سرايا - حبيت شب من ٣ سنين ونص وهو نفس الشي مرينا بكتير ظروف وبكل مرة ببين انه بحبني اكتر من قبل لدرجة كمل ماستر عشاني وكان يحبني بشكل لا يوصف وكل شي يكون عندي حتى قبل ما اطلب

وقبل شهرين تقدملي واهلي رفضو وصارت مشاكل كتير كون هو اصله من بلد وانا من بلد تانية وساكنين بمحافظات مختلفة وبعيدة ودخلنا واسطات لحد ما اهلي وافقوا وبعد ما شافو حبوه اكتر مني ولله الحمد

هلأ مشكلتي انو بعد ما خطبنا تغير معي ١٨٠ درجة .. بطل يهتم فيني ويقعد يومين ثلاث ما يرن علي وبعمل عكس ما اطلب وبضل يغلط علي ويسب ويهين فيني بشكل لا يوصف واكتر من مرة حكالي انا ما بدي ياكي ولا بتلزميني مع العلم مشكلتنا هي غيرتي عليه وحبي الكبير مع انه والله غيرتي مش كبيرة

هلأ اخر مشكلة كانت اني مزحت معو وهو قلبها جد وحكالي ما بدي ياكي وعملي بلوك يومين وانا بهدول اليومين انهرت وما اكلت وضليت بالغرفة ابكي ورنيت عليه وانا منهارة وببكي لدرجة ما جسمي تخدر وما كنت حاسة على حالي بس ردو كان غريب الي هو انا شوي وطالع وبدي انام برا البيت ورجع اغلق موبايله واحد الان عاملي بلوك

شو بتنصوحني ! شو اتصرف ! ازا حكيت لاهلي رح اتدمر كون انا حاربت الدنيا عشانه وطلع مش منيح وحتى رح اكون مسخرة عند قرايبنا لاني كنت امدحه كتير
ولو ضليت معه عارف حياتي رح تكون جحيم
اسفة لاني طولت بالحكي بس بدي حد يساعدني"

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا