سرايا - سرايا- انا بنت عمري ٢١ خاطبة الي شهرين، مع انه ما كنت ناوية اخطب قبل ما اخلص جامعة بس لانه خطيبي ما شاء الله صاحب دين وأخلاقه عالية.

ما حبيت أرده بناء على حديث النبي صلى الله عليه وسلم ... وأهلي شجعوني لأنه محترم وخلوق كتير خصوصاً إنه الناس مدحوه، المهم،الحمدلله كويس ومحترمني وأنا حبيته لأنه أول حدا بحياتي الحمدلله ما إلي علاقات أبداً والله يبعدني عنها ، بس المشكله إنه أنا خجولة كتير والله حتى بخجل من إخواني وبالجامعة بكون من محاضرة لمحاضرة وببعد عن التجمعات ... وبس أخلص على طول عالبيت ... المهم الخجل مأثر علي بشكل كبير مع إني اجتماعية وبحكي وبكون مبسوطة بس مع البنات والنسوان ... بس إذا بكون في شباب حتى لو قرايب بكون ساكتة وإذا بشوف حدا يطلع علي بصير وجهي أحمر ... ما بعرف ليش يمكن لأني وحيدة على أربع شباب وأنا أصغر وحده... ولما خطبت زاد عندي الخجل ودئما خجلانه من خطيبي لدرجة إنه بالبداية كنت استحي أرفع عيني فيه ...بالأول كان متفهم بس بعدين صار يضايق من هاي الشغلة ... يعني ما بحكي إذا هو ما حكى وبس يحكيلي غزل بجمد وبضلني ساكتة ... حتى صرله فتره إتصالاته وزياراته خفانه وبحكيلي ليش ما بتبادري وبتحكي حكي حلو ... يعني والله أنا ما بعرف والله أول مرة بقعد مع شب ... عارفة إنه خطيبي وكاتبين الكتاب عادي بس مش قادرة أتعود بسرعة ... وهو دائما بحكيلي انتي مرتي على سنة الله ورسوله ولازم ما تخجلي معي ولازم تتكيفي معي ... بس والله مش بإيدي، أنا حابه أرضيه وأسعده بس مش عارفه كيف خصوصاً ما عندي أسألهم وبستحي أسال ماما ... بدي منكم تساعدوني كيف أستقبله شو أحكي معه وكيف ومتى أعبرله عن مشاعري وشو إللي بخليه مبسوط.

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا