سرايا - سرايا - أنا يلي كان ينضرب فيني المثل ست البيت المعدله يلي بتصحى من الصبح وبتخلص شغلها وبتحمم ولادها يوميا وبتطبخ اشهى الاكلات وبتستقبل زوجها بابتسامه وبتحضنه قبل ما يروح عالشغل وبعد ما يرجع من الشغل وبتستناه بفارغ الصبر والدقيقه من غيره زي كأنها ساعه شو صار فيني ......
انا كمان حاسه حالي مش انا....
اهملت ببيتي وولادي ومش حاسه بحب اتجاه زوجي.....
طب ليش ؟؟؟؟
بحس بحزن بدون سبب وبألف اي سبب عشان يكون مبرر لتصرفاتي
بتعرفوا بشو حاسه .... حاسه بحزن جوا قلبي لدرجه اني لما اطلع بالهوا بحس هالهوا مش راضي يفوت ع صدري من كتر الضيق ولو زوجي يجيبلي كل شي وياخدني عكل مكان ما بحس بالسعاده....
شهيتي تسكرت عالاكل وصار معي نقص فيتامينات ونقص دم وهلأ عايشه عالفيتامينات والحبوب ....
والله حاسه الدنيا تافهه وما بتستاهل نعيشها ...
يعني مرات لما اشوف حدا مبسوط وهو بطلع مشوار او بعمل اشي كل الناس بتحبه بحكي لحالي هالانسان ليش مبسوط ....
طب انا لما اعمل هاي الاشياء يلي بعملها ليش ما بنبسط متله ...
ليش مش حاسه بمتعة الحياه....
ليش بكره حالي وبكره الحياه ...
عنجد انا حاسه حالي صايره غريبه....
وحاسه اني وصلت لحافة الانهيار ....
في اسئله كتير براسي ومش لاقيلها اجوبه!!!
ما بعرف الي بصير معي من الغربه ولا من المشاكل يلي مريت فيها بحياتي ولا من شو ما بعرف....
انا مو سعيده نهائيا ونفسي اطلع من هالحاله... في اشياء كتير ما قدرت اعبرلكم عنها بس عنجد دايما بحس قلبي بوجعني وانا لساتني بأول العشرينات....
نفسي احضن امي وابكي وابكي وابكي لحد ما ارتاح ...
اذا بدكم تقصفوا اقصفوا اصلا انا بكره حالي كمان ولولا ولادي كان انتحرت من زمان لانه الحياه ما فيها اشي حلو ...
وكل هالشغلات يلي بتسعدكم بحسها اشي تافه كتير وما في اشي بلفت انتباهي او بسعدني بهالحياه ....

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا