بقلم :

 في سوريا سوق الحميدية في مصر خان الخليلي في عمان الساحة الهاشمية في الزرقاء الحبيبه (الحسبه) ممكن تضحكو ممكن تتمسخروا ممكن تتمهزئو بس فعلا هي هيك تحملك خطاك بشارع وسيع يبدأ من جهة بن السرور وريحة القهوة فايحه والناس رايحه وجايه هاي حاملة ابنها وماسكه بيد الثاني وهو حامل عبطة كياس وشباب اثنين واقفين على الزاوية عند بياع الخبز يراقبوا الصبايا الحلوات بس اما اللي مش حلوات سلامتك وتعيش ، بآخر الشارع تقف مئذنه لمسجد مخيم الزرقاء بكل شموخ من اول الدخله بعد كنافة القاضي القديمه تشم ريحة الزعتر والبقدونس والنعنع ، وانت داخل من جنب مطعم شاتيلا تبلش تسمع اصوات المناديين بندورة بطاطا ملوخيه وكل واحد يتفنن بعرض بضاعته والكمش والناس تتدافع بكل ادب واشي جار كياسه وراه ويرجع الصوت خيار اربع كليو بدينار بقدونس نعنع ميرمية جبلية وهذا يرش ميه على البضاعة واللمبات مدلية ورحية البساطة فايحة والكل مبسوط على كسب الحلال ونت تمشي وكتوف الناس تتخابط ببعضها والاعتذرات شغاله بتلاقي بنت صبيه على اخر طراز ماشيه مع امها بس مستحية واتمنت لو انه امها ما دخالت الحسبه لانه عيون الناس عليها وهي حامله بعض الاكياس وتتهادى بمشيتها ولما صارت عند واحد من البياعين نادى فجأة بوكسة البطاطا بدينارين فالمسكينه نجزت من صوته وبصوت واطي بسم الله الرحمن الرحيم وهو شافها هيك ضحك ونادى اطرى من خد الصبيه يا بطاطا هاي الحسبه بالنسبه لاهل الزرقاء مكان مميز والها ذكريات كثير حلوه بنوفس الختيره وخاصة ايام رمضان وبعد العصر بالذات لما الكل يطلع من جامع عمر وتبدأ حركة الاكياس بحبك يا حسبة ويا محلى بسطاتك

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا