سرايا - سرايا - أنا سيدة عمري 27 سنه مدرسة ومتزوجه صارلي 8 سنين وعندي 3 بنات
وبحب زوجي كتير بس هو عنده صفات ما بحبها نهائيا
إنه . . جوزي مش رزين بالمرة وعنده حركات شعشطة كتير وخصوصا لما ييجي أهله عنا . . .
بلم إخوانه حواليه وبيقعد يحكيلهم نكت ومواقف صارت معاه
وبيوصل صوت ضحكهم للسما . . . وأنا بكون أغلي غلي
وللا يمة يمة لما يلعبو شدة . . . . بحس جوزي صار شخص تاني مش اللي بعرفه . . بقعد يعمل حركات وأكروبات عشان يضحك إخوانه
مرة دخلت عليهم اقدم الشاي لقيته ماسك كروت الشدة وبرميهم فوق راسه حكتلة شو هاد . . . قال لي كنا متشارطين اللي بخسر يتحمم بالشدة
دايما بحكيلة يا زلمة إركز . . إرزن . . بس عالفاضي كل كلامي بتلاشى
كمان في خصلة عنده بتقهرني . . إنه مرات بحكي مع أولاد اخوانه الصغار
وبيعمل حالو بعبوع عشان يخوفهم . . . وبيكيف لما يهربو منو في كل اتجاه
وهاد الشي بيحرجني كتير قدام سلفاتي . . مرة وحدة من سلفاتي شكتلي
وقالت انه ابنها سخن لما جوزي خوفه .
وعملتله يومتها مشكلة كبيرة وحلف عمره ما يقرب على ولد صغير بس كله حكي . . . بيوقف شوي وبرجع يعمل حركات من أول وجديد
انا زهقت ومش عارفة شو بدي أعمل معاه