سرايا - أعاني من عدم نسيان المشاكل الماضية، من كم سنة صارت مشكلة بيني و بين حماي و كبرت وسبب المشكلة اني اشتغلت و كنت اودي ابني عند امي بحكم انه حماتي كانت تشتغل و ابني لسه صغير لسه و يعني بده وحدة تنتبه له و حماي كان بده الولد يضل معه ، حماي عقليته صعبة كان بده الولد يضل حتى يصير زلمة برأيه بده يوخده على الشغل و يطلعه معه حتى يصير رجال ، المهم أنا ما قبلت و كنا متفقين أنا وزجي الولد يضل عند أهلي يعني زوجي كان راضي بقراري، المهم وقتها صارت مشكلة وحماي اتطاول علي بالحكي و قعدت أسبوعين ما احكي معه بعدها حماي طلب من أهلي يجو على البيت عشان يحكي معهم ، و بس اجو غلط مع أبوي بالحكي وكبر معي بالحكي اني مو مربية و اني وحدة عاطلة و من هالحكي أنا هون و لأول مرة انفعلت على حماي مع انه كان مرات يطلع يسبني في بيتي و أضل ساكتة، بس بهداك اليوم ما اتحملت قام حماي طردني أنا وزجي من البيت، و طلعنا لفينا شوي بالسيارة و بعدين رحنا عند أهلي و ضلينا عند أهلي ٤ أيام شفنا فيها بيوت أجار عشان نطلع من عند دار حماي لانه الوضع صار لايطاق بعدها رن اخو زوجي على زوجي و طلب منه يرجع على البيت عشان يحلو المشكلة ، بعدها بثلاث أيام رن زوجي علي و حكى لي بالحرف الواحد بدك ترجعي على البيت و لا لأ، قلت له ايش في ، بدي ارجعلك حكى لي خلص بترجعي على البيت و ابوي لو طلع على البيت كل يوم بدك تتحملي و هو راح يبطل يتدخل ، انا هون عرفت انه زوجي تعبى من أهله علي ، و إنه لو حكت له احنا كنا متفقين نستأجر راح توصل الأمور للطلاق و رضيت ارجع حتى ما أخرب البيت و عشان ابني ، المهم بعدها فعلا حماي تغير معي بطل يغلط علي ، و خفت تدخلات شوي، بس انا مش قادرة انسى و لا قادرة أسامح بالذات انه قبل هالموقف شفت مواقف كتير ، و حماتي كانت تعرف انه الحق معي و مع هيك كانت تقعد تحكي لزوجي مرتك غلطانة خليها تعتذر و حتى لما صار و طلعت عند أهلي لما حماي طراني تاني يوم رنت على امي تحاول تقنعها انه أنا الغلطانة مو حماي ، و الله الأذى إلي شفته منهم كبير ، دار حملي هسه مناح معي بس في شغلات أنا مش قادرة أسامحهم عليها و لا قادرة أنسى، كيف أنسى لاني جد تعبت كل يوم الموضوع بخطر على بالي الموضوع مو قادرة أنسى و الله إني مجروحة و متأذية كتير الموقف هاد مش الموقف الوحيد في كتير مواقف مؤذية جدا من اهل زوجي ، و بالمقابل في مواقف كتير منيحة منهم بس أنا مش قادرة أتجاوز الأذى إلي شفته منهم بتعامل معهم كأنهم أهلي بكل ود و احترام بس و الله قلبي مليان شو أعمل كيف أنسى لاني تعبت؟