سرايا - سرايا - أنا مشكلتي معقدة.. وبصراحة مو عارفة كيف أبلش فيها.. أنا متزجة من 3 سنين وعندي ولد. فترة الخطبة كانت جيدة. كان شرط أهلي الوحيد إنه أعيش في بيت مستقل. وبالفعل كان في شقة عند أهل زوجي. لكن أوضاع الشقة ما كانت منيحة. وسلفي كان عايش بغرفة مع مرته واولاده وبيستنى الشقة تفضى عشان ياخدها. فاقترحت على زوجي إته نسكن بشقة عند أهلي. وفهمته إني ما رح أقبل بهالشي بدون موافقة والدته. وبالفعل صار هالشي. اتفق بابا وزوجي على إنه ندفع إيجار وزوجي وافق. المهم بعد الزواج صار زوجي يماطل في دفع الايجار. ومع هيك أهلي ما كانوا يطالبوه. وصدقا" كان ما يحترمهم ويقدرهم وكان بشكل أو بآخر يحسسهم انه هاد واجبهم! أنا بين فترة وفترة كنت أذكره بالايجار. فصار يجوبني إنه طالما إنت بتشتغلي إنت إدفعي لأهلك!! أنا ما بحكي عن حالي ملاك وما في حد كامل على هاي الارض.. آخر فترة و بدن علم أهلي حكيتله إنه أهلي بجهم البيت عشان يأجروه بس للضغط عليه مو أكتر.. وفي ليلة من هالليالي صارت مشكلة بيناتنا. فصار يحكيلي عشان الاسبوع الجاي بدنا نرحل عند أهلي مع العلم إنه ما في مكان نقعد فيه! أنا ما عجبني الحكي وسمعته كلمتين. باليوم التاني حكالي بدي اطلع عند والدك احكيله إنه بدي اطلقك وآخد العفش. أنا زي الهبلة صرت أبكي وأترجى! وبالفعل طلع لبابا بس ما عرفت شو حكاله. بس رجع عالبيت حكالي إنهم اتفقوا عالطلاق (هيك من الباب للطاقة) فأنا حكيت مع بابا وسألته وحكيتله إنه يجي. طلع زوجي كذاب ومو متفقين عشي. بابا حزت بنفسه وحكاله إذا بدك تطلق بتعمل هالشي من دون تهديد. زوجي بلحظتها تراجع وصار يبرر إنه هاي قرصة دان وقصده منها إنه يربيني. وطول الطوشة وهو بيحكي بدي آخد العفش. بابا عصب وحلف إنه يطلعه من البيت بالواعي اللي عليه!! ونزل اخوي وكبرت الهوشة. وصار زوجي يتطاول على بابا فجاوبه بابا إنت مو زلمة! المهم بآخر الليل بابا وأخوي اعتذروا منه وباسوا عراسه عشان إذا غلطوا بحقه وطلعوا. طلب مني إذا بحبه نروح نسكن عند أهله لإنه ما بيرضى يضل ساكن عند اهلي بعد وا تبهدل. وبالفعل أخدنا عفشنا ورحنا عند أهله. وبعد يومين روحني أنا وابني عند أهلي حكالي عشان أرتاح أسبوع زمان بعد التعزيل. وهاد الحكي إله 3 شهور. وأنا لهلأ عند أهلي. بعتلي كل تيابي وأغراضي. وما طلقني ولا رجعني عنده. مع العلم إنه لما كنت عنده كان يضربني ويحكي مع بنات غيري. أنا بدي حل. أنا ما بقدر أضل عايشة هيك.. 

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا