بقلم : فيصل عويد
بداية هل تذكرون طحطح .؟؟؟
طحطح الجني العطاردي اللي لقيتو داخل تنكة فاضيه بالحوش التحتاني . ؟؟؟

ئي يا جماعة الخير مالكو .. طحطح المارد البنفسجي ؟؟؟
اللي بحشر خشمو بكل اشي .. عرفتوة ؟؟؟؟
ايووووووه هو

المهم
طحطح و مثل ما انتوا عارفين طلب مني قبل اكم يوم اجازة عشان بدو يزور اختو طحطوحه في مخيم لبتون للاجئين الزحاحله وسافر هو و تنكته بيمن الله ورعايته لقضاء عدة ايام بعيدا عن البشر .

ما علينا
امبارح وانا ماشي بالحوش وقعت علي نقطة ماء كبيره . كبيرررررره جدا جدا . وتعادل تنك مي 12 متر و كدت ان اغرق . وساعه كامله وانا (اتفعفل ) واتبطح حتى قدرت القط نفسي و اوقف مره ثانيه محاولا استيعاب الصدمه .

المهم بعد ما جمعت قواي و وقفت وجهزت نفسي لشجب واستنكار هذه المؤامره الدنيئه و تطلعت لفوق اشوف شو مصدر المياه المنهمره و اذا بالأهبل طحطح واقف فوق راسي وقاعد يبكي

المشكله انا بس اشوف طحطح قاعد يبكي باحزن عليه وبطير زعلي منو .

قلتلو وك طحطح مش انت اخذت اجازه ... يزم شو جابك ؟؟؟ وليش قاعد تبكي ؟ خير .
طحطوحه اختك مالها اشي ؟ فحرك حواجبه للاعلى قاصدا ان يقول (لا) .
طيب عمك ابو خرطوم صارله اشي ؟؟
اجاب (ءcho) يعني لا

طب مالك يزم ؟ حدا ضربك ؟؟.. سنحك ... وك انت اكبر من جبال همالايا لويش تخليهم يضربوك ؟؟

قال بحزن .يزم محداش ضربني افهم .
انا بابكي عللي حصل بتركيا . اشي بقطع القلب . اشي بيبكي يا خوي يا فيصل .

قلتلو . اسماااااااع تقولش فيصل حاف يا فضائي يا معفن . قوللي يا معلم .. وك انت مفكرني صاحبك ؟؟؟ بعدين انت من متى بتتدخل بالسياسه . مش قلتلك الف مرة كبّر راسك وبلا هبل .

قال . يا معلم هاي مش سياسه هاي مشاعر بتخلّي الحجر يبكي . يا معلم الشعب التركي نفض مشاعري نفض .ضرب مشاعري كهربا .
انا ما باحكي سياسه انا باحكي عن اناقة شعب واخلاصه و وفاؤه لبلده وخوفه عليها . شعب عشان عيون وطنو فرش حالو بالشارع تحت الدبابات وما فرقت معو . ما بدو بلادو تتحول لمستنقعات دم ولا بدو ياها تدخل انفاق مظلمه . شعب يريد الحياة بشده .. زينا بالزبط .
قلتلو زي مين ياخوي يا طحطح ؟؟؟؟
زي مين لطفا؟؟؟ايش حكيت حضرتك ؟؟؟؟

قال زينا يا معلم . احنا بعطارد هيك . احنا شعب متفاني وعندو وطنيه وانتماء كثير .

قلتلو . ولا طحطح حط عينك بعيني اشوف .
ولك انتوا بعطارد شعب فاسد، افسد من الحكومه ولك انتو بعطارد شعب اناني لا يحب الواحد منكم الا نفسه ولك لا سمح الله لو صار عندكم مثل ما صار بتركيا اول اشي بتعملوه انكم تهجموا عالمخابز والكازيات وتخزنوا خبز وكعك (قرشله) وك كان التجار عندكم استغلوا الوضع ورفعوا الاسعار.

وك اللحام و تبع الاواعي وسعر المواصلات كلو رح يرفع لانكم بعطارد مش وطنيين ابدا . انتوا وطنيتكم عباره عن صور واغاني وطنيه لا تمت الى الحقيقه بشلن وك هو انا غشيم عنكم .؟؟

لو صار شي عندكم اول اشي بتفكر فيه هو انك تسكر باب دارك وتتخبى او يمكن تفكر بصورة سلفي مع دبابه عشان تنزلها عالفيس وتكتب (من قلب الحدث . فدوى لعيونك يا عطارد ). وبس تنشر البوست بتروح تتخبى . انتوا شعب عريط . متسلق . همكم الاول انكم تزبطوا حالكم .

وك انا بحياتي ما شفت شعب كلو مستوزر . وك كل الشعب العطاردي بدو يزبط حالو عشان يصير وزير . و كل الشعب نواب و كل الشعب رؤساء بلديات . وك انتو شعب مش شعب انتو شعب بدكم فورمات من اول ابو جديد
ف سدّ بوزك و انطم لا تخليني ****عرضك على هالمسا . سنحك 100 سنحه نزعت مساي.

فقال طحطح وعلامات الدهشة بادية على محياه . له له يا معلم . مالك قلبت سحنتك هيك وبلشت تطعم ؟؟
احنا بعطارد احسن شعب بالمجره .. ها لعاد و روح اسأل عنا يا حبيبي . عنا وطنيه و حميّه .. و كلنا ايد وحده و صدقني مستعدين نفدي بلادنا بارواحنا .. تصدق والا بكيفك .

مسكت اعصابي على الآخر و قلتلو اسمع ولا طحطح اقسم بالله بارجع باحبسك جوا التنكه . وك انتوا الشعب الوحيد بالمجره اللي حاط تسعيرة ثابته لصوته بانتخابات مجلس اللوردات العطاردي .. صح والا لا ؟
قال بانكسار . اه والله صح يا معلم
قلت . وانتوا الشعب الوحيد اللي اخذ خمسين نيره حق صوته ،قام مجلس اللوردات اللي صوتوله قعدوه على خمسين خازوق ... صح والا لا ؟؟
قال بانكسار ايضا . اه والله يا معلم . الله ينتقم منهم .

قلتلو . وانتوا الشعب الوحيد بالمجره اللي ينوي ايضا بيع صوته مرة اخرى بعد كل الخوازيق بمبلغ خمسين دينار للصوت الواحد . ويجهز مؤخرته لاتساع المزيد من الخوازيق صح والا لا ؟؟
فاجاب بخجل اه والله صح يا معلم .

طب وين الوطنيه يا طحطح معناتو ؟؟
وين انتماءك للبلد ؟؟

يا ابني يا طحطح الأزمه أزمة اخلاق وازمه انانيه وحب الذات .
انتوا بعطارد شعب زي ما قلتلك .. لا تحبون الا انفسكم . وتقنعون انفسكم بأنكم تحبون بلدكم .
قِب من وجهي يابو الطحاطيح لاخليك تندم ....

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا