بقلم :
د.شفيق الدويك الناموس الليلة أكلني، و جسمي مليان بقع حمرا، و الله عمري ما شفت مثل هالناموس كبير كبير يا خالتي، و بعدني مش شارية مروحة عدم المؤاخذة في أشياء أهم بشتريهاا. تصور يا خالتي سيارة رش الأمانة رشت عمارة الجيران و تركوا عمارتنا مع إنها قبالها!. الأمانة ما بتقصّر طب ليش ما يعملوا حملة رش بدون تلفونات إحنا بدنا نصير بتموز ؟ عمان و الله حلوة و الأمانة مش ملحقة على الناس لأنهم مش ملتزمين، بس يا خالتي ليش فكرك ما يخالفوا العمارات إللي الزبالة قدامها. طب إحنا مش بشر يا خالتي؟ السكان كلهم أغراب و الله ما بعرف حدا، و ما حدا برد السلام زي زمان ! تحكيلي مع الأمانة تلفون صغير الله يرظى عليك، القطط عاملين عزايم في الحارة على لكياس المسكرة و المنفولة كمان، و في الليل يا خالتي بيتهاوشوا مثل الأوادم و القوي ماكل الظعيف و أنا بخاف من صواتهم !. القطط حيوانات يا خالتي. و حكمة ربنا بيفهموش يعني بيستعملوش العقل ، بتجرهم الغريزة جر مثل العرباية إللي بتجرها الدواب بعيد عن السامعين. طب الأوادم بياكلوا حقوق بعظهم البعظ ليش يا خالتي؟ إللي بدينار ببيعوه بخمسة. و بحطوا كلام ما حصل على لسانات بعظهم البعظ .... و الله الدنيا مش مستاهلة، و الله يستر يا خالتي. بنت بنتي تيسة ! بالعربي لا بتعرف تكتب و لا بتعرف تقرا زي الناس. بدي أختك تعطيها أكم درس. جبتلها منديل أسود لأختك حلو كثير كثير وعليه خرز بيلمع مثل القزاز!. طب يا خالتي مش لازم المعلمة تشد عليها شوية و تكسب حسنات و لو إنه راتبها ظعيف شوية، شو دخل البنت الصغيرة ؟ إذا دار عمّك أو غيرهم بدهم إشي أنا جبت بظاعة جديدة زي الذهب و أسعارها طرية كمان . * * * * * ثقّلت دمي عليك يا خالتي. فش حدا أحكي معاه ويسمعلي مثلك إلكل بيسرح عقلهم من همومهم و مشاكلهم لكثيرة و أنا بحكي. أسكت يا خالتي، صارلك اليوم معاي فيلم هندي مثل ما بتحكي الناس. كنت بسيارة أجرة رايحة عالبلد أتبظع، يعني أشتري شوية غراظ. وقفت السيارة عالإشارة، و عينك ما تشوف إلا النور. هجم عالسيارة ولدين صغار ،مثل العفاريت، عيونهم مثل عيون الذيب، و ريحتهم بتسطل، و اظافرهم طوال طوال مثل مخالب القط، وبلّشوا يمسحوا قزاز السيارة النظيف بخرقة سودا سودا من الوسخ. ظوت الإشارة ألحمرا و تحرك الشفير إلا واحد من لولاد بصيح: راحت رجلي، إندعست رجلي، أنا قاعد بموت، أنا دخيلكوا يا ناس !. قلت: الله يستر يا خالتي !!!. نزلنا يا خالتي أنا و الشفير لمعثّر، و كان ريقه ناشف مثل الحطبة، و شفنالك الولد مرمي عالأرظ و بفرفط مثل الحبة في المقلى، و إلتمت أمة الأمم علينا، و صاروا إخوان الولد، ثلاثة و معهم بنت يا دوب عمرها 7 سنين شعرها منفوش، يلطموا و رموا باكيتات العلكة إللي ببيعوها عالإشارات الثانية عشان نحزن عليهم و نعطيهم إللي فيه النصيب، و صرنا نسبح ببركة علكة لونها أبيظ. تقول معركة يا خالتي ! مروا أجانب شُقُر يا دوب قادرين يفتحوا عيونهم من الشمس و صاروا يصوروا فينا. مش حكيتلك فيلم هندي !. حمل الشفير الولد و راح فيه بسرعة عالمستشفى، و الناس أخذت رقم سيارة الشفير، و بعظهم يا خالتي راح يصور بالموبايل. ظليت أنا بالشمس مع الناس أشرحلهم إللي صار ، و كان واقف معاي شرطي عشان أروح معاه عالمخفر و أشهد. و الله يا خالتي أنا تعطلت كثير كثير، و أكيد الشفير المسكين أبو لعيال أكلها. بالك بيعملوا حملة قوية قوية و بلموا فيها هالشحادين إللي قاعدين يخربوا ببيوت الناس ؟؟؟
لمتابعة وكالة سرايا الإخبارية على "فيسبوك" : إضغط هنا
لمتابعة وكالة سرايا الإخبارية على "تيك توك" : إضغط هنا
لمتابعة وكالة سرايا الإخبارية على "يوتيوب" : إضغط هنا