سرايا - انخطبت لشب بجنن ملتزم ومحافظ على صلاته والكل بشهد لأخلاقه محبوب بين الناس جدي وكان عندي انجذاب كبير لشخصيته كيف بيشتغل واديه تعب لحتى يكون حاله ولحاله.. حبيته اكتر من ما هو نفسه بتصور .. توفى أبوه .. تعلقت فيه اكتر حسيت اديه ضايع ومحتاج مين يوقف جنبو .. عاهدتو وعاهدت الله شو ما صار ضل معه لآخر نفس .. حسيت انه الله اللي جمعنا بالحلال رح يوفقنا ويكتبلنا حياة سعيدة تعوضنا عن كل شي سيء صار -انا تيتّمت صغيرة- وهو كان عارف شو اللي بدها ياه بنت فقدت ابوها.. كتبنا الكتاب وبنيت أملي ومستقبلي مع هالشخص وكنت حاسة الله بعته من السما يعوضني عن اللي راح .. ما احلاه وما احلى قلبو.. بس لاحظت ادمانه لتلفونه صار زيادة 24 ساعة وتلفونو بإيده . بعدين بكتشف انو ونحنا مخطوبين بيحكي عليي وعلى اهلي بسخرية.
يشهد الله انو كان عندي ياه بالدنيا واهلي كتير بحبوه وبحترموه .. ولا مرة ولو وحدة ذكرناه بأي شي مو منيح .. انا مصدومة انو ونحنا مخطوبين بيحكي مع نسوان عدد شعر راسي وكله حكي مستوى هابط لا اخلاقي! .. ما تسرعت وتركتو على طول.
أشعرته اني على علم بالحكي المش مزبوط اللي بيحكيه .. اعطيته فرصة ..كمل غلطة عادي وعلى اعتقاده اني ما بعرف .. لعند ما توصلت انه عامل علاقات غير شرعية (زنا).. بس هو مانو معتبر انه زنا .. مستبيح الحرام بصورة صعقتني .. قرفت منه ومن سيرته.. فقدت ثقتي فيه وصرت احس كلشي بيحكيه كذب وتمثيل .. فسخنا .. زعلانة على كلشي صار .. لساتني بتزكر اديه كنا مبسوطين وهوة شو اللي قدملي ياه .. أوهمني انه انا كلشي بالنسبة إلو وما بفرقنا الا الموت .. ولما تمشكلنا للسبب المذكور ما كان همه إلا ياخد دهبو .. أحتسبه عند الله على كمية الأذى النفسي اللي لاقيته بسببه.. وبس

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا