خطبت وفسخت مرتين .. أخشى أن لا يرضى بي أحد بعدها

21-04-2014 09:16 AM

تعديل حجم الخط:

سرايا - سرايا - أنا بنت عمري 22 سنه
قبل شي سنتين انخطبت لواحد كان ما عنده شخصيه وامه بتتحكم فيه ولما كترت المشاكل فسخنا الخطوبة
ومرة ع مرة رجع اجاني عرسان كتير ورجعت انخطبت لواحد من بينهم اخترتو مع انو كان اقل واحد في اللي تقدموا لي .. مش من ناحيه ماديه قصدي ..لأ.. شكلا وفرق بالعمر وخاصة لانه تجربتي الاولى كان سبب فشلها اهله.. وهاد كانوا اهله متوفيين.. لهيك فضلته عن الكل وانخطبت له
وضلينا فترة شهرين وإحنا سمنه على عسل وبعد هيك بطل يرن وانقطعت اخباره وبلشت اتصل فيه ويرد علي بعد 1000 رنه
وكل ما اساله مالك ؟ وشو اللي غيرك ؟ ما كان يرد
اخر شي حكالي انا ما عرفت احبك وما بدي اكمل معك حكيت له ليش وشو صار وشو عملت؟
حكالي : " انا شايفها صعبة وانا خلص ما بدي"
حكيت له : معناها طلقني..
حكالي : ما بدي اطلق وهي المحاكم قدامك ..روحي اطلقي لحالك!!

شو اعمل ؟؟ انا مو عارفه انا خايفه هالموضوع ياثر على مستقبلي ومين بده يقبل بنت خطبت مرتين وتركت ؟
والله العظيم 24 ساعه ببكي ومقهورة مو حرام عليه شو اذنبت بحقه لحتى يعمل معي هيك؟

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا

طباعة

المشاهدات: 78018


1 -	ترحب "سرايا" بتعليقاتكم الإيجابية في هذه الزاوية ، ونتمنى أن تبتعد تعليقاتكم الكريمة عن الشخصنة لتحقيق الهدف منها وهو التفاعل الهادف مع ما يتم نشره في زاويتكم هذه.	21-04-2014 09:16 AM سرايا
2 -	ما في داعي تخافي انا مثلك خطبت مرتين و بعدها قرفت لرجال بس بعدين الله بعت لي نصيبي رجال بتقل بالذهب الله يخليلي ياه فوكلي امرك لربك و هي القصص بطلت مهمه كتير هالايام الكل بخطب مرة و مرتين و ثلاث انت ما تكبري الموضوع و عتبري اشي تافه الناس بتشوفو مثلك كبري بكبرو لهيك انت تحددي كيف بدو يكون وضعك	21-04-2014 09:42 AM مثلي مثلك التبليغ عن إساءة
3 -	أصبري واستخيري رب العالمين،والله يصلح أمرك،بس لو فسخت خطوبتك هاد مابيعني انو ماحدا بيتقدم لك لا تخافي الله مابيضيعك	21-04-2014 10:29 AM مممم التبليغ عن إساءة
4 -	السلام عليكم ... هالشي مو عيب ولاحرام وهاذ قضاء الله وقدر كيف بقدر اتواصل معك وانا جاد انا عمري 25 سنة موظف بقطاع الحكومة	21-04-2014 10:29 AM جاد على سنة الله ورسولة التبليغ عن إساءة
5 -	هاد كلو من ايدك لانك بتتدوري عالمصاري قاعدة ((ورجعت انخطبت لواحد من بينهم اخترتو مع انو كان اقل واحد في اللي تقدموا لي .. مش من ناحيه ماديه قصدي ..لأ.. شكلا وفرق بالعمر )) لاحظي كلامك انتي مش فارقة عندك لا الفرق بالعمر ولا الشكل والا الاخلاق المهم انو ماديا احسن واحد فيهم.............اسأليني انا الله يهديكي يختي	21-04-2014 10:40 AM عمر 555 التبليغ عن إساءة
6 -	يا بنتي اطلقي لانه اذا هيك بالخطبة حياتك راح تصير جهنم بعد الزواج ونصيبك راح يجيكي ولكن خلي علاقتك مع الله كويسة واسألي الخالق ولا تسألي العبد	21-04-2014 10:48 AM ابو زيد التبليغ عن إساءة
7 -	عادي وهاد اشي مابعيب اهم شي للانسان سعادته ويلاقي الشريك الي فعلا يسعده وانا شب وصار معي نفس الشي خطبت مرتين وتركت لاسباب بالنسبه الي كانت عمود البيت ومابقدر اكون حياتي فيها والحمدلله على كل شيء وادعي ربنا ييسرلك امورك ودائما خلي اختيارك على اساس الدين .	21-04-2014 11:27 AM زيي زيك التبليغ عن إساءة
8 -	أختي مادامه حكالك ماعرفت أحبك وروحي اطلقي لحالك معناته والله أعلم عشان تتنازلي عن المهر !!الكرة بملعبك انت ترفعي قضية الطلاق وتخلصي منه وتشوفي حياتك ...وان شالله الله يعوضك خير... صحيح ما عرفنا ليش هالتغير المفاجيء بتصرفاته وإذا صدر منك شيء أغضبه وخلاه هيك بس بكل الاحوال دائما اطلبي من الله الزوج الصالح بغض النظر عنده أب وام أولاءء	21-04-2014 01:21 PM لانا التبليغ عن إساءة
9 -	كلامك صحيح زيها زي كل البنات او اهلهم اول اشي بشوفو المصاري بغض النظر عن الباقي.....تعليقك قوي وحاد و صائب و صاحبة المشكله اعترفت بهذا الكلام بايديها كاتبيتو.((ورجعت انخطبت لواحد من بينهم اخترتو مع انو كان اقل واحد في اللي تقدموا لي .. مش من ناحيه ماديه قصدي ..لأ.. شكلا وفرق بالعمر )	21-04-2014 01:33 PM الى السيد عمر 555 تعليق رقم4 التبليغ عن إساءة
10 -	اخى محب فلا تلموني شكرا كتير على دعائك اخى الله يحفظك ويخليك وانا من معجبين بتعليقك امانة ضلك ادعيلى دعوة غريب لغريب مقبولة الله يكثر امثلك	21-04-2014 03:33 PM اخى محب فلا تلمونى التبليغ عن إساءة
11 -	اسال الله لك السعادة وتغير حظك العاثر والتمهل قبل قبولك الثالث	21-04-2014 04:37 PM ورد الحمزات التبليغ عن إساءة
12 -	لا تياسي الحياه لسه قدامك وانت لسه صغيره والله يبعتلك انسان يحفضك ويحميكي ديري بالك علا نفسك ولا تزعلي المهم انك ما تفكري انو خلص وكان الحياه انتهت انت اليوم الي بتخلصي من واحد متل هيك بتكون الحياه بدات من جديد انت صغيره وبمجتمعنا صار شي عادي انه بفتره الخطوبه يصير طلاق ومادام بس خطوبه فالامور سهله توكلي علا الله	21-04-2014 06:29 PM امير التبليغ عن إساءة
13 -	اخوي خطب وحدة متل حالتك --بس الي لاحظته انك بتحطي الحق على العرسان وكانك ملاك --كل الزلام واحد فتعبيش حالك وكوني اكتر مسؤولية	21-04-2014 08:36 PM سوس التبليغ عن إساءة
14 -	طلقيه شو يعني؟	21-04-2014 09:12 PM مايكل التبليغ عن إساءة
15 -	ان من سرد الحديث انتي الي مو مزبوطه مو العرسان وكلو رح تلاقيه قدامك وتعنسي	21-04-2014 09:17 PM واحد التبليغ عن إساءة
16 -	في وحده بالدنيا بتحكي وافقت على واحد عشان أهله متوفين نصيحه لاناخدي واحد الا أزا حبيبتيه عشان تقدري تحبي كل شي منه حتى أهله حتى أغلاطه حتى هفواته حتى زناخته وجفاءه	22-04-2014 12:05 AM عبير التبليغ عن إساءة
17 -	لا تتجوزي احسنلك	22-04-2014 12:06 AM سالي التبليغ عن إساءة
18 -	هذا من الابتلاء وكل نسلم يبتلى على قدر دينه فأكثر الناس ابتلاء الانبياء ثم الامثل فعليكي الصبر ثم تتقي الله ومن يتقي الله يجعل له مخرجا	22-04-2014 07:21 AM عمر الحسنات التبليغ عن إساءة
19 -	الزواج قسمة ونصيب ومكتوب من رب العالمين لما بدو ييجي نصيبك صدقيني رح يسكتك برغم كل شي ،،، انا خطبت مرتين وكتبت كتابي مرة وتطلقت ،، وبعدها تزوجت انسان اكثر من رائع ما ببدله بكنوز الدنية كلها ولا برجال الدنية كلها ،،، كل شي نصيب ،، وهلا بحمد ربنا مليون مرة اني فسخت وطلقت من اللي قبله عشان يكون هو نصيبي الحمد لله مليون مرة ،، لا تاخدي الا انسان بتحبيه ومقتنعة في ،، انسي الظروف والعمر وكل شي الحب والاقتناع اهم شي	22-04-2014 08:50 AM عاشقة النورس التبليغ عن إساءة
20 -	هاد مش طبيعي الله حماكي تركك قبل ما اتجوزك احمدي ربك وانبسطي مش تزعلي نصيبك بيجي لعندك ما في داعي للزعل ربك كبير ازا كتبلك نصيب ما في انسان او غيرو بيقدر يمنعو	22-04-2014 09:51 AM ريتا التبليغ عن إساءة
21 -	اتأني هي خطبه ورا خطبه اهدي شوي وخدي وقتك لسه صغيره فكري قبل ما توافقي واستخيري مش هيك	22-04-2014 09:53 AM ريتا التبليغ عن إساءة
22 -	اختي اكيد هو مو خير الك مشان هيك الله بعدك عنو ضلي صلي وادعي الله انو يبعتلك اللي بستاهلك احتسبي اجرك لله وان شاء الله لعله خير :))	22-04-2014 09:17 PM من اخت لاختها التبليغ عن إساءة
23 -	اذا حابه تعرفي رايي اسالي حالك اكمن سؤال1معقول انا موو قويه 2 معقول انا من تجربتي الاولى عملت شغلات بنضري صح لكن كاينه كااارثه وانا مو عارفه 3 معقول انه بنضري اقل واحد لسه زي ما انا كاتبه بالعنوان الرئيسي4 معقول اخدته لانه اهله متوفيين 5 معقول انا ما عرفت احبه ونسيت انه داخله طفل لازم احن عليه 5 معقول انا بتعامل معاه بحق ربنا معقول ومعقول ومعقول	22-04-2014 10:39 PM كسواني مقهوووور التبليغ عن إساءة
24 -	والله يا أختي لا داعي لكل هذا الحزن والبكاء.. فأنت لا تعلمين أين الخير .. ربما كان زواجك منه ليس فيه خير لك ..(وعسى أن تكرهوا شيئا وهو خير لكم) .. ثم أنت مؤمنة بقضاء الله .. فلتنسي ذلك الشاب ولاتشغلي تفكيرك لم َ فعل هذا معك.. لأن الله تعالى إذا أراد شيئا هيّأ أسباب لحدوثه .. فعلقي قلبك بمسبّب الأسباب سبحانه .. وبإذن الله سيعوضك الله ويرزقك الزوج الصالح الذي قدره لك في الوقت الذي يشاء.. ثم أنت أختي مازلتِ صغيرة وحتى لو خطبتي مرتين أو ثلاثة.. هذا أمر عادي لا يشكل عائقا لتقدم الناس لك.. فقد تقدم لك الكثيرين وخطبت مرتين وهذا يدل أنك بفضل الله تملكين العديد من الصفات والميزات المرغوبة ولا ينقصك أي شيء الحمدلله .. لذلك لا تحزني أختي ولا تيأسي ولا تفقدي صبرك فليس مهم تزوجت الآن أو بعد شهر أو بعد سنة ... المهم من تزوجت... لذا نصيحتي لكِ أختي الغالية أن تختاري صاحب الدين والخلق بغض النظر عن أي ميزات أخرى.. فهو الذي سيكون سبب سعادتك في الدنيا والآخرة .. أسأل الله أن يرزقك به إن الله على كل شيء قدير..	24-04-2014 09:22 AM رحلة الحياة التبليغ عن إساءة
25 -	ردي على مشكلتك...ذكري نفسك بالآية الكريمة" وعسى أن تحبوا شيئا وهو شر لكم وعسى أنتكرهوا شيئا وهو خير لكم والله يعلم وأنتم لا تعلمون" رفضه لك لا يعنيسوء بك ولا به ولكن اجتماعكما ليس مما قدر الله لك فلا تأسي على أمر مضى واشغلينفسك بالآتي من الرزق والأيام. انصحك بأن تضعي اهلك بالموضوع...ودعيهم على علم بكل ما يجري معك...وليسعوا بكل ما هو خير لك...ولا تحبيه شرا لك بل هو خير لك إن شاء الله....لا تجعلي أسلوبك في مواجهة أي إحباط في الحياة الانكفاء على نفسكوالاستغراق في الحزن والألم بل ادفعيه عن نفسك وتوكلي على الرزاقالكريم....ورددي دائما...اللهم من اعتز بك فلن يذل، ومن اهتدى بك فلن يضل، ومن استكثر بك فلن يقل،ومن استقوى بك فلن يضعف، ومن استغنى بك فلن يفتقر، ومن استنصر بك فلن يخذل، ومناستعان بك فلن يغلب، ومن توكل عليك فلن يخيب، ومن جعلك ملاذه فلن يضيع، ومن اعتصمبك فقد هدى إلى صراط مستقيم، اللهم فكن لنا وليا ونصيرا، وكن لنا معينا ومجيرا، إنككنت بنا بصيرا...الله اسأل ان يكتب لك الخير حيثما كان ويرضك به....اللهم دبر لها فإنها لا تحسن التدبير اللهم إن كان هذا الخاطب يصلح ان يكون زوجا صالحا لك ان ييسر زواجك منه...وإن كان غير ذلك ان يصرفه عنك ويصرف شره عنك ....دعوة صائم....محب فلا تلوموني	24-04-2014 03:55 PM محب فلا تلوموني التبليغ عن إساءة
26 -	عادي شو فيها أنا متلك خطبت و فسخت و خطبت و تزوجت و تطلقت مرة تانية و بعدهم أجاني واحد و عزابي و متعلم و عنده فيلا و نساني كل وجعي مع التانيين . بس ممكن بيئتك شويي ذكورية زيادة لإنك خايفة شكلك كتير .	12-08-2018 05:56 PM رولا التبليغ عن إساءة