سرايا - انا بنت واعية مثقة بنت عالم متعلمة وبشتغل شغل منيح ووضعي المادي ممتاز وعندي من الجمال كفايتي
خطبت من سنتين وتزوجت من سنة واجاني طفل من شهرين

زوجي ما كنت بعرفه كان زواجنا تقليدي بس حبيته من كل قلبي واعطيته كل مشاعري وحياتي ، ما بقصر معه بشي ، قبل ما يطلب الطلب بكون عنده وهو بالبداية حبني وكنا كتير مبسوطين

اللي صار انه بعد زواجنا بشي ٥ اشهر نزلت لعبة ببجي اللي كلكم بتعرفوها ، نزلها زوجي وبلش يلعب وبلش يتعلق فيها واللي بعرف هاي اللعبة بعرف انه الانسان اللي بلعبها ببطل يسمع ولا بحكي مع اللي جنبه واقل جولة فيها بتاخد ٢٥ دقيقة ، بالبداية حكيت عادي بعدين زاد الموضوع صرت بحكي يللا الدنيا شتوية بلاش احرمه وعشان ما احس بفراغ دخلت اللعبة وصرت العب معه عشان نكون عالاقل بنعمل نشاط مشترك ، زاد الوضع بزيادة وانا كنت حامل وصرت اتعب وبطلت العب حكيت يللا معلش اكيد هو بزهق خليه وشرطت عليه انه بعد ال ١٢ بالليل ما في .. حكالي ماشي وما طبق وصار يلعب بالميت ٣ ساعات باليوم وبسهر كتير عليها وبسهرني معه لاني ما بنام الا لما يخلص وطبعا تاني يوم بتطلع روحي وانا بصحيه ،، تطور الموضوع صار يلعب مع بنات ، صرت لما احكيله يحكيلي ما بحكي معهم رد تطور الموضوع وصار بحكي معهم

كل فترة بنتزاعل وما في فايدة مستحيل يمضى يوم واحد بلا ما يلعبها .. بعد الولادة رحنا سافرنا عشان نغير جو وشرطت عليه قبل السفر انه ما بلعب لحتى نرجع ووافق وكان بالاوتيل يضل ماسك هالتلفون ويلعب

طبعا بالبيت يا دوب نحكي مع بعض كلمتين وصرنا بعاد كتير عن بعض بطل يهتم فيي وبطل يسمعني ولا بحاكيني واصلا لما بدي احكي معه كلمة بعيدها ٤ مرات وهو بكون متبع وبالاخر بزعل بحكيلي سامعك سامعك وهو مش كعي ابدا كل هاد وهو ابدا مش حاسس

حاليا انا جد وصلت لنقطة النهاية مش قادرة اتحمل اكتر مقهورة ومش عارفة اتصرف بحس حالي تزوجت بس عشان احمل مسؤولية طفل والبي طلبات الزوج بدون اي وجود الي ولكياني .. ناوية ادخل حد من اهله وبفكر ازعل اروح عند اهلي واكبر الموضوع

ممكن حد يشور علي بطريقة اتصرف فيها بعقلانية "