#‏يوميات_مسخسخ‬ (23) .. " ارحموني من العزايم "

12-07-2014 02:46 PM

تعديل حجم الخط:

بقلم : م. محمد سعيد سليم
^ الوو ابو محمد اتفضل عنا بكرا على الفطور انتا و العائلة الكريمة ...

هووون انا بنسطح .. بتقلب معدتي .. بنفصم و بشرد ذهنيا و عاطفيا و رجليا .. بحس احساس مفجع كإني سنديانة عجوز ، جار عليها الزمن .. المهم عزايم رمضان ...

شو علاقة التناسب بين رمضاااان و العزااايم ؟؟؟ ليش برمضان بتكثر العزاايم ؟؟؟ شمعنا يعني بدي افهم !!

المشكلة اوكي بقبل العزومة بس بتفاجئ اني اكلت نفس الطبخة مبارح عند دار خالتي و اول مبارح عند دار عمتي و أول أول مبارح عند دار حارس العمارة Oo

الكل بصير عازم و معزوم برمضان و الكل حافظين نفس الطبخة .. منسف .. مسخن و ملوخية .. من هون ليخلص رمضان أعتقد اني بصير انتج لبن من كثر المنسف .. و بطلعلي غصن ملوخية ع صلعتي .. طيب حد يعزمني على شيشبرك أو كرشات !! ولله الكرشات طبخة بتتاكل .. صح انها فوارغ و بضاعة خرفان بس زاكية بتتاكل !!

طيب سفرة رمضان بالعزايم ليش بكون عليها أشهى ما لذ و طاب .. من عصائر و سلطات و خبز من جميع الأصناف بتكفي لآل " داعش " كلها .. و الحلو يا حلو .. اااخ يا كنافة و قطايف وجلو " من اللي برج " .. و المعزوم بطلع معو سكري بالآخر و بياكلش حلو !!

^ طيب شو رأيكو يكون في اتصال مختلف و نقول " الووو .. ابو محمد .. بكرا عاملين فطور جماعي لمجموعة من الأطفال الأيتام و حابين تشارك معنا في جلي لصحون .. مني و علي ولله بسحب ابوي و امي و اخوي و جارنا ابو مالك و بروح جراي .. بس يمكن ابو محمد رح يعتذر لإنو مش فاضي او عندو اجتماع عمل بعد لفطور !!

احكيلك بديش حد يعزمني على فطور جماعي مع الأيتام .. بدي تطبخ طبخة و تقسمها وجبات و يلا نطلع انا وياك نوزعها بسياراتنا عشان العالم المستورة تفطر ..

أو احكيلك يلا نعمل لمة تبرعات من صحابنا و قرايبنا و معارفنا و نوزعهم على محتاجين مش لاقين حد يعزمهم برمضان .. أو الأصح مش لاقين رغيف خبز برمضان ..

^ رمضان شهر الخير و الرحمة وصلة الرحم .. و " اطعام الفقير " .. اطعام الفقير .. اه اطعام الفقير .. طعمو الفقير ولله انا ماكل و شبعان و شبعت عزايم ..