سرايا - وجهت الفنانة نشوى مصطفى رسالة إلى الشعب المصرى بعد شفائها من فيروس كورونا المستجد.

وقالت الفنانة فى مداخلة هاتفية إلى برنامج "كلمة أخيرة" الذى تقدمه على قناة "ON"، مساء اليوم السبت: "أبوس إيديكم لو بتحبوا ربنا وبتحبوا ولادكم إتقوا شر الألم اللى أنا حسيت بيه، حافظوا على نفسكم علشان ولادكم وأكل عيشكم كلنا على باب الله".

أضافت مصطفى: "كلنا على باب الله وماشيين بالأرزاق عشان أكل عيش ولادكم مش هينفع لو إنت عامل أو صنايعى ترقد، حافظ على نفسك أرجوك بالكمامة، كمامة تمنها 3 جنيه هتحافظ عليكم وهتخليك لبيتك وأولادك".

تابعت: "أنا كان معايا فلوس بس مافيش مستشفى كانت عاوزة تقبلنى من المستشفيات الخاصة لكن مستشفى بلدى العامة الحكومية قبلتنى أنا عندى فلوس وربنا ساترنى بس مكنتش بقدر أحط فى بقى لقمة، الفلوس مش مهمة لما تبقى معاكى ومفيش مستشفى راضية تقبلك أو قادرة تاكلى حتى، الصحة ياجماعة أهم من أى حاجة فى الدنيا، والنبى ماتستهونوا، كورونا دى صعبة جدًا أصعب من ألم الولادة".

وقالت: "أنا أهملت وإتكسفت من لبس الكمامة وماتسلموش على حد بإيديكم وحافظوا على التهوية والتباعد والتغذية، كلوا برتقانة وحزمة جرجير أو جوافة وحتة جبنة قريش دى نصايح الدكتور حافظوا عليها عندنا الحاجات دى رخيصة، إحموا نفسكم مع الكمامة ".

يذكر أن برنامج "كلمة أخيرة" تقديم الإعلامية لميس الحديدى ويذاع من السبت إلى الثلاثاء فى تمام التاسعة على شاشة "ON".