول هاظ مهسهس

يزم نفسك تسمع بعرس بدون طخ و اصابات نفسك يمر علينا عيد بدون فرد خرز . .

نفسك تشتري بكسة خضرة وتلاقي الحب اللي تحت مثل اللي فوق

اذا اجا رمضان بنهستر واذا اجا العيد بنهستر . عالمنخفض الجوي بنهجم عالمخابز ومحلات الخضره واذا اجا مرتفع جوي بنسرق كهربا من ورا الساعه

صرت تشوف الولد ابو العشر سنوات ماشي وسيجارتو اطول منو الفاظو سوقيه وبتحس ان الطفوله ماتت

والشب ابو خصر ساحل والا اللي لابس صندل بناتي والا اللي حاط مكياج هييييييه تاهت بينا الطرق يا ولدي . وصارت الانانيه سيد الموقف وشعار الناس هو اعيش انا ويموت من بعدي الاخرين .

وصرنا باسم الحريه الشخصيه نخدش الحياء العام ونتطاول على الاسلام ونعجب على حالنا وعلى الناس .
صار كل واحد فينا يعتبر البلد مزرعة لابوة ويتعامل معها بقسوة وعنتريه ... مش هيك يا جماعة الخير .

وبصراحه لما هاشم الخالدي والباشا خالد المعايطه يكتبوا عن الموضوع بيكون فعلا موضوع كبير وبدو وقفه .... يتبع في الرفشه القادمه.

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا