سرايا - سرايا - تعبت وانا اضل اكتب. قصتي طويلة بس رجاءا تكملوها للآخر وتنصحوني وانا ارجوكم ما تجرحوني لانه انا وضعي مو متحمل ....

الشاب الي بحكي عنه مواصفاته : عقله صغير..عصبي.لساته ولد مع انه عمره30 ..دفش كتير متمسح بدون مشاعر.وراسه زي الحجر.وحيوان..ووقح وبلا اخلاق وبلا ضمير ومش محترم.وعنده عقدة نفسية من البنات..

قصتي انه في شاب اجا وحكالي انه بحبني وبده يطلبني بالبداية ما كنت شايلته من ارضه بس بعدين حبيته ورفضت ناس كرماله...وانا

اذا شاب بالشارع اتطلع علي بفتح معي تحقيق من وين بتعرفيه وشو بده منك ..ع كل مشكلة بيهرب وينسى انه خاطب وفيه بنت اسمها خطيبته.سنة كاملة وهو حياتي معه بالخطبة عذاب بقهر وبدموع قضيت اغلب ليالي الخطبة يلي المفروض تكون احلى ايام وانا ابكي بالليل كل كلامي معه مقاتلات ليالي كتير خانقني بالليل نمتا وانا ابكي ولا عمره فكر يراضيني حتى بكلمة حلوة..اكتر من مرة حكيتلو وترجيتو بكفي انا بطلت اقدر اكمل خلينا نترك يرن علي بنص الليل يعيط انه ما تتركيني انا بحبك ومابستغتي عنك.وبس نرجع تنعاد المشاكل والخناقات...كل مرة يعمل مشكلة يغيب بالاشهر واقرر اتركه بس برجع بحنله لاني حبيته من قلبي ولما يعيط بضعف ومابقدر اتركه وبرجعله ..

اهلي كتير بهدلوني انه هاد هو اختيارك حكينالك ما بستاهل ضفرك ما رديتي.وصرت اتعذب اكتر ووجعي بوجعين..ترجيته ما يخيب ثقتي فيه حكيتله لو الي معزة ولو شوي بكفي تجرحني انا واهلي كون معي منيح..

اخر مرة تزاعلنا 4 شهور ماكنا نحكي واهلو ما حد فيهم سال عني او حكى مع اهلي. كان يبعتلي رسائل مو حب وعشق واشتياق بل رسائل انه تركك من اهلك واهلك ما بحبوكي واهلك رح يدمروكي تخربيش بيتك وانه ازا فسختي ما حدا بقبل فيكي وتعي نتزوج تعي نعيش لحالنا ببطل يصير مشاكل بينا وانتي الغلطانة وانا هسامحك..

وانا بقسم بالله يلي ما حد غيره فيه يخفف وجعي انه ما اذيته ولا جرحته ولاقصرت بحقه ولا بحق اهله..وتحملت من امه كرماله لماكانت تحكي انه احنا ما بدنا ياكي وانه هي بدها بنت اختهابس الحب اعمى.(مع انه انافعلا متعملة ومحترمة وحلوة وبنت ناس محترمين وطيبين).اعطيته فرص كتيرة بس ع الفاضي حكيت يمكن يتغير بس ع الفاضي بالعكس صار يتمادى اكتر ..

واجا لنص بيتنا وصار يهدد فيني وباهلي وانه رح ينتقم منا ورح يبكينا دم ..والله وحياة الله ما بعرف ليه عمل هيك.ما بعرف ليه وصلت فيه يسب اهلي ..الشاب هاد هو واهله ظلموني وجرحوني وكسرو قلبي.ودمرولي حياتي.

اهلي من اول مرة تزاعلنا فيها حكولي الشاب بنفعش ومابستاهلك ومو محترم..بس انا كل مرة كنت احكيلهم رجاءا اعطوه فرصة تانية واحكي معه واسمعله واترجى اهلي فكانو يردو علي وياريتهم ما ردو من البداية..لحد اخر مرة بالاربع شهور لما قعدت مع حالي وفكرت بكلام اهلي واخوتي (لو الشاب واهله بدهم ياكي فعلا ماعملو الي عملوه ) كنت اضل طول الليل ابكي وادعي ربنا يفرجها علي ويساعدني وانه اشكيه لربنا وحسبي الله فيه ونعم الوكيل.. كانت الدنياضيقة علي كتير.كنت اضل اسمع قرآن وادعي..بوقتها قررت ادعس ع قلبي واحكي بكفي لهون واحفظ كرامتي وكرامة اهلي وانسحب واسكر صفحتو بقلبي للابد وبعتلو فعلا انه خلص انا بديش ياك لو ماضل حدا غيرك بالدنيا وانه غلطتي انه وافقت ع واحد متلك وفشرت اسمحلك تهيني او اهلي وما هسامحك ع الي عملته فيني وقطعت كل سبل التواصل وبطلت احكي معه ولا ارد عرسائله وقررت ارحل للابد كنت بوقتا كتيرقوية..حاول يحكي معي وانه يحرجني قدام الناس بس انا رفضت.. بعت واسطات كتير لارجع بس انا واهلي كان قرارنا نهائي.وانفصلت عنه وفسخت خطبتي غصب عنه...

بس انا هلا عايشة بوضع نفسي سيء ..لغيت فكرت الزواج بحياتي...قلبي انكسر وتحطم...و ما عاد اقدر اوثق بشاب مين ما كان يكون ..ما عاد اقدر املك الجرأة لاحكي موافقة ع الزواج ..اساسا صرت اخاف ومعقدة من الزواج والرجال صرت اتخيل كل الشباب سيئين. الزواج صار يذكرني بالالم والعذاب والمعاناة الي شفتها منه...وانا ما هسامحه وبحكيله انا الي ربنا وشكيتك اله وهو رح يحاسبك عكل الاذى والدموع يلي بكيتني ياها...وانا مافيني سامحه.. انا كيف فيني اتخطى تجربتي وانساه واشيله للابد من قلبي وعقلي واكمل حياتي انصحوني ورجاءا ما تجرحوني بالحكي لانه انا تعبانة نفسيا ..."