زوجي كل وقته بشغله شو الحل ؟؟

09-01-2017 10:29 AM

تعديل حجم الخط:

سرايا - سرايا - رح ابدا من اول شي اتزوجت شب بيقربني اول سنتين من زواجنا كان مثالي بس زوجي هلا عم بكبر شغلو وصار عندو ضغط شغل مو طبيعي لدرجة انو بيمرق 3 ايام مو نايم مع انو ورشتو بنفس البيت ومع هيك انا وزوجي مابنقعد مع بعض ابدا اول شي صرت اصبر حالي واقول معليش مسكين ماعم يلحق وصرلنا سنة هيك والوضع كلما مالو عم يزيد اكتر انا هلا عندي ولد كنت اقعد مع ابني واتسلى شوي بس ماكنت مرتاحة لهالوضع ابدا وهلا انا ماعد احسن اتحمل هالشي لان انا حاسة اني مو متزوجة عايشة انا وابني وبيت حماي وبس زوجي حرام مو بخيل ابدا علي شو مابطلب منو مابقول لا بس انا مابدي هيك انا بدي نقعد سوى صرلي فترة بحكيلو انو ساوي دوام لشغلك هيك اريحلنا حتى ابنك بشوفك شوي بس هو مابيرتاح الا بشغل الليل وبضل بالنهار نايم حتى يوم الجمعة يلي اي ست بتتمنى انو زوجها يقعد ويتفضالها هي وابنها هاد الشي متل الحلم بالنسبة الي يعني حتى يوم الجمعة شغل وانا كتير بحبو وبعرف انو بحبني بس مليت من هالوضع بعرف في ناس بتحكي انو منيح شغل مو نسوان حتى هو بيحكي هيك الحمدلله طبعا انو مو مع نسوان بس يعني انا ماعد احسن اتقبل الوضع يعني طول الوقت قالبة وشي فيه وصرنا دايما متزاعلين
امانة اعتبروني اختكن وانصحوني شو اعمل لحتى اقنعو يساوي دوام لشغلو

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا

طباعة

المشاهدات: 46510


1 -	ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.	09-01-2017 10:29 AM سرايا
2 -	العمل حلو بس ا السعادة اتوزع وقتك لانه الثمن بعدين غالي اكتاءب ومشاكل صعب حلها لازم وقت الك واولادك وقت للرياضه حتى يشعر باالحياه	09-01-2017 11:40 AM الحارث التبليغ عن إساءة
3 -	زوجي وزوجك نفس الحاله بس انا بيشتغل بالامارات وصرلي شهر مو شايفيته اتحملي ربنا بيعين	09-01-2017 12:35 PM لانا التبليغ عن إساءة
4 -	زوجي وزوجك نفس الحاله بس انا بيشتغل بالامارات وصرلي شهر مو شايفيته اتحملي ربنا بيعين	09-01-2017 12:43 PM لانا التبليغ عن إساءة
5 -	تفاجئنا الحياه بابعاد جديدة عن مفهوم الحب و العشق و الغرام .. واكثر من ذلك على القدرة على الاستمرار و عدم التنازل .. وعليه عزيزتي يجب ان يكون لك بدائل حتى تسيطري على الوضع و لا يتفاقم الوضع .. مثلا اطلبي منه ان يمارس معك فن اليوجا ..	09-01-2017 01:20 PM الفرفورة الدلوعة التبليغ عن إساءة
6 -	احمدي ربك انو جوزك بشتغل و مو ملحق غيرو قاعد بالبيت لا شغلة ولا عملة, احسن من ما يكون كسول و عطايلي و يخليكي تشتغلي و ياخذ راتبك اخر الشهر. و الله انتو النسوان عجبة, على قول المثل احترنا يا قرعة من وين نبوسك.	09-01-2017 02:59 PM ليث التبليغ عن إساءة
7 -	اقعدي واسكتي بلا من الشكوى والتذمر والله انك بنعيم وما بعتقد انه زوجك مقصر فيك بأشي بس انت بتبالغي زيادة بكلامك اكيد بيطلع معاكم على قدر استطاعتة وبنفس الوقت مش مقصر فيكم قولي الحمد لله	09-01-2017 09:10 PM التبليغ عن إساءة
8 -	لازما تقعدي معاه قعده فضفضة برواقه ... تفهميه انكم جزء من حياته وهوه لانشغاله بعمله عم يهمل فيكي انتي وابنك ... وذكريه بحديث الرسول الكريم محمد صلى الله عليه وسلم : ان لبيتك وزوجك عليك حقا ... احكيله واحكيله انك مفتقديته وهوه واحشك كثير ... رح تشوفي كيف رح يختلف ... اهم شي يكون اسلوبك رايق وهادي بالحوار .... واشرحيله كل اللي انتي حاسه فيه ... كتير مرات بتكون فيه فجوه بين الطرفين لسبب ما يبعدهم عن بعض ... لازم يحس فيكي كمان	10-01-2017 06:14 AM zico التبليغ عن إساءة
9 -	لمين بشتغل و بكدح مش عشان مستقبلك انت و الاولاد ؟؟!!! ما الك الا توزي الولد عليه خليه يتحرك و يهتم فيكم اكثر	10-01-2017 07:20 AM م.احمد التبليغ عن إساءة
10 -	ظروف الحياه بتجبر الشخص التخلي عن اشياء كثيره لاجل العيش مستور الله يفرجها على عباده	10-01-2017 09:48 AM hmada التبليغ عن إساءة
11 -	وكلي الله يا بنت الحلال اشغالي حالك بقراءة القرآن والسيرة النبوية واملئي فراغك	11-01-2017 11:21 AM hamza als3di التبليغ عن إساءة